អាជ្ញាធរខេត្តកណ្ដាល ឱ្យដឹងថា កម្មករ-កម្មការិនីជាង២០០នាក់បម្រើការងារនៅរោងចក្រ ស្តារម៉ាស្ទ័រ & ហ្វ្រែង និងរោងចក្រ ប៊ូវឃ័រ ហ្គាមេនហ្វេកថូរី (BOWKER GARMENT FACTORY) នៅស្រុកអង្គស្នួល មានវិជ្ជមានជំងឺកូវីដ-១៩។
អភិបាលខេត្តកណ្ដាល លោក គង់ សោភ័ណ្ឌ ប្រាប់ វីអូឌី នៅថ្ងៃអង្គារនេះថា អាជ្ញាធរបានសម្រេចបិទរោងចក្រដែលមានកម្មករឆ្លងជំងឺកូវីដ-១៩ បណ្ដោះអាសន្ន និងបានឱ្យកម្មករទៅធ្វើចត្តាឡីស័កនៅផ្ទះរបស់ពួកគាត់ ដោយមានការឃ្លាំមើលពីអាជ្ញាធរមូលដ្ឋានផងដែរ។
លោក គង់ សោភ័ណ្ឌ បន្តថា បច្ចុប្បន្ន អាជ្ញាធរនិងមន្រី្តសុខាភិបាលកំពុងស្វែងរកនិងប្រមូលយកសំណាករបស់កម្មករ ដែលពាក់ព័ន្ធនឹងអ្នកជំងឺទៅធ្វើតេស្តរកមេរោគកូវីដ-១៩ ជាបន្តបន្ទាប់ទៀត។
លោកបន្តថា៖ «យើងកំពុងយកសំណាកទៅធ្វើតេស្តបន្តបន្ទាប់ ដោយសារគាត់ឆ្លងតាមរយៈក្រុមគ្រួសារគាត់ ហើយក្រុមគ្រួសារក៏ឆ្លងមកគាត់ ហើយបន្ទាប់មកគាត់ក៏បានមកធ្វើការនៅរោងចក្រ ក៏ប្រឈមនឹងហានិភ័យខ្ពស់ បញ្ហាហ្នឹងអ៊ីចឹងទៅ»។
បើតាមអភិបាលខេត្តកណ្តាល រោងចក្រដែលកំពុងមានកម្មករឆ្លងជំងឺកូវីដ-១៩ គឺនៅស្រុកអង្គស្នួល ស្រុកមុខកំពូល និងស្រុកខ្សាច់កណ្ដាល។ លោកថា បច្ចុប្បន្ន អាជ្ញាធរនិងមន្ត្រីសុខាភិបាលបានប្រមូលយកសំណាកកម្មកររោងចក្រទាំងអស់នោះទៅធ្វើតេស្តរកមេរោគកូវីដ-១៩ ប៉ុន្តែលោកមិនទាន់ដឹងប្រាកដថាមានកម្មករចំនួនប៉ុន្មាននាក់ឆ្លងជំងឺនេះនៅឡើយទេ។
ប្រធានមន្ទីរសុខាភិបាលខេត្តកណ្ដាល លោក គួយ ប៊ុនធឿន មានប្រសាសន៍ថា មន្ត្រីសុខាភិបាលបានធ្វើតេស្តសំណាកលើកម្មករបម្រើការងាររោងចក្រ ស្តារម៉ាស្ទ័រ & ហ្វ្រែង ចំនួន១ ០១៣នាក់ ក្នុងនោះរកឃើញមានវិជ្ជមានកូវីដ-១៩ ចំនួន២២៨នាក់។
ចំណែនៅរោងចក្រ ប៊ូវឃ័រ វិញ លោកថា មន្ត្រីសុខាភិបាលបានធ្វើតេស្តលើកម្មករចំនួន២០០នាក់ ដោយរកឃើញវិជ្ជមានកូវីដ-១៩ លើកម្មករ៩នាក់ ខណៈកម្មករជាង៣ ០០០នាក់ (៣ ៧១៨នាក់) ទៀត មិនទាន់ធ្វើតេស្តនៅឡើយ។
លោកថា៖ «អ្វីដែលយើងបានទទួលព័ត៌មាន កម្មករនៅផ្ទះជួលគាត់កើត [កូវីដ-១៩] ហើយគាត់ប៉ះពាល់គ្នាតាមរយៈមធ្យោបាយធ្វើដំណើរ គាត់ជិះឡានរួមគ្នាអ៊ីចឹងទៅ។ យើងបានទទួលព័ត៌មានពីអាជ្ញាធរ ឡានដឹកកម្មករពីរោងចក្រមួយទៅរោងចក្រមួយ មានន័យថា កម្មករគាត់ជិះឡានទៅ ហើយគាត់ចុះតាមរោងចក្រផ្សេងៗគ្នាអ៊ីចឹងទៅ អ៊ីចឹងគាត់ប្រើប្រាស់មធ្យោបាយរួមគ្នាអ៊ីចឹងទៅ វាជាកត្តាមួយឆ្លង»។
ប្រធានមន្ទីរសុខាភិបាលរូបនេះបន្តថា បច្ចុប្បន្ន អាជ្ញាធរនិងមន្ត្រីសុខាភិបាលគ្រោងនឹងធ្វើតេស្តដោយឧបករណ៍តេស្តរហ័សលើកម្មករជាង៤០រោងចក្រទៀត ដើម្បីស្វែងរកវីរុសកូវីដ-១៩។
ប្រធានសហភាពការងារកម្ពុជា លោក អាត់ ធន់ បង្ហាញក្ដីបារម្ភចំពោះជីវភាពនិងសុវត្ថិភាពរបស់កម្មករ ដោយសារបច្ចុប្បន្ន ទោះបីជាជំងឺកូវីដ-១៩ កំពុងឆ្លងរីករាលដាលក្ដី ប៉ុន្តែកម្មករនៅតែមិនអាចរក្សាគម្លាតបាន ដោយមានការទទួលទានអាហារជុំគ្នា និងប្រើប្រាស់បង្គន់រួមគ្នានៅផ្ទះជួល ជាដើម ដែលធ្វើឱ្យពួកគាត់ប្រឈមនឹងឆ្លងជំងឺកូវីដ-១៩។
លោកថា៖ «នៅក្នុងពេលនេះ គឺយើងបារម្ភវារីករាលដាលនៅក្នុងទីក្រុងភ្នំពេញ ឥលូវមានចូលនៅក្នុងអង្គស្នួល ខេត្តកណ្ដាល ហើយក្នុងទម្រង់ធំបែបនេះ ខ្ញុំគិតថា វាអាចនឹងប៉ះពាល់ ព្រោះកម្មករម្នាក់គាត់មិនមែនស្នាក់នៅក្រុមហ៊ុនមួយទេ។ អ៊ីចឹងកម្មកររាប់រយនាក់ គាត់អាចស្នាក់នៅរាប់រយកន្លែងដែរ អ៊ីចឹងខ្ញុំគិតថា វាជាប់ពាក់ព័ន្ធគ្នាច្រើន។ អ៊ីចឹងខ្ញុំគិតថា អាជ្ញាធរគួរតែតាមដានមើលអ្នកជាប់ពាក់ព័ន្ធ ដើម្បីយកសំណាកនិងផ្អាកដំណើររោងចក្រជាបណ្ដោះអាសន្ន ទើបដោះស្រាយបាន»។
កម្ពុជាបានរកឃើញអ្នកវិជ្ជមានកូវីដ-១៩ ទូទាំងប្រទេសសរុបចំនួន១១ ០៦៣នាក់ ក្នុងនោះ អ្នកពាក់ព័ន្ធនឹងព្រឹត្តិការណ៍សហគមន៍២០កុម្ភៈ មានចំនួន១០ ៥១៣នាក់ និងស្លាប់ចំនួន៨២នាក់ គិតត្រឹមព្រឹកថ្ងៃទី២៧ ខែមេសា ឆ្នាំ២០២១។ ដោយឡែក អ្នកជាសះស្បើយសរុបមាន៣ ៧០៤នាក់ រីឯអ្នកជំងឺចំនួន៧ ២៧០នាក់កំពុងសម្រាកព្យាបាលនិងរង់ចាំកន្លែងសម្រាកព្យាបាលនៅឡើយ៕
