ក្រសួងសុខាភិបាលប្រកាសថា អ្នកស្លាប់ដោយជំងឺកូវីដ-១៩ ចំនួន៣នាក់បន្ថែមទៀត ដែលធ្វើឱ្យចំនួនអ្នកស្លាប់ដោយសារជំងឺនេះកើនឡើងដល់៥៩នាក់ ខណៈរកឃើញអ្នកឆ្លងកូវីដ-១៩ថ្មីចំនួន៤៤៦នាក់បន្ថែមទៀត។
សេចក្តីប្រកាសព័ត៌មានរបស់ក្រសួងសុខាភិបាល នៅថ្ងៃទី២២ ខែមេសា ឆ្នាំ២០២១ បញ្ជាក់ថា អ្នកជំងឺកូវីដ-១៩ ទាំង៣នាក់ដែលបានទទួលមរណភាព ជាជនជាតិខ្មែរ រួមមាន បុរសអាយុ៥៥ឆ្នាំ ស្ត្រីអាយុ៨១ឆ្នាំ និងស្ត្រីអាយុ៨៣ឆ្នាំម្នាក់។ អ្នកជំងឺបានស្លាប់កាលពីថ្ងៃម្សិលមិញ ជាអ្នករស់នៅរាជធានីភ្នំពេញ ២នាក់ និងរស់នៅក្រុងតាខ្មៅ ខេត្តកណ្តាលម្នាក់។ ក្រសួងបញ្ជាក់ថា ពួកគាត់ស្លាប់ដោយមានបញ្ហាផ្លូវដង្ហើម និងរលាកសួតទាំងសងខាងធ្ងន់ធ្ងរបង្កឡើងពីវីរុសកូវីដ-១៩។
ដោយឡែក សេចក្តីប្រកាសព័ត៌មានរបស់ក្រសួងមួយទៀតនៅថ្ងៃនេះ បានឱ្យដឹងថា អ្នកឆ្លងជំងឺកូវីដ-១៩ មានចំនួន៤៤៦នាក់ថ្មីបន្ថែមទៀត ខណៈអ្នកជំងឺនេះចំនួន១៣០នាក់ ត្រូវបានព្យាបាលជាសះស្បើយ និងអនុញ្ញាតឱ្យចេញពីកន្លែងសម្រាកព្យាបាលទៀតផង។
ក្រសួងអះអាងថា អ្នកជំងឺថ្មីទាំង៤៤៦នាក់នោះ ជាអ្នកពាក់ព័ន្ធក្នុងព្រឹត្តិការណ៍សហគមន៍២០កុម្ភៈទាំងអស់។ អ្នកជំងឺកូវីដ-១៩ថ្មីទាំងនោះ រួមមាន នៅរាជធានីភ្នំពេញ ចំនួន៣៣១នាក់ ខេត្តកណ្តាល ២១នាក់ ព្រះសីហនុ ៨២នាក់ តាកែវ ៥នាក់ កំពង់ស្ពឺ ២នាក់។ ចំណែកខេត្តស្វាយរៀង ព្រៃវែង បន្ទាយមានជ័យ កំពង់ចាម និងខេត្តបាត់ដំបង គឺមានអ្នកជំងឺម្នាក់ៗ។
គិតត្រឹមព្រឹកថ្ងៃទី២២ ខែមេសានេះ អ្នកជំងឺកូវីដ-១៩ សរុបមានចំនួន៨១៩៣នាក់ ក្នុងនោះអ្នកជំងឺពាក់ព័ន្ធព្រឹត្តិការណ៍សហគមន៍២០កុម្ភៈមានចំនួន៧ ៦៤៨នាក់ និងបណ្តាលឱ្យមានអ្នកស្លាប់ចំនួន៥៩នាក់។ ដោយឡែក អ្នកជំងឺដែលព្យាបាលជាសះស្បើយមានចំនួន២ ៩២៤នាក់ និងកំពុងសម្រាកព្យាបាលចំនួន៥ ២០៤នាក់៕
