ក្រសួងសុខាភិបាលបានប្រកាសពីករណីអ្នកជំងឺ៦នាក់ទៀតបានស្លាប់ដោយវីរុសកូវីដ-១៩ និងបន្តរកឃើញអ្នកឆ្លងថ្មីចំនួនជិត៧០០នាក់ ខណៈអ្នកជំងឺព្យាបាលឱ្យជាសះស្បើយមានចំនួនជិត១ ០០០នាក់។
សេចក្ដីប្រកាសព័ត៌មានរបស់ក្រសួងសុខាភិបាលចេញផ្សាយនៅយប់នៅថ្ងៃទី២៨ ខែមេសា ឆ្នាំ២០២១ បញ្ជាក់ថា អ្នកឆ្លងជំងឺកូវីដ-១៩ថ្មីមានចំនួន៦៩៨នាក់ និងជាសះស្បើយចំនួន៩៩៤នាក់ ដែលជាចំនួននៃការរកឃើញឆ្លងនិងជាសះស្បើយច្រើនជាងគេ ចាប់តាំងពីមានការផ្ទុះជំងឺផ្លូវដង្ហើមមួយនេះនៅកម្ពុជាមក។
ក្រសួងបន្តថា ក្នុងចំណោមអ្នកឆ្លងទាំង៦៩៨នាក់ គឺមានតែម្នាក់ប៉ុណ្ណោះដែលជាករណីនាំចូលពីក្រៅប្រទេស ក្រៅពីនេះជាអ្នកពាក់ព័ន្ធក្នុងព្រឹត្តិការណ៍សហគមន៍២០កុម្ភៈទាំងអស់។ អ្នកជំងឺទាំងនោះ រួមមាន នៅរាជធានីភ្នំពេញ ៥៨៨នាក់, ខេត្តកណ្តាល ៧២នាក់, បន្ទាយមានជ័យ ៤៣នាក់, ខេត្តព្រះសីហនុ ១៦នាក់, កំពង់ស្ពឺ ៣នាក់, តាកែវ ៣នាក់, និងខេត្តពោធិ៍សាត់ ២នាក់។
ក្រៅពីករណីរកឃើញឆ្លងថ្មី និងករណីជាសះស្បើយ ក្រសួងសុខាភិបាលក៏បានបញ្ជាក់ពីករណីអ្នកជំងឺចំនួន៦នាក់ជាជនជាតិខ្មែរ រួមមាន ស្ត្រី២នាក់ និងបុរស៤នាក់ មានវ័យចន្លោះពី៣៧ឆ្នាំ ដល់៩៣ឆ្នាំ បានស្លាប់ដោយសាររោគផ្លូវដង្ហើមមួយនេះ។
អ្នកជំងឺទាំង៦នាក់ ក្រសួងបញ្ជាក់ថា ស្លាប់ដោយសារបញ្ហាផ្លូវដង្ហើមនិងរលាកសួតទាំងសងខាងធ្ងន់ធ្ងរបង្កឡើងដោយវីរុសកូវីដ-១៩ និងអ្នកជំងឺខ្លះមានរោគប្រចាំកាយផងដែរ។
កម្ពុជាបានរកឃើញអ្នកឆ្លងសរុបចំនួន១១ ៧៦១នាក់ ក្នុងនោះករណីសហគមន៍២០កុម្ភៈ មានចំនួន១១ ២១០នាក់ និងស្លាប់មានចំនួនកើតឡើងដល់៨៨នាក់ គិតត្រឹមថ្ងៃទី២៨ ខែមេសា ឆ្នាំ២០២១នេះ។ ចំណែកអ្នកជាសះស្បើយមានចំនួន៤ ៦៩៨នាក់ ហើយអ្នកជំងឺចំនួន៦ ៩៦៨នាក់កំពុងសម្រាកព្យាបាលនៅឡើយ៕
