ថ្នាក់ដឹកនាំក្រសួងមហាផ្ទៃ ក្រើនរំឭកដល់អាជ្ញាធរពាក់ព័ន្ធនិងកងកម្លាំងអនុវត្តច្បាប់ទាំងអស់ បន្តបំពេញភារកិច្ចដោយការអត់ធ្មត់និងគោរពក្រមសីលធម៌វិជ្ជាជីវៈ ជាពិសេស ចៀសវាងការប្រើអំពើហិង្សានៅពេលអនុវត្តរាល់បទបញ្ជាឬវិធានការនានារបស់រដ្ឋាភិបាល។
ការក្រើនរំឭកនេះបានធ្វើឡើងតាមរយៈសារផ្ញើជូនអាជ្ញាធរមានសមត្ថកិច្ចនិងកងកម្លាំងអនុវត្តច្បាប់ក្នុងស្ថានភាពនៃការអនុវត្តវិធានការបិទខ្ទប់ ដើម្បីទប់ស្កាត់ការឆ្លងរាលដាលជំងឺកូវីដ-១៩ នៅថ្ងៃពុធនេះ។
រដ្ឋមន្ត្រីក្រសួងមហាផ្ទៃ លោក ស ខេង តាមរយៈសារនោះ បានកោតសរសើរដល់អាជ្ញាធរមានសមត្ថកិច្ចនិងកងកម្លាំងអនុវត្តច្បាប់ទាំងអស់ ដែលបាននិងកំពុងអនុវត្តនូវគោលការណ៍នានារបស់រដ្ឋាភិបាលយ៉ាងសកម្ម ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ តាមមូលដ្ឋាននានាក្នុងរាជធានីភ្នំពេញ និងក្រុងតាខ្មៅ ខេត្តកណ្តាល។
ទន្ទឹមនឹងនោះ លោកក៏បានក្រើនរំឭកដល់អាជ្ញាធរពាក់ព័ន្ធនិងកងកម្លាំងអនុវត្តច្បាប់ទាំងនោះ ត្រូវបំពេញភារកិច្ចដោយការអត់ធ្មត់ ប្រកាន់ខ្ជាប់នូវវិន័យ អាកប្បកិរិយាថ្លៃថ្នូរ ម៉ឺងម៉ាត់ និងត្រូវគោរពគោលកាណ៍នៃក្រមសីលធម៌វិជ្ជាជីវៈរបស់កងកម្លាំង ជាពិសេសត្រូវចៀសវាងការប្រើប្រាស់អំពើហិង្សាក្នុងការដោះស្រាយបញ្ហា នៅពេលអនុវត្តរាល់បទបញ្ជាឬវិធានការនានារបស់រដ្ឋាភិបាល។
លោកបានគូសបញ្ជាក់ថា៖ «យើងខ្ញុំយល់ច្បាស់អំពីការលំបាក ផលប៉ះពាល់ និងបញ្ហាប្រឈមផ្សេងៗដែលអាជ្ញាធរមានសមត្ថកិច្ច ព្រមទាំងកងកម្លាំងអនុវត្តច្បាប់ទាំងអស់ កំពុងជួបប្រទះនៅក្នុងស្ថានភាពបច្ចុប្បន្ននេះ។ ក៏ប៉ុន្តែទោះបីយ៉ាងណា ខ្ញុំសូមជំរុញទឹកចិត្តឱ្យបងប្អូនបន្តរក្សានិងប្រកាន់ខ្ជាប់នូវការអត់ធ្មត់ខ្ពស់ ដើម្បីទទួលបានការគាំទ្រនិងការចូលរួមពីគ្រប់មជ្ឈដ្ឋាន ក្នុងការបំពេញបេសកកម្មដ៏មានសារៈសំខាន់លើសមរភូមិប្រយុទ្ធប្រឆាំងជំងឺកូវីដ-១៩ ឱ្យទទួលបានជោគជ័យ»។
លោក ស ខេង ក៏បានអំពាវនាវដល់ប្រជាពលរដ្ឋទាំងអស់ចូលរួមអនុវត្តវិធានការនានារបស់រដ្ឋាភិបាល ក៏ដូចជាសហការអនុវត្តតាមការណែនាំរបស់អាជ្ញាធរនិងកងកម្លាំងមានសមត្ថកិច្ច ដើម្បីកាត់ផ្ដាច់និងឈានទៅបញ្ចប់ការឆ្លងរាលដាលក្នុងសហគមន៍នៃជំងឺកូវីដ-១៩។
គួរបញ្ជាក់ថា ក្នុងរយៈពេលប៉ុន្មានថ្ងៃចុងក្រោយនេះ មានការចែករំលែកវីដេអូឃ្លីបលើបណ្ដាញសង្គមហ្វេសប៊ុក ពាក់ព័ន្ធនឹងកម្លាំងសន្តិសុខមួយចំនួនបានវាយទៅលើបុរសម្នាក់នៅជាប់របងទីស្ដីការគណៈរដ្ឋមន្ត្រី និងវីដេអូមួយចំនួនទៀត ដែលថតពីសកម្មភាពនៃការវាយពលរដ្ឋនៅតំបន់ផ្សេងទៀត ខណៈដែលពលរដ្ឋទាំងនោះដើរចេញក្រៅផ្ទះ អំឡុងពេលរដ្ឋាភិបាលបិទខ្ទប់រាជធានីភ្នំពេញ និងក្រុងតាខ្មៅ។ ករណីនេះ ក្រុមអង្គការសង្គមស៊ីវិលមួយចំនួនបានស្នើទៅអាជ្ញាធរឬសមត្ថកិច្ចពាក់ព័ន្ធ ឱ្យដោះស្រាយបញ្ហានានាជាមួយប្រជាពលរដ្ឋដោយសន្តិវិធី ជាជាងការប្រើប្រាស់អំពើហិង្សានិងការដាក់ទោសទណ្ឌលើពលរដ្ឋដែលកំពុងជួបការលំបាកបញ្ហាជីវភាព អំឡុងពេលបិទខ្ទប់ទីក្រុងភ្នំពេញ ដើម្បីទប់ស្កាត់ការរីករាលដាលជំងឺកូវីដ-១៩៕
