កម្មករមួយចំនួនដែលកំពុងបន្តការងារនៅតាមរោងចក្រក្នុងខេត្តបន្ទាយមានជ័យ និងស្វាយរៀង បារម្ភខ្លាចជំងឺកូវីដ-១៩ឆ្លងរាតត្បាតចេញពីតំបន់បិទខ្ទប់ក្បែររោងចក្រទៅកាន់កន្លែងការងាររបស់ពួកគេ ខណៈពួកគេទទួលព័ត៌មានថា មានកម្មករនៅតំបន់បិទខ្ទប់អាចចេញទៅធ្វើការបាន ប៉ុន្តែករណីនេះ ត្រូវអាជ្ញាធរមូលដ្ឋានបដិសេធ។
បើតាមរបាយការណ៍ពីក្រសួងសុខាភិបាល គិតត្រឹមព្រឹកថ្ងៃទី៤ ខែឧសភា ឆ្នាំ២០២១ ករណីវិជ្ជមានកូវីដ-១៩ ក្នុងខេត្តបន្ទាយមានជ័យ សរុបមានចំនួន៦១៦នាក់ ក្នុងនោះ ករណីរកឃើញថ្មី៥១នាក់ ខណៈខេត្តស្វាយរៀងមាន៣១៤ករណី កើនឡើងម្នាក់ នៅថ្ងៃម្សិលមិញ។ របាយការណ៍ដដែលបន្តថា ភាគច្រើននៃករណីឆ្លងទាំងនោះ គឺរកឃើញលើបុគ្គលិកនិងអ្នកពាក់ព័ន្ធនៅមជ្ឈមណ្ឌលកាស៊ីណូក្នុងក្រុងប៉ោយប៉ែត និងបាវិត ដែលនាំឱ្យអាជ្ញាធរបិទខ្ទប់ការធ្វើដំណើរចេញនិងចូលតំបន់ទាំងនោះ។
កម្មករផ្នែកអ៊ុតនៅរោងចក្រផលិតសម្លៀកបំពាក់ ហាយថេក ក្រុងប៉ោយប៉ែត ខេត្តបន្ទាយមានជ័យ លោក ឆោម ភិន ប្រាប់ VOD នៅថ្ងៃទី៣ ខែឧសភា ថា រោងចក្រ ហាយថេក ឋិតនៅចម្ងាយ៣គីឡូម៉ែត្រពីតំបន់បិទខ្ទប់ និងមានកម្មកររាប់រយនាក់ជាប់នៅទីនោះ ហើយមានមួយចំនួនតូចបានគេចចេញពីតំបន់នោះមកធ្វើការ។
លោកថា លោកនិងកម្មករមួយចំនួនមានការបារម្ភខ្លាចអ្នកទាំងនោះបានប៉ះផ្ទាល់ជាមួយអ្នកជំងឺកូវីដ-១៩ ហើយនាំវីរុសមកចម្លងក្នុងរោងចក្រ។ លោកបន្ថែមថា កម្មករមួយចំនួនបានស្នើទៅភាគីរោងចក្រផ្អាកដំណើរការ១៤ថ្ងៃ ដើម្បីបញ្ចៀសហានិភ័យនៃការឆ្លង ប៉ុន្តែត្រូវភាគីរោងចក្របដិសេធ។
លោក ឆាយ ភិន និយាយថា៖ «តំបន់ខាងនេះធ្វើការអីធ្វើទៅ តែសម្រាប់អ្នកដែលនៅតំបន់ក្រហមមិនចង់ឱ្យមានការចូលមក។ ភ័យខ្លាច ចេះតែភ័យខ្លាចអ៊ីចឹងណា។ ខ្លាចមានការឆ្លងរាលដាលដល់រោងចក្រហ្នឹង វាពិបាក វាមិនមែនតែយើងម្នាក់ឯណា បញ្ហាប្រឈមទាំងអស់តែគ្នា»។
បុរសវ័យ៣៩ឆ្នាំ ដែលមានកូន៣នាក់ក្នុងបន្ទុករូបនេះ បន្ថែមថា៖ «ខ្ញុំការពាររហូតដែរហ្នឹង! ពេលដែលកូនបាញ់អាល់កុលដាក់ ហើយចុះពីលើម៉ូតូ ចង់ស្រក់ទឹកភ្នែក អាណិតកូន បើសិនបើយើងម៉េចៗ។ បើសិនជាយើងមានការឆ្លងមែន អាណិតដល់កូននៅផ្ទះ គាត់អត់ដឹងរឿង»។
បុគ្គលិកផ្នែកអ៊ុតនៅរោងចក្រ ហាយថេក លោក ទេព ចាន់គ្រឹះស្នា វ័យ៣៧ឆ្នាំ ឱ្យដឹងថា កម្មករមួយចំនួនបារម្ភខ្លាចឆ្លង ហើយស្នើច្បាប់ឈប់សម្រាកមួយរយៈ បន្ទាប់ពីពួកគេឮថាមានអ្នកនៅតំបន់ក្រហមចូលមកធ្វើការក្នុងរោងចក្រ ប៉ុន្តែខាងរោងចក្រមិនអនុញ្ញាត ដោយសារមិនមានចែងក្នុងច្បាប់។
លោកបន្ថែមថា៖ «ដល់ពេលអ៊ីចឹង តែក្នុងរោងចក្រនេះ គេដឹងក៏គេនាំ គេអត់ឱ្យធ្វើការទេ គេឱ្យទៅកន្លែងធ្វើចត្តាឡីស័ក។ គ្រាន់តែដឹងភ្លាម គេឱ្យទៅភ្លាម។ អ៊ីចឹងគ្នាចេះតែភ័យបារម្ភទៅ អ្នកធ្វើការដែលនៅតំបន់ខៀវ គ្នាចេះតែភ័យបារម្ភអ៊ីចឹងទៅណា ខ្លាចឆ្លង»។
ប្រធានសហជីពចលនាកម្មករប្រចាំរោងចក្រ លោក សាន វុទ្ធី ចាត់ទុកការដែលមានអ្នកនៅតំបន់ក្រហមអាចចេញ-ចូលមកធ្វើការនៅរោងចក្រខាងក្រៅ គឺដោយភាពខ្វះចន្លោះក្នុងការអនុវត្តវិធានការបិទខ្ទប់របស់សមត្ថកិច្ច ដែលនាំឱ្យកម្មករក្នុងរោងចក្រមានការភ័យខ្លាច។
លោកនិយាយថា៖ «ខ្ញុំអត់យល់ពីការអនុវត្តច្បាប់របស់អាជ្ញាធរដែរ ធ្វើឱ្យបុគ្គលិកជាច្រើន ជាង៤ ០០០នាក់មានការព្រួយបារម្ភ ពាក់ព័ន្ធនឹងអ្នកដែលនៅតំបន់បិទខ្ទប់ក្រហមហ្នឹងដែលពួកគាត់អាចមកធ្វើការបាន។ យូរៗទៅ ពួកគាត់ខ្លាចតែគ្នាឯង វាធ្វើឱ្យច្របូកច្របល់»។
ករណីនេះ លោកបានស្នើទៅភាគីរោងចក្រឱ្យផ្អាកដំណើរការចង្វាក់ផលិតកម្មបណ្តោះអាសន្នតាមសំណើរបស់កម្មករ ប៉ុន្តែភាគីរោងចក្របដិសេធ ដោយថា ចង្វាក់ផលិតកម្មឋិតក្នុងដំណាក់កាលមមាញឹកតម្រូវតាមការបញ្ជាទិញ។
លោក សាន វុទ្ធី និយាយថា៖ «យើងពិបាកបង្ខំទៅកាន់ក្រុមហ៊ុនឱ្យគាត់ធ្វើតាមបុគ្គលិក ព្រោះយើងអត់មានសិទ្ធិអំណាចណាទៅបង្គាប់ឱ្យក្រុមហ៊ុនបញ្ឈប់ផលិតភាពរបស់ខ្លួននោះទេ លុះត្រាតែមានលិខិតបទដ្ឋានណាមួយដែលណែនាំពីក្រសួងឬមន្ទីរការងារ ទើបយើងមានសិទ្ធិជំរុញបន្ថែម»។
អធិការរងនគរបាលក្រុងប៉ោយប៉ែតមួយរូបដែលប្រាប់ក្នុងលក្ខខណ្ឌមិនបញ្ចេញឈ្មោះ បានច្រានចោលចំពោះការលើកឡើងថា មានអ្នកនៅក្នុងតំបន់ក្រហមអាចចេញទៅខាងក្រៅបាន។ លោកថា សមត្ថកិច្ចបានដាក់របាំងឃាំងនិងយាមកាម២៤ម៉ោងនៅតាមផ្លូវនិងច្រកចេញចូលតំបន់ហាមឃាត់។
លោកបញ្ជាក់ថា៖ «អាហ្នឹងតំបន់បិទខ្ទប់ យើងអត់បានបង។ តែនៅក្នុងហ្នឹងគឺនៅក្នុងហ្នឹង ចូលអត់ឱ្យចូល ចេញអត់ឱ្យចេញ»។
ដោយឡែក លោក សុខ វឌ្ឍនា កម្មករបម្រើការផ្នែកផលិតនៅរោងចក្រ ML Intimate ក្នុងតំបន់សេដ្ឋកិច្ចពិសេសអូរនាង ខេត្តបន្ទាយមានជ័យ ឱ្យដឹងថា អ្នកគ្រប់គ្រងរោងចក្របានស្នើឱ្យបុគ្គលិកនិងកម្មករទាំងអស់ដែលមានចំនួនសរុបជាង៦០០នាក់ ស្នាក់នៅបន្ទប់ជួលក្បែររោងចក្រ និងចៀសវាងចូលតំបន់ផ្ទុះជំងឺ។
លោកនិយាយថា៖ «មុនហ្នឹង មានអ្នកជួលខាងក្រៅ ប៉ុន្តែទម្រាំមួយរយៈពេលដែលមានបញ្ហាហ្នឹងមក គឺខាងរោងចក្រស្នើឱ្យមកនៅជិតរោងចក្រទាំងអស់ ដើម្បីការពារអាជំងឺហ្នឹង ព្រោះវាកើតនៅកណ្តាលក្រុង»។
យ៉ាងណា លោកថា លោកនៅតែមានការប្រុងប្រយ័ត្ននិងការពារខ្លួនពីជំងឺឆ្លងជានិច្ច ដោយសារលោកមិនអាចមើលដឹងថា នរណាមានផ្ទុកឬមិនមានផ្ទុកនោះទេ។
លោក សុខ វឌ្ឍនា៖ «ព្រោះយើងមើលអត់ឃើញដូចគ្នាអាបញ្ហាហ្នឹង! យើងមិនដឹងអ្នកណាកើត អ្នកណាមិនកើត យើងអត់ដឹងទេណា! អ៊ីចឹងគ្រប់គ្នាត្រូវប្រយ័ត្ន គេប្រកាសឱ្យប្រយ័ត្នៗរាល់ថ្ងៃដែរហ្នឹង ព្រោះអាហ្នឹងវាឆ្លងលឿន»។
ប្រធានសហជីពកម្មករនិយោជិតប្រចាំនៅរោងចក្រ កៅវ៉េ ក្រុងបាវិត ខេត្តស្វាយរៀង លោក ទៀត សំអាត លើកឡើងថា កម្មករនិយោជិតបម្រើការនៅរោងចក្រនេះនៅតែបន្តការងារតាមធម្មតា ហើយពួកគាត់នៅតែធ្វើដំណើរទៅធ្វើការតាមរថយន្តឬរ៉ឺម៉ក។
លោកបន្ថែមថា លោកមានការបារម្ភចំពោះលទ្ធភាពនៃការឆ្លងរាលដាលនៃជំងឺ និងបានណែនាំដល់កម្មករទាំងអស់ឱ្យចេះប្រុងប្រយ័ត្ន និងការពារខ្លួននៅពេលធ្វើដំណើរតាមរថយន្ត និងនៅពេលឋិតនៅទីកន្លែងដែលមានមនុស្សច្រើនកកកុញ។
លោក សំអាត និយាយថា៖ «រោងចក្រគាត់គិតថាប្រហែលជាអត់អ៊ីចឹង ដូចថាដំណើរការធម្មតាអ៊ីចឹង ហើយពីស្ថានភាពពីកម្មករទូទៅនៅរោងចក្រដែលខ្ញុំគ្រប់គ្រងអ៊ីចឹង គឺគាត់សុទ្ធតែអ្នកការពារ ហើយម្នាក់ៗសុទ្ធតែមានអាល់កុល មានអីការពារជាប់ហោប៉ៅអ៊ីចឹង»។
កម្មការិនីផ្នែកបើកអីវ៉ាន់នៅរោងចក្រ កៅ វ៉េ ក្នុងក្រុងបាវិត ឈ្មោះ យ៉ុន ចាន់ស៊ី ប្រាប់ថា គាត់បារម្ភខ្លាចជំងឺឆ្លងពីតំបន់ផ្ទុះ ដោយសារមានអ្នកប៉ះប្រយោលនឹងអ្នកជំងឺដែលធ្វើការនៅកាស៊ីណូ ខណៈគាត់នៅបន្តការងារដោយមិនអាចរក្សាគម្លាតសុវត្ថិភាពបាន។
កម្មការិនីរូបនេះបន្ថែមថា៖ «អ្នកដែលប្រយោលៗប៉ុន្មាន ប្រហែលជាច្រើនដែរ។ មានអ្នកខ្លះគាត់ចូលមកធ្វើការវិញ អត់មានអីទេ។ គ្រាន់តែយើងភ័យខ្លាចៗទៅ ស្រួលមិនស្រួលទៅ ចេះតែការពារៗ ពាក់ម៉ាស បាញ់អាល់កុល លាងដៃ»។
វីអូឌី មិនអាចទាក់ទងអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ និងភាគីតំណាងរោងចក្រទាំងនោះបានទេ នៅថ្ងៃអង្គារនេះ។
ប្រធានសម្ព័ន្ធសហជីពចលនាកម្មករកម្ពុជា លោក គង់ អាទិត្យ លើកឡើងថា ក្នុងកាលៈទេសៈនេះ រដ្ឋាភិបាល ថៅកែរោងចក្រ និងភាគីពាក់ព័ន្ធ អាចនឹងយឺតពេលក្នុងការរួមគ្នាដោះស្រាយបញ្ហាគម្លាតសុវត្ថិភាពនិងគ្រោះថ្នាក់ក្នុងពេលធ្វើដំណើររបស់កម្មកររោងចក្រ ដោយសារបញ្ហានេះត្រូវការប្រើរយៈពេលយូរ។
យ៉ាងណា លោកស្នើដល់ក្រសួងការងារ និងខាងរោងចក្រ គួរតែពង្រឹងវិធានការដាក់ចេញដោយក្រសួងសុខាភិបាលឱ្យមានប្រសិទ្ធភាព ជាពិសេសត្រូវចាត់វិធានការឆ្លើយតបឱ្យបានទាន់ពេលវេលា នៅពេលមានករណីឆ្លងកើតឡើងនៅក្នុងរោងចក្រ។
លោក គង់ អាទិត្យ បន្ថែមថា៖ «តាមដានកុំឱ្យបណ្តោយ! ឧទាហរណ៍ចៃដន្យអីឃើញអ្នកណាម្នាក់ក្តៅខ្លួនអី ក្តៅអ៊ីចឹង យើងកុំទុកប្រហែសដូចរោងចក្រដែលមានបទពិសោធន៍កន្លងមក អាហ្នឹងអ៊ីចឹងហើយ។ បើថាទៅកែប្រព័ន្ធឡាន ទៅកែប្រព័ន្ធអី ឥលូវហ្នឹងទៅកែម៉េចចេញ មានអីត្រូវកែ ឱ្យគាត់ជិះអីគេ?»
កាលពីសប្តាហ៍មុន សហជីពមួយចំនួនបានអំពាវនាវដល់រដ្ឋាភិបាលពិចារណាផ្អាកដំណើរការរោងចក្រសហគ្រាសក្នុងវិស័យកាត់ដេរទាំងអស់ជាបណ្តោះអាសន្ន ដើម្បីកាត់ផ្តាច់រលកចម្លងជំងឺកូវីដ-១៩ ដែលបានឆ្លងរាលដាលដល់រោងចក្រជាង២០០នៅក្នុងរាជធានី-ខេត្តចំនួន៧ ប៉ុន្តែករណីនេះ ត្រូវបានអ្នកនាំពាក្យក្រសួងការងារ ច្រានចោល ដោយថា ការបិទទ្វាររោងចក្រជាបណ្តោះអាសន្ន គឺអាស្រ័យលើករណីឆ្លងក្នុងរោងចក្រនីមួយៗ៕
