រដ្ឋាភិបាលបន្តណែនាំដល់អភិបាលរាជធានី-ខេត្ត ពង្រឹងការអនុវត្តវិធានការនានា ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ខណៈកម្មករនិងប្រជាពលរដ្ឋមួយចំនួនដែលកំពុងជាប់នៅកន្លែងបិទខ្ទប់ត្អូញត្អែរពីការខ្វះខាតជីវភាព។
ក្នុងសេចក្តីណែនាំមួយចុះថ្ងៃទី២៥ ខែមេសា ឆ្នាំ២០២១ រដ្ឋាភិបាលបានបន្តណែនាំដល់គណៈអភិបាលរាជធានី-ខេត្ត ត្រូវផ្តោតការយកទុកដាក់បន្ថែមទៀត ដោយដាក់ចេញនិងអនុវត្តឱ្យបានម៉ឺងម៉ាត់នូវវិធានការនានា ដូចជា នៅភូមិសាស្ត្ររាជធានីភ្នំពេញ និងក្រុងតាខ្មៅ ត្រូវបន្តបិទខ្ទប់ ដើម្បីពង្រឹងការទប់ស្កាត់ការរាលដាលជំងឺកូវីដ-១៩ ទៅកន្លែងផ្សេងទៀត ជាពិេសសការធ្វើចរាចរណ៍របស់មនុស្សក្នុងតំបន់បិទខ្ទប់នេះ។
សេចក្តីណែនាំដដែលបន្ថែមទៀតថា សម្រាប់ភូមិសាស្ត្រឬទីតាំងដែលមានការផ្ទុះជំងឺកូវីដ-១៩ អាជ្ញាធរខេត្តនីមួយៗត្រូវចាត់វិធានការសំដៅដល់ការកាត់ផ្តាច់និងទប់ស្កាត់ការឆ្លងរាលដាលជំងឺនេះឱ្យបានឆាប់រហ័ស ទាន់ពេលវេលា តាមរយៈការបិទខ្ទប់ភូមិសាស្ត្របន្តទៀត ផ្អាកសកម្មភាពអាជីវកម្ម មុខរបរ សកម្មភាពការងារ និងកាត់ផ្តាច់ចរាចរណ៍ចេញ-ចូលតំបន់ផ្ទុះជំងឺកូវីដ-១៩ នេះផងដែរ។
រដ្ឋាភិបាលក៏បានជំរុញឱ្យអាជ្ញាធរត្រូវស្វែងរកអ្នកពាក់ព័ន្ធដោយផ្ទាល់និងដោយប្រយោលជាមួយអ្នកជំងឺកូវីដ-១៩ ដើម្បីយកសំណាកទៅពិនិត្យ ហើយធ្វើចត្តាឡីស័កនិងព្យាបាលផងដែរ។
សេចក្តីណែនាំនេះបន្តទៀតថា ក្នុងករណីមានការផ្ទុះការឆ្លងរាលដាលក្នុងខេត្តជាប់ព្រំប្រទល់គ្នា អាជ្ញាធរខេត្តដែលពាក់ព័ន្ធត្រូវសហការគ្នាដាក់ចេញវិធានការរឹតត្បិតឬហាមឃាត់ការធ្វើដំណើរចេញ-ចូលភូមិសាស្ត្រដែលផ្ទុះជំងឺកូវីដ-១៩នោះជាបណ្តោះអាសន្ន និងត្រូវពង្រឹងការអនុវត្តវិធានការផ្សេងៗជាច្រើនទៀត។
កម្មករម្នាក់បម្រើការងារនៅរោងចក្រ ឌីន ហាន លោក ស្តើង សៀង ដែលកំពុងជាប់នៅតំបន់បិទខ្ទប់ ស្ថិតក្នុងភូមិថ្មីសង្កាត់ស្ទឹងមានជ័យ៣ និយាយថា ការដែលរដ្ឋាភិបាលបន្តបិទខ្ទប់នេះ ធ្វើឱ្យរូបលោកនិងកម្មករជាច្រើនផ្សេងទៀតនឹងប្រឈមការខ្វះស្បៀងអាហារនិងប្រាក់កាសសម្រាប់ចំណាយផ្សេងៗប្រចាំថ្ងៃ។
កម្មកររូបនេះឱ្យដឹងថា ចាប់តាំងពីរដ្ឋាភិបាលបិទខ្ទប់ភូមិសាស្ត្ររាជធានីភ្នំពេញមក រូបលោកទើបតែទទួលបានអំណោយពីអាជ្ញាធរតែម្តងប៉ុណ្ណោះ កាលពីថ្ងៃទី១១ ខែមេសា ឆ្នាំ២០២១ ខណៈលោកថា កម្មករនិងប្រជាពលរដ្ឋប្រហែល៥០០គ្រួសារដែលរស់នៅតំបន់នោះកំពុងប្រឈមខ្វះស្បៀង។
លោកបន្ថែមថា៖ «ខ្ញុំសូមអំពាវនាវដល់អាជ្ញាធរជួយផ្តល់ស្បៀងបន្ថែមដល់ពួកខ្ញុំទៀត។ ហើយមួយទៀត សុំឱ្យរដ្ឋាភិបាលជួយសម្រួលដល់ការបង់ថ្លៃទឹកភ្លើងដល់បងប្អូនកម្មករផង ព្រោះពួកយើងឥលូវអត់មានការងារធ្វើទេ។ ព្រោះយើងសម្រាក១៤ថ្ងៃទៀត យើងអត់មានការងារធ្វើទេ អ៊ីចឹងយើងអត់មានប្រាក់ចំណូលដើម្បីសម្រាប់ចាយវាយនិងបង់ថ្លៃទឹកភ្លើង និងសុំឱ្យធនាគារមានការយោគយល់កម្មករ-កម្មការិនីដែលជាប់ជំពាក់ធនាគារផង»។
ស្ត្រីមេម៉ាយបម្រើការងារនៅរោងចក្រ ស៊េង យ៉ុង អ្នកស្រី ភាង សារ៉ុម បានរៀបរាប់ថា រាល់ថ្ងៃអ្នកស្រីត្រូវខិតខំធ្វើការងារដើម្បីចិញ្ចឹមសមាជិកគ្រួសារ៧នាក់តែម្នាក់ឯង។ កម្មការិនីរូបនេះបន្តថា អ្នកស្រីបានជាប់ធ្វើចត្តាឡីស័កនៅបន្ទប់ជួល ជាមួយកម្មករជាង៣០នាក់ផ្សេងទៀត ស្ថិតនៅភូមិសាមគ្គី សង្កាត់ឫស្សីកែវ រយៈពេលជាង២០ថ្ងៃហើយ ដោយពុំមានលុយនិងស្បៀងអាហារគ្រប់គ្រាន់សម្រាប់ផ្គត់ផ្គង់គ្រួសារនិងខ្លួនឯងឡើយ។
អ្នកស្រីបន្ថែមថា៖ «ម្តាយនិងកូនរបស់ខ្ញុំនៅស្រុក គាត់អត់មានអីហូប អត់មានអីចាយ ហើយខ្ញុំត្រូវបានគេឃុំឱ្យធ្វើចត្តាឡីស័កក្នុងបន្ទប់ជួលនៅភ្នំពេញទៀត អត់មានអ្នកណាមកសួរនាំ អត់មានអ្នកណាមកចេញអំណោយអីឱ្យទេ ទទេតាំងពីគេបិទថ្ងៃទី១០ មេសាមក។ ខ្ញុំសូមអំពាវនាវសុំអាហារហូបចុក លុយកាក់ខ្លះសម្រាប់បង់ថ្លៃបន្ទប់ ទឹកភ្លើង គ្រួសារខ្ញុំអត់មានអីចាយ»។
កម្មកររោងចក្រមួយក្រុមទៀតដែលកំពុងស្នាក់នៅបន្ទប់ជួល ស្ថិតក្នុងភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ បានអំពាវនាវតាមបណ្តាញសង្គមហ្វេសប៊ុក សុំជំនួយពីអាជ្ញាធរនិងសប្បុរសជនឱ្យជួយផ្តល់ស្បៀងអាហារនិងប្រាក់កាសផងដែរ។
អ្នកស្រី ចាន់ ស៊ីណា ជាកម្មការិនីម្នាក់ក្នុងចំណោមនេះបានអះអាងថា កម្មករដែលកំពុងជួបបញ្ហាជីវភាពនោះមាន១៣៤គ្រួសារ។ អ្នកស្រីថា តាំងពីរដ្ឋាភិបាលបិទខ្ទប់រាជធានីភ្នំពេញមក គឺពួកគាត់បានបាត់បង់ចំណូលទាំងស្រុង ដោយសារពុំបានទៅធ្វើការងារ។
អ្នកស្រីបន្ថែមថា៖ «បើនិយាយរឿងខ្វះហ្នឹង ខ្វះខាតទាំងអស់តាំងពីអង្ករ ទាំងម្ហូបអាហារ និងថ្លៃចំណាយផ្សេងៗទៀត។ ជារួម និយាយទៅ ខ្វះសព្វគ្រប់តែម្តង ពីព្រោះយើងអត់បានចេញទៅរកអីផង នៅបន្ទប់ជួលទាំងអស់គ្នា»។
វីអូឌី មិនអាចសុំការឆ្លើយតបពីអភិបាលខណ្ឌពោធិ៍សែនជ័យ និងអភិបាលខណ្ឌមានជ័យ បានទេ ពាក់ព័ន្ធករណីនេះ។
ចំណែកប្រធានរដ្ឋបាលខណ្ឌឫស្សីកែវ លោក សន សោភ័ណ្ឌ មានប្រសាសន៍ថា រដ្ឋបាលខណ្ឌមិនទាន់ទទួលបានព័ត៌មានពាក់ព័ន្ធពលរដ្ឋឬកម្មករនៅក្នុងដែនសមត្ថកិច្ចរបស់ខ្លួនជួបការខ្វះខាតនៅឡើយទេ ប៉ុន្តែយ៉ាងណា លោកថា ក្រោយទទួលបានព័ត៌មាននេះ លោកនឹងឱ្យមន្ត្រីចុះស្រាវជ្រាវ ដើម្បីផ្តល់ជាអំណោយដល់អ្នកដែលកំពុងខ្វះខាតទាំងនោះ។
លោកបន្ថែមថា៖ «ជាគោលការណ៍ គឺយើងចែកជូនប្រជាពលរដ្ឋទាំងអស់ មិនឱ្យខ្វះកន្លែងណាកើតទេ។ អំណោយរបស់សម្តេចផង អំណោយរបស់សប្បុរសជនផង មិនឱ្យខ្វះចន្លោះកន្លែងណាទេ»។
ប្រធានសហភាពការងារកម្ពុជា លោក អាត់ ធន់ មើលឃើញថា វិធានការដោះស្រាយនិងការផ្តល់ជំនួយទៅដល់កម្មករដែលកំពុងធ្វើចត្តាឡីស័កឬកំពុងជាប់ក្នុងតំបន់បិទខ្ទប់នោះ នៅមានភាពខ្វះចន្លោះនៅឡើយ ដែលធ្វើឱ្យកម្មករទាំងនោះបន្តជួបការលំបាក។
លោកបន្តថា ដើម្បីដោះស្រាយនិងជួលសម្រួលដល់ការលំបាករបស់កម្មករនេះ ថៅកែត្រូវបើកប្រាក់ឈ្នួលជូនកម្មករពេញ ខណៈពេលដែលពួកគេកំពុងព្យួរការងារនេះ។
លោកបន្ថែមថា៖ «យើងស្នើឱ្យក្រុមហ៊ុនបើកប្រាក់ឈ្នួលឱ្យកម្មករចាប់ពីឥលូវនេះតែម្តង តាមប្រព័ន្ធទៅតាមវីង តាមធនាគារដែលគាត់ធ្លាប់បើកហ្នឹង បង្វិលសាច់ប្រាក់ឱ្យពួកគាត់ដូចរាល់ដងទៅ ហើយកុំកាត់លុយពួកគាត់អំឡុងពេលព្យួរការងារហ្នឹង ត្រូវឱ្យគាត់ពេញ វាជាការស្រេចហើយ។ មួយវិញទៀត សម្ភារមានអង្ករ មី ទឹកត្រី និងសម្ភារផ្សេងៗទៀតហ្នឹង ត្រូវផ្តល់ឱ្យពួកគាត់ទៅតាមបន្ទប់ជួលឱ្យបានគ្រប់គ្នា ដើម្បីពួកគាត់បានអីហូបចុក។ ចំពោះសេវាសុខភាព គួរតែជួយសម្រួលឱ្យពួកគាត់បានស្រួលផង»។
អ្នកនាំពាក្យរដ្ឋាភិបាល លោក ផៃ ស៊ីផាន បានទទួលស្គាល់ថា ការឧបត្ថម្ភស្បៀងអាហារទៅដល់ប្រជាពលរដ្ឋកំពុងធ្វើចត្តាឡីស័កនិងជាប់ក្នុងតំបន់បិទខ្ទប់នោះ មានភាពខ្វះចន្លោះមែន។ តែយ៉ាងណា លោកស្នើឱ្យមានការយោគយល់ដល់អាជ្ញាធរពាក់ព័ន្ធចំពោះការរៀបចំនេះ។
លោកបន្ថែមថា៖ «យើងសូមអធ្យាស្រ័យពីប្រជាពលរដ្ឋផង ពេលយើងជួបបញ្ហាភ្លាម យើងបានដោះស្រាយបណ្តើរៗ។ រឿងម្ហូបអាហារហ្នឹង យើងមិនឱ្យខ្វះខាតទេ វាអាចយឺតយ៉ាវបន្តិច។ ឥលូវខាងខ្ញុំនេះបានរៀបចំមជ្ឈមណ្ឌលមួយ ដើម្បីទទួលព័ត៌មានពីតំបន់ក្រហម និងតំបន់ផ្សេងទៀត ចំពោះអ្នកត្រូវការជំនួយជាបន្ទាន់ ដើម្បីយើងនាំព័ត៌មាននេះទៅសាលាក្រុងនិងសមត្ថកិច្ចពាក់ព័ន្ធ ដើម្បីទទួលព័ត៌មាននិងឆ្លើយតបទៅប្រជាពលរដ្ឋឱ្យទាន់ពេលវេលា»។
កាលពីថ្ងៃទី២៥ ខែមេសា ឆ្នាំ២០២១នេះ រដ្ឋាភិបាលបានសម្រេចបញ្ចប់ការហាមឃាត់ការធ្វើដំណើរនិងការបិទរមណីយដ្ឋានទេសចរណ៍នៅទូទាំងប្រទេស ដែលមានន័យថា ប្រជាពលរដ្ឋអាចចេញចូលឆ្លងពីខេត្តមួយទៅខេត្តមួយបាន ប៉ុន្តែសម្រាប់រាជធានីភ្នំពេញ និងក្រុងតាខ្មៅ ខេត្តកណ្តាល និងតំបន់បិទខ្ទប់ផ្សេងទៀត បន្តហាមឃាត់ដដែល ដើម្បីទប់ស្កាត់ការឆ្លងរាលដាលជំងឺកូវីដ-១៩៕
