រដ្ឋាភិបាលកម្ពុជាបានសម្រេចហាមឃាត់មិនឱ្យជនជាតិឥណ្ឌា និងជនបរទេសទាំងអស់ដែលធ្វើដំណើរមកពីប្រទេសឥណ្ឌា ឬមានប្រវត្តិឆ្លងកាត់ប្រទេសមួយនេះ ចូលមកកម្ពុជាឡើយ ខណៈប្រទេសឥណ្ឌាកំពុងផ្ទុះការឆ្លងរីករាលដាលជំងឺកូវីដ-១៩ កាន់តែខ្លាំង ជាពិសេសវីរុសបំប្លែងថ្មីដែលឆ្លងកាចសាហាវនិងធ្ងន់ធ្ងរ។
សេចក្តីប្រកាសព័ត៌មានរបស់ក្រសួងសុខាភិបាលនៅរសៀលថ្ងៃទី២៧ ខែមេសា ឆ្នាំ២០២១នេះ បានលើកឡើងថា ចាប់តាំងពីព្រឹត្តិការណ៍សហគមន៍២០កុម្ភៈ ការរាតត្បាតនៃជំងឺកូវីដ-១៩ នៅកម្ពុជាមានសភាពខ្លាំងនិងលឿនជាងពេលមុនៗ។
ក្រសួងបន្តថា តាមការសង្កេតមើលនៅលើពិភពលោក ឃើញថា ក្រៅពីការរាតត្បាតជាសកលនៃវីរុសបំប្លែងថ្មីប្រភេទ B117 មានប្រភពចេញមកពីប្រទេសអង់គ្លេស គឺទើបតែមានលេចចេញនូវវីរុសបំប្លែងថ្មីមួយផ្សេងមួយទៀត ឈ្មោះថា B1617 មានប្រភពចេញពីប្រទេសឥណ្ឌា។ ក្រសួងសុខាភិបាលអះអាងទៀតថា វីរុសបំប្លែងថ្មី B1617 មានការឆ្លងខ្លាំង និងមានភាពធ្ងន់ធ្ងរជាងប្រភេទ B117 ទៅទៀត។
ករណីនេះ ក្រសួងបានសម្រេចហាមឃាត់មិនឱ្យជនជាតិឥណ្ឌានិងជនបរទេសទាំងអស់ដែលធ្វើដំណើរមកពីប្រទេសឥណ្ឌា ឬឆ្លងកាត់ប្រទេសឥណ្ឌា ឬមានប្រវត្តិធ្វើដំណើរទៅប្រទេសមួយនេះរយៈពេល៣សប្ដាហ៍មុនចូលមកប្រទេសកម្ពុជា តាមផ្លូវអាកាសឬតាមផ្លូវគោក។
ក្រសួងបញ្ជាក់ថា វិធាននេះនឹងត្រូវចាប់អនុវត្តក្រោយ៤៨ម៉ោងបន្ទាប់ពីចេញសេចក្តីប្រកាសព័ត៌មាននេះតែម្តង។
សារព័ត៌មាន Channelnewsasia ឬ CNA បានចុះផ្សាយថា នៅថ្ងៃទី២៧ ខែមេសា ឆ្នាំ២០២១ ថា ប្រទេសឥណ្ឌាបានប្រកាសពីការរកឃើញអ្នកឆ្លងកូវីដ-១៩ថ្មីជាង៣០០ ០០០នាក់បន្ថែមទៀត (៣២៣ ១៤៤នាក់) ហើយចំនួនអ្នកឆ្លងលើសពី៣០០ ០០០នាក់នេះ ឥណ្ឌារកឃើញរយៈពេល៦ថ្ងៃជាប់ៗគ្នាមកហើយ។
ប្រភពដដែលបន្តថា ស្របពេលរកឃើញអ្នកឆ្លងកូវីដ-១៩ យ៉ាងគំហុក ចំនួនអ្នកស្លាប់នៅប្រទេសឥណ្ឌានៅថ្ងៃនេះ មានជាង២ ០០០នាក់ផងដែរ។ CNA ដដែលអះអាងថា គិតមកត្រឹមថ្ងៃទី២៧ ខែមេសានេះ ចំនួនអ្នកឆ្លងកូវីដ-១៩ សរុបនៅឥណ្ឌា កើនដល់ជាង១៧លានករណី ឬ១៧លាននាក់ ដោយក្នុងនោះមានអ្នកស្លាប់សរុបជិត២សែននាក់ (១៩៨ ០០០នាក់) និងជាសះស្បើយឡើងវិញមានចំនួនជាង១៤លាននាក់៕
