ក្រសួងសុខាភិបាល ប្រកាសពីការស្លាប់ដោយសារវីរុសកូវីដ-១៩ ចំនួន៥នាក់ និងរកឃើញឆ្លងថ្មីជិត៦០០នាក់បន្ថែមទៀតក្នុងព្រឹត្តិការណ៍សហគមន៍២០កុម្ភៈ ដែលធ្វើឱ្យចំនួនអ្នកស្លាប់ដោយជំងឺផ្លូវដង្ហើមមួយនេះកើនដល់៧៩នាក់ និងអ្នកឆ្លងកើនដល់១០ ០០៥នាក់។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី២៦ ខែមេសា ឆ្នាំ២០២១ បញ្ជាក់ថា អ្នកស្លាប់ដោយសារជំងឺកូវីដ-១៩ ទាំង៥នាក់នោះ រួមមាន ស្ត្រី២នាក់ និងបុរស៣នាក់ ដោយ៤នាក់រស់នៅរាជធានីភ្នំពេញ និងម្នាក់ទៀតនៅខេត្តកែប។
ក្រសួងបន្តថា ពួកគាត់ស្លាប់បាត់បង់ជីវិតដោយសារមានបញ្ហាផ្លូវដង្ហើម និងរលាកសួតទាំងសងខាងធ្ងន់ធ្ងរ ហើយអ្នកជំងឺខ្លះក៏មានជំងឺប្រចាំកាយផងដែរ ដូចជា ជំងឺទឹកនោមផ្អែម ជំងឺទាចទឹក និងជំងឺលើសឈាម។
ដោយឡែក ក្រសួងសុខាភិបាលបានចេញសេចក្តីប្រកាសព័ត៌មានមួយទៀត បញ្ជាក់ពីការរកឃើញអ្នកឆ្លងជំងឺកូវីដ-១៩ ថ្មីចំនួន៥៨០នាក់ថែមទៀត ខណៈអ្នកជំងឺចំនួន១៧៧នាក់បានជាសះស្បើយ និងអនុញ្ញាតឱ្យចេញពីកន្លែងសម្រាកព្យាបាល ប៉ុន្តែត្រូវធ្វើចត្តាឡីស័កតាមដានខ្លួនឯងរយៈពេល១៤ថ្ងៃទៀត។
ក្នុងចំណោមអ្នកឆ្លងទាំង៥៨០នាក់ ក្រសួងថា មានករណីនាំចូលពីក្រៅប្រទេសតែម្នាក់ប៉ុណ្ណោះ ជាពលរដ្ឋខ្មែរ ធ្វើដំណើរមកពីប្រទេសថៃ ក្រៅពីនោះជាអ្នកពាក់ព័ន្ធក្នុងសហគមន៍២០កុម្ភៈទាំងអស់។
បើតាមក្រសួងសុខាភិបាល រាជធានីភ្នំពេញនៅតែស្ថិតនៅក្នុងចំណាត់ថ្នាក់ខ្ពស់ជាងគេដដែល ក្នុងចំណោមអ្នកជំងឺឆ្លងថ្មី ដែលបានរកឃើញកាលពីថ្ងៃម្សិលមិញនោះ ដោយមានអ្នកឆ្លងចំនួន៣៣៧នាក់ បន្ទាប់មក ខេត្តព្រះសីហនុ និងបន្ទាយមានជ័យ ដែលមានអ្នកឆ្លង៩១នាក់ដូចគ្នា។
ដោយឡែក ខេត្តកណ្តាល មានចំនួន៥១នាក់ ហើយខេត្តកំពង់ធំ និងព្រៃវែង មានអ្នកឆ្លង២នាក់ដូចគ្នា។ រីឯខេត្តកែប កំពង់ឆ្នាំង កំពង់ស្ពឺ ស្វាយរៀង និងត្បូងឃ្មុំ រកឃើញអ្នកឆ្លងកូវីដ-១៩ ចំនួនម្នាក់ៗ។
កម្ពុជាបានរកឃើញអ្នកឆ្លងសរុបចំនួន១០ ៥៥៥នាក់ ក្នុងនោះអ្នកឆ្លងកូវីដ-១៩ ក្នុងព្រឹត្តិការណ៍សហគមន៍២០កុម្ភៈ មានចំនួន១០ ០០៥ នាក់ និងមានអ្នកស្លាប់ចំនួន៧៩នាក់ គិតត្រឹមព្រឹកថ្ងៃទី២៦ ខែមេសា ឆ្នាំ២០២១នេះ។ សម្រាប់អ្នកជំងឺព្យាបាលជាសះស្បើយចំនួន៣ ៥៧៧នាក់ និង ៦ ៨៩២នាក់ កំពុងសម្រាកព្យាបាលនៅឡើយ៕
