មន្ត្រីបរិស្ថានខេត្តមណ្ឌលគិរី ឱ្យដឹងថា រយៈពេល៤ខែក្នុងឆ្នាំ២០២១នេះ មន្ត្រីបរិស្ថានបានចាប់ខ្លួនពលរដ្ឋជាង១០នាក់ បញ្ជូនទៅសាលាដំបូងខេត្ត ពាក់ព័ន្ធនឹងករណីកាប់ទន្ទ្រានដីព្រៃក្នុងតំបន់ការពារ។
ប្រធានមន្ទីរបរិស្ថានខេត្តមណ្ឌលគិរី លោក កែវ សុភ័គ មានប្រសាសន៍នៅថ្ងៃទី២៩ ខែមេសា ឆ្នាំ២០២១នេះថា ពលរដ្ឋដែលកាប់ឆ្ការរុករានដីព្រៃខុសច្បាប់ ដែលសមត្ថកិច្ចបានចាប់បញ្ជូនខ្លួននិងកសាងសំណុំរឿងទៅតុលាការក្នុងរយៈពេល៤ខែមកនេះ ភាគច្រើនជាពលរដ្ឋចំណាកស្រុកដែលមកស៊ីឈ្នួលឱ្យគេ និងអ្នកខ្លះកាប់រានធ្វើជាកម្មសិទ្ធិរបស់ខ្លួនឯង។
លោកថា៖ «ពួកគាត់ជាអ្នកស៊ីឈ្នួលកាប់ឱ្យគេអ៊ីចឹង ប៉ុន្តែក្នុងបទល្មើសជាក់ស្ដែងក៏ត្រូវទទួលខុសត្រូវដែរ។ តែទន្ទឹមនោះ ខ្ញុំក៏បានចាត់វិធានការអ្នកនៅពីក្រោយរួចហើយដែរ»។
ប្រធានមន្ទីរបរិស្ថានរូបនេះបន្តថា កាលពីថ្ងៃទី២៧ ខែមេសានេះ មន្ត្រីបរិស្ថានក៏បានឃាត់ខ្លួនពលរដ្ឋ៤នាក់នៅចំណុចភូមិអូរណា ឃុំស្រែខ្ទុម ស្រុកកែវសីមា ខណៈដែលពួកគេបានកាប់គាស់ រុករានដីព្រៃ ដើម្បីដាំដំឡូងមី។ លោកបន្តថា ក្រោយការសាកសួររួច មន្ត្រីបរិស្ថានបានបញ្ជូនពលរដ្ឋទាំងនោះទៅតុលាការដើម្បីបន្តនីតិវិធី។
អ្នកនាំពាក្យសាលាដំបូងខេត្តមណ្ឌលគិរី លោក មាស ប្រុស មានប្រសាសន៍ថា ពលរដ្ឋទាំង៤នាក់នោះត្រូវបានតុលាការសម្រេចឃុំខ្លួនដាក់ពន្ធនាគារជាបណ្ដោះអាសន្ន ពាក់ព័ន្ធនឹងការកាប់រានដីព្រៃរបស់រដ្ឋខុសច្បាប់។
លោកថា៖ «ទើបឃុំខ្លួនទេ! ទាល់ចៅក្រមជម្រះទើបដាក់កំណត់ទោសបាន។ ឥលូវឃុំខ្លួន ដើម្បីធ្វើការស៊ើបអង្កេត អត់បានចាំមាត្រាទេ ប៉ុន្តែដឹងតែឃុំខ្លួនតាំងពីម្សិលម៉្លេះ»។
អ្នកសម្របសម្រួលផ្នែកសិទ្ធិមនុស្ស ដីធ្លី និងព្រៃឈើនៃបណ្ដាញសហគមន៍ជនជាតិដើមភាគតិចខេត្តមណ្ឌលគិរី លោក គ្រើង តុលា សង្កេតឃើញថា មន្ត្រីបរិស្ថានចាប់ខ្លួនតែប្រជាពលរដ្ឋក្រីក្រដែលមិនមានដីសម្រាប់អាស្រ័យផលនិងអ្នកស៊ីឈ្នួលគេតែប៉ុណ្ណោះ ប៉ុន្តែសម្រាប់អ្នកមានអំណាចនិងមនុស្សមួយចំនួនទៀតដែលជាអ្នកនៅពីក្រោយ និងកាប់ទន្ទ្រានយកដីរដ្ឋក្នុងតំបន់ការពារនោះ អាជ្ញាធរមិនបានចាត់វិធានការឡើយ។
លោកថា៖ «ការអនុវត្តច្បាប់របស់គាត់ យើងគាំទ្រ! ដោយមានវិធានការច្បាប់ឬឃាត់ យើងគាំទ្រ! ប៉ុន្តែយើងចង់ឃើញឱ្យមន្ត្រីបរិស្ថាននិងមន្ត្រីឧទ្យានុរក្ស ឬ អង្គការ WCS និង WWF ឱ្យគាត់ឃាត់ទៅចាប់ឧកញ៉ា ឬអ្នកមានៗ ឱ្យដូចចាប់ខ្លួនពលរដ្ឋដូចគ្នា យើងចង់បានអ៊ីចឹង! យើងឃើញថា ការទប់ស្កាត់ហ្នឹងមិនមានប្រសិទ្ធភាពទេ គាត់ទប់ស្កាត់ជនក្រីក្រអ្នកដែលខ្វះខាត អ្នកដែលធំៗគាត់អត់ទប់ស្កាត់ទេ អ្នកដែលបំផ្លាញព្រៃឈើ អត់ដែលឃើញចាប់ទេ»។
មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមការពារសិទ្ធិមនុស្សអាដហុក លោក ប៉ែន ប៊ុណ្ណារ៍ គាំទ្រចំពោះការចាត់វិធានការច្បាប់ទៅលើអ្នកកាប់រុករានដីព្រៃរបស់រដ្ឋ ប៉ុន្តែជំរុញឱ្យក្រសួងបរិស្ថាននិងអាជ្ញាធរពាក់ព័ន្ធអនុវត្តនិងចាត់វិធានការនេះឱ្យមានតម្លាភាព ខណៈលោកសង្កេតឃើញថា ការចាត់វិធានការច្បាប់របស់ក្រសួងនិងអាជ្ញាធរធ្វើឡើងមានស្តង់ដារពីរ។
លោកថា៖ «ប្រជាពលរដ្ឋយើងទន់ខ្សោយជាអ្នករងគ្រោះ ផលប្រយោជន៍ធំបានទៅលើអ្នកមានអំណាច។ យើងបានឃើញហើយកន្លងមក អ្នកមានដីធំៗមិនមែនប្រជាពលរដ្ឋក្រីក្រណា! ហើយដីរាប់រយរាប់ពាន់ហិកតា ទៅសួរជារបស់អ្នកមានអំណាច ឧកញ៉ា ហើយប្រភពដើមដីហ្នឹងជាដីគម្របព្រៃឈើហ្នឹង។ ហេតុអីកាប់រាប់រយរាប់ពាន់ហិកតា នៅតែអត់មានទោស? ហើយពេលខ្លះមានចេញប្លង់កម្មសិទ្ធិឱ្យទៀត»។
យោងតាមរបាយការណ៍របស់ក្រសួងបរិស្ថាន ដែលបានផ្សព្វផ្សាយកាលពីថ្ងៃទី១៣ ខែមករា ឆ្នាំ២០២១ ឱ្យដឹងថា នៅឆ្នាំ២០២០ មន្ត្រីឧទ្យានុរក្សបានបង្ក្រាបបទល្មើសធនធានធម្មជាតិទូទាំងប្រទេសបានចំនួន៨ ៩១៧ករណី ដែលការបង្ក្រាបនេះមានការកើនឡើងចំនួន៣ ៤៤២ករណី ឬស្មើប្រមាណ៣០% បើធៀបនឹងឆ្នាំ២០១៩ ដែលបង្ក្រាបបានតែ៥ ៤៧៥ករណី។
ក្រសួងបន្តថា បទល្មើសដែលបង្ក្រាបបានភាគច្រើនជាបទល្មើសលួចកាប់ឈើ ការរុករានទន្ទ្រានកាន់កាប់ដីព្រៃខុសច្បាប់ ការបរបាញ់សត្វ និងការដាក់អន្ទាក់ចាប់សត្វ ជាដើម៕
