សមាគមរោងចក្រកាត់ដេរកម្ពុជា (GMAC) អំពាវនាវដល់សមាជិករបស់ខ្លួនដែលស្ថិតនៅក្នុងតំបន់បិទខ្ទប់ ផ្តល់ប្រាក់ឧបត្ថម្ភក្នុងចំនួនណាមួយទៅដល់កម្មករនិយោជិតរបស់ខ្លួន ដើម្បីជួយសម្រួលជីវភាពប្រចាំថ្ងៃរបស់ពួកគេ រហូតដល់ការបិទខ្ទប់នេះត្រូវបានបញ្ចប់។
យោងតាមលិខិតរបស់សមាគមរោងចក្រកាត់ដេរកម្ពុជា (GMAC) នៅថ្ងៃទី២២ ខែមេសានេះ បានកត់សម្គាល់ថា ដោយសារតែវិធានការបិទខ្ទប់របស់រដ្ឋាភិបាលបានធ្វើឱ្យវិស័យកាត់ដេរសម្លៀកបំពាក់ ស្បែកជើង និងផលិតផលធ្វើដំណើរទទួលរងផលប៉ះពាល់យ៉ាងខ្លាំង។
លិិខិតដដែលបន្តថា រោងចក្រដែលរងផលប៉ះពាល់បានប្រឈមមុខនឹងការខាតបង់ផ្នែកហិរញ្ញវត្ថុយ៉ាងធ្ងន់ធ្ងរ ខណៈកម្មករនិយោជិតរងគ្រោះក៏ប្រឈមមុខនឹងការថយចុះនូវប្រាក់ចំណូលដោយសារការព្យួរកិច្ចសន្យាការងារ។
យោងតាមច្បាប់ស្តីពីការងារ និងសេចក្តីជូនដំណឹង ចុះថ្ងៃទី១៩ ខែមេសា ឆ្នាំ២០២១ បានចែងថា កម្មករនិយោជិតមិនមានកាតព្វកិច្ចបំពេញការងារឱ្យនិយោជក ហើយនិយោជកក៏មិនមានកាតព្វកិច្ចផ្តល់ប្រាក់ឈ្នួលដល់កម្មករនិយោជិត ក្នុងអំឡុងពេលព្យួរកិច្ចសន្យាការងារនេះដែរ។
ទោះយ៉ាងណាក្តី សមាគមនេះបញ្ជាក់ថា ដោយមើលឃើញពីភាពលំបាករបស់កម្មករនិយោជិតក្នុងអំឡុងពេលដ៏លំបាកនេះ សមាគមអំពាវនាវដល់សមាជិកទាំងអស់ដែលស្ថិតនៅក្នុងតំបន់បិទខ្ទប់ ពិចារណាផ្តល់ប្រាក់ឧបត្ថម្ភក្នុងចំនួនណាមួយដល់កម្មករនិយោជិតរបស់ខ្លួន បន្ថែមពីលើការឧបត្ថម្ភផ្សេងៗដែលផ្តល់ដោយរដ្ឋាភិបាល ដើម្បីជួយសម្រួលជីវភាពប្រចាំថ្ងៃរបស់ពួកគេ រហូតដល់ការបិទខ្ទប់នេះត្រូវបានបញ្ចប់។
លិខិតអំពាវនាវរបស់សមាគមរោងចក្រកាត់ដេរកម្ពុជា បានធ្វើឡើងបន្ទាប់ពីក្រសួងការងារបានចេញលិខិតមួយចុះថ្ងៃទី១៩ ខែមេសា ដោយបង្គាប់ឱ្យម្ចាស់រោងចក្រសហគ្រាស សិប្បកម្ម និងក្រុមហ៊ុនដែលត្រូវផ្អាកសកម្មភាពអាជីវកម្មក្នុងអំឡុងពេលបិទខ្ទប់នេះ ដោយត្រូវរក្សាប៉ុស្តិ៍ការងារ និងរក្សាអតីតភាពការងារជូនកម្មករនិយោជិតរបស់ខ្លួនដដែល និងត្រូវបើកប្រាក់ឈ្នួលដើមខែមេសា ជូនដល់កម្មកររបស់ខ្លួន ប្រសិនបើមិនទាន់បើក។
លិខិតរបស់ក្រសួងក៏ជំរុញឱ្យម្ចាស់រោងចក្រសហគ្រាស ត្រូវផ្តល់ប្រាក់ឧបត្ថម្ភបន្ថែមជូនដល់កម្មករនិយោជិតរបស់ខ្លួនទៅតាមលទ្ធភាព ដោយផ្អែកលើស្មារតីមនុស្សធម៌ ហើយការផ្តល់ប្រាក់ឧបត្ថម្ភបន្ថែមនេះក៏ត្រូវធ្វើនៅក្រោយពេលចប់វិធានការបិទខ្ទប់នេះដែរ៕
