ក្រសួងការពារជាតិ ប្រកាសដកឋានន្តរសក្តិ និងលុបឈ្មោះមន្រ្តីយោធាម្នាក់ចេញពីក្របខណ្ឌនៃកងយោធពលខេមរភូមិន្ទ ដោយសារល្មើសបម្រាមវិធានការរបស់រាជរដ្ឋាភិបាលក្នុងអំឡុងពេលបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល។
ក្នុងប្រកាសព័ត៌មានរបស់ក្រសួងការពារជាតិ ដែលចុះហត្ថលេខាដោយរដ្ឋមន្ត្រីក្រសួង លោក ទៀ បាញ់ កាលពីថ្ងៃម្សិលមិញ បានសម្រេចដកឋានន្តរសក្តិ និងលុបឈ្មោះវរសេនីយ៍ត្រី គឹម ពិសិដ្ឋ ជំនួយការកងវិស្វកម្មលេខ១៨០ ស្ពានថ្នល់ នៃនាយកដ្ឋានវិស្វកម្មក្រសួងការពារជាតិ ចេញពីក្របខណ្ឌនៃកងយោធពលខេមរភូមិន្ទ។
ប្រកាសរបស់ក្រសួងបញ្ជាក់ពីមូលហេតុថា ការដកឋានន្តរសក្តិនិងលុបឈ្មោះនេះ ដោយសារតែបុគ្គលរូបនេះមិនគោរពតាមសេចក្តីសម្រេចរបស់រាជរដ្ឋាភិបាល ស្តីពីការបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល។
កាលពីយប់ថ្ងៃទី២៤ ខែមេសា ឆ្នាំ២០២១ សមត្ថកិច្ចខេត្តកណ្តាល ដែលកំពុងតាមយាមប្រចាំការនៅសង្កាត់ព្រែកហូរ ក្រុងតាខ្មៅ ក្នុងអំឡុងបិទខ្ទប់ក្រុងតាខ្មៅ បានឃាត់ខ្លួនមនុស្ស៣នាក់ ក្នុងនោះមានលោក គឹម ពិសិដ្ឋ អាយុ៣៣ឆ្នាំ ជាមន្ត្រីយោធានៅនាយកដ្ឋានវិស្វកម្មនៃក្រសួងការពារជាតិ ខណៈដែលជនទាំង៣នាក់បាននាំគ្នាបើករថយន្តបម្រុងឆ្លងកាត់គោលដៅនោះក្នុងស្ថានភាពស្រវឹងស្រា និងល្មើសបម្រាមរបស់រដ្ឋាភិបាលក្នុងការបិទខ្ទប់។
អធិការក្រុងតាខ្មៅ លោក យី វណ្ណដា មានប្រសាសន៍ប្រាប់ វីអូឌី នៅថ្ងៃនេះថា ក្រោយការឃាត់ខ្លួននិងសាកសួររួច សមត្ថកិច្ចបានបញ្ជូនជនសង្ស័យទាំង៣នាក់នោះទៅសាលាដំបូងខេត្តកណ្តាល កាលពីថ្ងៃទី២៥ ខែមេសា ឆ្នាំ២០២១ ដើម្បីចាត់ការតាមនីតិវិធីច្បាប់ហើយ។
ព្រះរាជអាជ្ញារង និងអ្នកនាំពាក្យសាលាដំបូងខេត្តកណ្តាល លោក ទិន សុចិត្រា មានប្រសាសន៍ថា មន្រ្តីយោធាឈ្មោះ គឹម ពិសិដ្ឋ និងគូកន២នាក់ទៀតដែលល្មើសនឹងបម្រាមរដ្ឋាភិបាល ត្រូវបានតុលាការសម្រេចចោទប្រកាន់ពីបទមិនគោរពវិធានរដ្ឋបាល តាមមាត្រា៤ និងមាត្រា១១ នៃច្បាប់ស្តីពី «វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត»។
លោក សុចិត្រា បញ្ជាក់ថា រហូតមកដល់ថ្ងៃនេះ តុលាការបានបញ្ជូនសំណុំរឿងទៅដល់ដៃចៅក្រមស៊ើប និងបានឃុំខ្លួនជនជាប់ចោទទាំង៣នាក់នោះជាបណ្ដោះអាសន្នទៅតាមនីតិវិធី ដើម្បីឈានដល់ការជំនុំជម្រះក្តី។
លោកមានប្រសាសន៍ថា៖ «បើស៊ើបអង្កេត វាមានថេរវេលារបស់វា ព្រោះមានចែងនៅក្នុងច្បាប់។ បើសិនជាសំណុំរឿងហ្នឹង យើងស៊ើបអង្កេតមូលហើយ យើងបញ្ជូនទៅជម្រះហើយ»។
តាមមាត្រា៥ និងមាត្រា១១ នៃច្បាប់ស្តីពី «វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត» ចែងថា បុគ្គលដែលមិនអនុវត្តតាមវិធានការសុខាភិបាល វិធានការរដ្ឋបាល ឬវិធានការផ្សេងទៀតដែលត្រូវដាក់ចេញដោយស្របច្បាប់នេះ ត្រូវផ្តន្ទាទោសដាក់ពន្ធនាគារពី៦ខែ ទៅ៣ឆ្នាំ និងពិន័យជាប្រាក់ពី ២ ០០០ ០០០រៀល ទៅ១០ ០០០ ០០០រៀល។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត សង្កេតឃើញថា ការអនុវត្តច្បាប់របស់សមត្ថកិច្ចលើអ្នកដែលល្មើសបម្រាមរដ្ឋាភិបាល ជាពិសេសកងកម្លាំងរបស់រដ្ឋ ក្រោមរូបភាពដកឋានន្តរសក្តិនិងលុបឈ្មោះចេញពីក្របខណ្ឌ បានកើតឡើងជាបន្តបន្ទាប់។
លោកបន្តថា ការអនុវត្តច្បាប់លើអ្នកដែលល្មើសបម្រាមរដ្ឋាភិបាលដោយមិនប្រកាន់បក្ខពួកនោះ ជាគំរូល្អមួយដើម្បីកុំឱ្យអ្នកផ្សេងប្រព្រឹត្តអំពើល្មើសបន្តទៀត និងនាំឱ្យការទប់ស្កាត់ការឆ្លងរាលដាលនៃជំងឺកូវីដ-១៩ ទទួលបានប្រសិទ្ធភាពខ្ពស់។
លោកមានប្រសាសន៍ថា៖ «ព្រោះការអនុវត្តជាទូទៅ ជាពិសេសមន្ត្រីរាជការ កងកម្លាំងប្រដាប់អាវុធ ត្រូវតែអនុវត្តមុនគេ។ បើសិនជាអនុវត្តជាទូទៅ វិធានការនេះ ជាការបង្ហាញសាច់ដុំមួយថា អ្នកដែលល្មើសគឺអាចនឹងត្រូវអនុវត្តតាមច្បាប់ ទោះបីជាកងកម្លាំងក៏ដោយ»។
បើតាមអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា គិតត្រឹមថ្ងៃទី២២ ខែមេសា ឆ្នាំ២០២១ សមត្ថកិច្ចក៏បានឃាត់ខ្លួនមនុស្សចំនួន២៣៦នាក់ដែលបានល្មើសទៅនឹងបម្រាមបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល ដោយក្នុងចំណោមនោះមាន៦នាក់ត្រូវបានតុលាការចេញដីកាឃុំខ្លួន៕
