រយៈ​ពេល​ជាង​២​ខែ​​ មេរោគ​កូវីដ-១៩​​បាន​ឆក់​យក​ជីវិត​អ្នក​ជំងឺ​នៅ​កម្ពុជា​ចំនួន​៧១​នាក់ ​​

រថយន្តពេទ្យដឹកអ្នកជំងឺកូវីដ១៩ ទៅព្យាបាលនិងធ្វើចត្តាឡីស័កនៅសណ្ឋាគារ The Great Duke ក្រោយផ្លាស់មកពីមណ្ឌលចត្តាឡីស័កព្រែកព្នៅ ថ្ងៃទី០៨ ខែមីនា ឆ្នាំ២០២១។ (ជន ចាន់រ៉ែន)

ក្រសួងសុខាភិបាលបានឱ្យដឹងថា អ្នកជំងឺកូវីដ-១៩ ចំនួន៧១នាក់ហើយបានស្លាប់ដោយសារមេរោគផ្លូវដង្ហើមមួយនេះ ក្នុងរយៈពេលជាង​២ខែប៉ុណ្ណោះ។

សេចក្តីប្រកាសព័ត៌មានរបស់​ក្រសួងសុខាភិបាល នៅថ្ងៃទី២៤ ខែមេសា ឆ្នាំ២០២១នេះ ​បញ្ជាក់ថា​ មានករណីអ្នកស្លាប់ដោយវីរុសកូវីដ-១៩ ចំនួន១០នាក់បន្ថែមទៀត ដែលធ្វើឱ្យចំនួនអ្នកស្លាប់កើនដល់៧១នាក់ក្នុងរយៈពេលជាង២ខែមកនេះ ដោយ​គិតចាប់ពីមានព្រឹត្តិការណ៍សហគមន៍២០កុម្ភៈ មកត្រឹមព្រឹកថ្ងៃទី២៤ ខែមេសា​ ខណៈមុនមានព្រឹត្តិការណ៍សហគមន៍២០កុម្ភៈ មិនមានអ្នកជំងឺកូវីដ-១៩ណាម្នាក់ស្លាប់នោះឡើយ។

សេចក្តីប្រកាសដដែលបញ្ជាក់ថា ពួកគាត់ស្លាប់ដោយជំងឺកូវីដ-១៩ កាលពីថ្ងៃទី២២ និងទី២៣ ខែមេសា ដោយសារបញ្ហាផ្លូវដង្ហើមនិងរលាកសួតទាំងសងខាងបង្កពីវីរុសជាសកលមួយ​នេះ និងមានអ្នកជំងឺខ្លះបន្ថែមលើជំងឺប្រចាំកាយរបស់ខ្លួន ព្រមទាំងមានអ្នកជំងឺពីរនាក់ក្នុងចំណោមនោះ​បានស្លាប់មុនពេលបញ្ជូនមកដល់មន្ទីរពេទ្យផងដែរ។

អ្នកជំងឺទាំង១០នាក់នេះ រួមមាន ស្ត្រី៤នាក់ និងបុរស៦នាក់ ដែលមានវ័យចន្លោះពី២៤ឆ្នាំ ដល់៧៧ឆ្នាំ និងមានទីលំនៅក្នុងរាជធានីភ្នំពេញ ចំនួន៨នាក់ នៅខេត្តស្វាយរៀងម្នាក់ និងនៅខេត្តបន្ទាយមានជ័យម្នាក់។

​​សេចក្តីប្រកាសព័ត៌មានដាច់ដោយឡែករបស់ក្រសួងសុខាភិបាល ក៏បាន​ឱ្យដឹងពីការរកឃើញអ្នកឆ្លងជំងឺកូវីដ-១៩ថ្មីចំនួន៥១១នាក់ថែមទៀត ដែលភាគច្រើនជាអ្នករស់នៅរាជធានីភ្នំពេញ ខណៈអ្នកជំងឺចំនួន៦២នាក់បានជាសះស្បើយនិងអនុញ្ញាតឱ្យចេញពីកន្លែងសម្រាកព្យាបាល ប៉ុន្តែត្រូវបន្តធ្វើចត្តាឡីស័ក១៤ថ្ងៃ។

ប្រភពដដែលបន្ថែមថា អ្នកឆ្លងថ្មីទាំង៥១១នាក់ មាន២នាក់ជាអ្នកដំណើរមកពីក្រៅប្រទេស និងចំនួន៥០៩នាក់ផ្សេងទៀតជាករណីឆ្លងក្នុងសហគមន៍២០កុម្ភៈ។ អ្នកជំងឺ៥០៩នាក់ថ្មី រួមមាន រាជធានីភ្នំពេញ ចំនួន៣១៨នាក់, ព្រះសីហនុ ១២៦នាក់, កណ្តាល ៤៤នាក់, ​បន្ទាយមានជ័យ ៤នាក់, ​កំពង់ឆ្នាំង ៤នាក់, ​កំពង់ធំ ២នាក់, ​ស្វាយរៀង ២នាក់ ប៉ុន្តែស្លាប់១នាក់, តាកែវ ២នាក់, ​ត្បូងឃ្មុំ ២នាក់ និងខេត្តកំពង់ចាម ៥នាក់។​ ​

កម្ពុជាបានរកឃើញអ្នកឆ្លងសរុបចំនួន៩ ៣៥៩នាក់ ក្នុងនោះករណីសហគមន៍២០កុម្ភៈ ចំនួន៨ ៨១០នាក់ និងបណ្តាលឱ្យមានអ្នកស្លាប់ចំនួន៧១នាក់ គិតត្រឹមម៉ោង៧ព្រឹក ថ្ងៃទី២៤ ខែមេសា ឆ្នាំ២០២១នេះ។ ចំណែក​​អ្នកជាសះស្បើយមានចំនួន៣ ២១០នាក់ និងអ្នកជំងឺចំនួន៦ ០៧២នាក់កំពុងសម្រាកព្យាបាលនៅឡើយ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ