ប្រជាពលរដ្ឋមួយចំនួនដែលស្ថិតនៅ«តំបន់ក្រហម»ក្នុងភូមិសាស្ត្ររាជធានីភ្នំពេញ បានស្នើទៅរដ្ឋាភិបាលឱ្យពន្លឿនការផ្តល់ជំនួយជាស្បៀងអាហារដល់ពួកគាត់ និងស្នើមីក្រូហិរញ្ញវត្ថុឬធនាគារពន្យារពេលដល់ពួកគាត់បង់ប្រាក់បំណុលក្នុងអំឡុងពេលជួបស្ថានភាពដ៏លំបាកនេះ។
ក្នុងសេចក្តីសម្រេចរបស់រដ្ឋបាលរាជធានីភ្នំពេញ ចុះថ្ងៃទី២៧ ខែមេសា ឆ្នាំ២០២១នេះ បានលើកឡើងថា ភូមិសាស្ត្រមួយចំនួនក្នុងរាជធានីភ្នំពេញ ត្រូវបានកំណត់ជា៣តំបន់ រួមមាន «តំបន់ក្រហម» ដែលមានការឆ្លងរាលដាលធ្ងន់ធ្ងរនៃជំងឺកូវីដ-១៩ «តំបន់លឿងទុំ» មានការឆ្លងរាលដាលកម្រិតមធ្យមនៃជំងឺកូវីដ-១៩ និង «តំបន់លឿង» មានការឆ្លងរាលដាលជំងឺកូវីដ-១៩ កម្រិតស្រាល។
តំបន់ក្រហម ដែលរដ្ឋបាលរាជធានីភ្នំពេញ បានកំណត់បិទមិនឱ្យធ្វើចរាចរចេញ-ចូលនោះ រួមមាន ភូមិ១៤ ភូមិ១៦ ភូមិ១៧ សង្កាត់បឹងសាឡាង ខណ្ឌទួលគោក, ភូមិប្រការ សង្កាត់ព្រៃស និង ភូមិម័ល ភូមិថ្មី ភូមិសំបូរ សង្កាត់ដង្កោ ខណ្ឌដង្កោ, សង្កាត់ស្ទឹងមានជ័យទី១, សង្កាត់ស្ទឹងមានជ័យទី២, សង្កាត់ស្ទឹងមានជ័យទី៣ និងសង្កាត់បឹងទំពន់ទី១ ខណ្ឌមានជ័យ, សង្កាត់ទួលសង្កែទី១ ខណ្ឌឫស្សីកែវ និង សង្កាត់ចោមចៅទី១ ខណ្ឌពោធិ៍សែនជ័យ ជាដើម។
អ្នកស្រី ហុក ដាវី អះអាងថាកំពុងស្នាក់នៅបន្ទប់ជួល ស្ថិតនៅក្នុងសង្កាត់ដង្កោ ខណ្ឌដង្កោ ដែលជាតំបន់ក្រហម និយាយថា គាត់បានផ្ញើសារតាមប្រព័ន្ធតេឡេក្រាមទៅគណៈកម្មការជាតិគ្រប់គ្រង និងដឹកនាំការអនុវត្តវិធានការបិទខ្ទប់ «គ.ប.ខ» ជាង២០ថ្ងៃហើយ ប៉ុន្តែមិនទាន់ទទួលអំណោយពីរដ្ឋាភិបាលនៅឡើយ។
អ្នកស្រីបញ្ជាក់ថា បើរដ្ឋាភិបាលមិនពន្លឿនការផ្តល់ស្បៀងដល់ពួកគាត់ជិត៥០គ្រួសារឱ្យបានទាន់ពេលទេ នឹងធ្វើឱ្យពួកគាត់ជួបបញ្ហាប្រឈមច្រើន ជាពិសេសបញ្ហាសុខភាព។
អ្នកស្រីនិយាយថា៖ «ពេលដែលអត់មានអ្វីហូបគ្រប់គ្រាន់ វាធ្វើឱ្យសុខភាពយើងចុះខ្សោយ។ និយាយទៅ ខ្ញុំអត់ [មានអ្វីហូបគ្រប់គ្រាន់] មួយរយៈហ្នឹង សុខភាពខ្ញុំខ្សោយខ្លាំង ស្រកគីឡូដែរ»។
អ្នកស្រី សី សំអុល អះអាងថាជាកម្មការិនីនៅរោងចក្រស្ទឹងមានជ័យ ស្នាក់នៅផ្ទះជួលក្នុងភូមិព្នៀត សង្កាត់ស្ទឹងមានជ័យ ខណ្ឌមានជ័យ ដែលកំពុងស្ថិតនៅក្នុងតំបន់ក្រហមដែរនោះ និយាយថា ក្រោយពីរដ្ឋាភិបាលប្រកាសបន្តបិទខ្ទប់តំបន់ក្រហម រយៈពេល៧ថ្ងៃបន្ថែមទៀត រហូតដល់ថ្ងៃទី៥ ខែឧសភានេះ ធ្វើឱ្យពួកគាត់កាន់តែជួបបញ្ហាប្រឈមខ្វះខាតស្បៀងអាហារប្រចាំថ្ងៃ។
អ្នកស្រីបន្តថា បញ្ហាប្រឈមមួយទៀតគឺខ្វះថវិកាបង់ថ្លៃបន្ទប់ជួលនិងបង់ធនាគារ ដែលករណីនេះ អ្នកស្រីស្នើសុំឱ្យខាងធនាគារពន្យារពេលដល់ពួកគាត់ក្នុងការបង់ប្រាក់ត្រឡប់ផងដែរ។
អ្នកស្រីនិយាយដូច្នេះថា៖ «កំពុងជាប់ឃុំនៅតំបន់ក្រហម ដែលកំពុងខ្វះខាតខ្លាំង អត់បានធ្វើការ ហើយ [ត្រូវបង់] ថ្លៃធនាគារ ថ្លែជួលផ្ទះទៀត បើខ្ញុំជួលផ្ទះគេហ្នឹង ហើយខ្ញុំធ្វើការរោងចក្រ និយាយទៅបងដឹងហើយ អ្នកធ្វើការរោងចក្រ បើអត់មានការងារធ្វើ អត់ [មានលុយ] ហើយ»។
កម្មការិនីរោងចក្រម្នាក់ទៀត អ្នកស្រី មិន ស្រីនិច្ច ដែលស្នាក់នៅភូមិបុរីកម្មករ សង្កាត់ជើងឯក ខណ្ឌដង្កោ និយាយថា កន្លែងគាត់ត្រូវបានអាជ្ញាធរបិទចាប់ពីថ្ងៃទី១៣ ខែមេសា មកដល់បច្ចុប្បន្ននេះ ធ្វើឱ្យពួកគាត់ខ្វះខាតស្បៀង បើទោះបីជាស្នើសុំទៅគណៈកម្មការ «គ.ប.ខ» ក៏មិនទាន់ទទួលបានស្បៀងនៅឡើយ។
ករណីនេះ អ្នកស្រីអំពាវនាវទៅរដ្ឋាភិបាលជួយពន្លឿនការផ្តល់ស្បៀងជូនពួកគាត់ឱ្យបានឆាប់ ដើម្បីឱ្យពួកគេដោះស្រាយបញ្ហាប្រឈមក្នុងគ្រាលំបាកនេះ ទម្រាំស្ថានភាពវិលទៅរកភាពប្រក្រតីវិញ។
អ្នកស្រីអំពាវនាវដូច្នេះថា៖ «ពីមុនមក ខ្ញុំហូបបបររហូតមក បើខ្ញុំហូបឆ្ងាញ់ដូចគេ ខ្ញុំអត់មានលុយទប់ទល់។ ឥលូវខ្ញុំអស់មែនទែនហើយ ខ្ញុំចង់ឱ្យរដ្ឋាភិបាលជួយខ្ញុំ តែដោះស្រាយអាហារហូបចុកខ្ញុំតែប៉ុណ្ណឹងទេ ខ្ញុំខ្វះខាតអាហារហូបចុក ណាមួយខ្ញុំចេញទៅណាអត់បាន ឥលូវរហូតមកដល់ពេលនេះ ខ្ញុំអត់ទាន់មានអ្វី ខ្ញុំខ្វះខាតអាហារហូបចុកហ្នឹង»។
វីអូឌី មិនអាចសុំការបញ្ជាក់ពីអភិបាលរាជធានីភ្នំពេញ លោក ឃួង ស្រេង និងអ្នកនាំពាក្យសាលារាជធានីភ្នំពេញ លោក ម៉េត មាសភក្តី បានទេ ដោយលោកថាជាប់រវល់ប្រជុំ។
យ៉ាងណា ប្រធាននាយកដ្ឋានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុកម្ពុជា លោក កាំង តុងងី មានប្រសាសន៍ថា អ្នកដែលស្ថិតនៅតំបន់បិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល ជាពិសេសនៅតំបន់ក្រហម លោកមិនលើកទឹកចិត្តឱ្យចេញមកក្រៅ ដើម្បីបង់ប្រាក់ទៅមីក្រូហិរញ្ញវត្ថុនិងធនាគារនោះទេ។ ប៉ុន្តែលោកថា បើអ្នកមានលទ្ធភាពអាចជួយបង់តាមរយៈប្រព័ន្ធទូរសព្ទ ដើម្បីកាត់បន្ថយការឆ្លងរាលដាលនៃជំងឺកូវីដ-១៩។
មួយវិញទៀត លោកបញ្ជាក់ថា ចំពោះអតិថិជនស្ថិតនៅតំបន់ក្រហមដែលមិនមានលទ្ធភាពបង់ អាចស្នើទៅមីក្រូហិរញ្ញវត្ថុដែលខ្លួនខ្ចីនោះ ដើម្បីពន្យារការបង់រម្លស់ដើមនិងការប្រាក់ ឬតាមលក្ខខណ្ឌផ្សេងៗទៀតតាមការព្រមព្រៀងគ្នាជាដើម។
លោកផ្តល់ជាយោបល់ថា៖ «បើសិនជាគាត់រងផលប៉ះពាល់មែន យើងផ្តល់ជូនការរៀបចំឥណទានឡើងវិញ ហើយការរៀបចំឥណទានឡើងវិញមានជម្រើស ៣ ដែលគាត់ត្រូវយក ករណីខ្លះគាត់សុំបង់តែការប្រាក់រយៈពេល៣ទៅ៦ខែ ករណីខ្លះគាត់សុំពន្យារឥណទាន អញ្ចឹងឥណទានដែលគាត់ធ្លាប់ខ្ចី១ឆ្នាំ គាត់អាចពន្យារទៅ២ឆ្នាំ និងករណីដែលគាត់រងផលប៉ះពាល់ធ្ងន់ធ្ងរមែនទែន យើងអនុញ្ញាតឱ្យគាត់ផ្អាកបង់ទាំងដើម ផ្អាកបង់ទាំងការ ក្នុងរយៈពេល៣ទៅ៦ខែ»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា រដ្ឋាភិបាលត្រូវពន្លឿនផ្តល់ស្បៀងជូនពលរដ្ឋ ជាពិសេសកម្មករនិងអ្នកប្រកបរបរសេដ្ឋកិច្ចក្រៅប្រព័ន្ធឱ្យបានទាន់ពេលវេលា ទើបទប់ស្កាត់ការឆ្លងរាលដាលនៃជំងឺកូវីដ-១៩ ទទួលបានផលវិជ្ជមាន។
លោកមានប្រសាសន៍ថា៖ «ជំនួយសង្គ្រោះបន្ទាន់សម្រាប់ការខ្វះខាតរបស់ [ពលរដ្ឋ កម្មករ] គឺថា សំណូមពរធ្វើម៉េចដំណើរការទៅវាលឿន ដើម្បីឱ្យពួកគាត់ទទួលបានជំនួយ វាក៏ជាការចូលរួមចំណែកទប់ស្កាត់ជំងឺកូវីដ-១៩»។
លោក អំ សំអាត បន្ថែមថា ដំណាក់កាលនេះ គ្រឹះស្ថានសមាគមមីក្រូហិរញ្ញវត្ថុ និងសមាគមធនាគារ គួរឱ្យបុគ្គលិករបស់ខ្លួនផ្អាកទូរសព្ទទារលុយពីកូនបំណុល ឬផ្អាកបង់រម្លាស់ទាំងដើមនិងការ ដល់ពលរដ្ឋដែលកំពុងជួបបញ្ហាប្រឈមនៅតំបន់ក្រហម ខណៈពួកគេ ជាពិសេសកម្មករនិងអ្នកប្រកបរបរក្រៅប្រព័ន្ធកំពុងបាត់បង់ចំណូលនាអំឡុងពេលបិទខ្ទប់នេះ ដើម្បីកុំឱ្យពួកគេព្រួយបារម្ភពីបញ្ហាត្រូវសងបំណុលទៅមីក្រូហិរញ្ញវត្ថុនិងធនាគារនោះ៕