មន្ត្រីជាន់ខ្ពស់កងរាជអាវុធហត្ថបានឱ្យដឹងថា ថ្នាក់ដឹកនាំបានសម្រេចបណ្តេញមន្ត្រីកងរាជអាវុធហត្ថម្នាក់ចេញពីក្របខណ្ឌនៃកងយោធពលខេមរភូមិន្ទ ដោយសារល្មើសបម្រាមរដ្ឋាភិបាលបិទខ្ទប់ ព្រោះបានចេញចូលទៅតំបន់ក្រហមឬតំបន់ដែលមានការផ្ទុះកូវីដ-១៩ខ្លាំង ហើយការលុបឈ្មោះចេញពីក្របខណ្ឌនេះគឺជាការព្រមានដល់មន្ត្រីផ្សេងទៀតកុំឱ្យយកគំរូតាម។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី មានប្រសាសន៍ថា កាលពីយប់ថ្ងៃទី៤ ខែឧសភា ឆ្នាំ២០២១នេះ មន្ត្រីយោធិនឬកងរាជអាវុធហត្ថម្នាក់ឈ្មោះ ហម វុទ្ធី មិនបានទៅយាមប្រចាំការគោលដៅ ហើយមិនបានរាយការណ៍សុំច្បាប់ត្រឹមត្រូវទៅថ្នាក់លើរបស់ខ្លួនឡើយ និងបានចេញចូលទៅតំបន់ក្រហមដែលមានការឆ្លងជំងឺកូវីដ-១៩ខ្លាំង ដោយមិនមានការអនុញ្ញាតទៅវិញ។
លោកបន្តថា ដើមចមដែលនាំឱ្យថ្នាក់លើបណ្តេញយោធិនម្នាក់នេះចេញពីក្របខណ្ឌកងទ័ព ដោយសារខ្លាចបុគ្គលនោះ នាំជំងឺឆ្លងកូវីដ-១៩ ចូលមកក្នុងបន្ទាយ ធ្វើឱ្យឆ្លងដល់កងកម្លាំងផ្សេងទៀត ប្រសិនបើរកឃើញវិជ្ជមានកូវីដ-១៩ និងជាសារព្រមានដល់មន្ត្រីផ្សេងទៀតកុំឱ្យយកគំរូតាម។
លោកមានប្រសាសន៍ថា៖ «ត្រូវបណ្តេញគាត់ចេញទាំងយប់ហើយ ចាំយើងបន្តនីតិវិធីបន្ត ព្រោះអីកាលណាបុគ្គលនោះ ឧបមាថាបុគ្គលហ្នឹងពិនិត្យទៅឃើញថាមានកូវីដ-១៩ អញ្ចឹងអ្នកដែលនៅក្នុងបន្ទាយទាំងអស់ ហើយដេកជាមួយគាត់ ត្រូវធ្វើចត្តាឡីសក័អស់ហើយ។ កាលណាធ្វើចត្តាឡីស័កអស់ កម្លាំងរបស់យើងកាន់តែអត់មាន ខើចហើយ យើងត្រូវរក្សាកម្លាំង យើងត្រូវធ្វើម៉ឺងម៉ាត់ ពាក់ព័ន្ធជាមួយនឹងវិន័យ ត្រូវតែអនុវត្ត ដើម្បីកុំឱ្យបុគ្គលផ្សេងទៀតអនុវត្តតាម»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាស៍គាំទ្រនឹងវិធានការបណ្តេញមន្ត្រីក្រោមឱវាទដែលមិនគោរពបម្រាមរដ្ឋាភិបាលនិងក្រសួងសុខាភិបាល ដោយលោកចាត់ទុកការបណ្តេញចេញនេះជាសារមួយព្រមានដល់មន្ត្រីផ្សេងទៀត ត្រូវគោរពតាមវិន័យកងទ័ពនិងបទបញ្ជារបស់ថ្នាក់ដឹកនាំ ជាដើម។
ទោះជាយ៉ាងនេះក្តី លោក អំ សំអាត អំពាវនាវទៅរដ្ឋាភិបាលអនុវត្តច្បាប់លើមន្ត្រីក្រោមឱវាទនោះឱ្យមានតម្លាភាពរវាងមន្ត្រីយោធិនតូចតាច និងមន្ត្រីដែលមានឋានន្តរសក្តិខ្ពស់ជាដើម ទើបរួមគ្នាទប់ស្កាត់ការឆ្លងរាលដាលនៃជំងឺកូវីដ-១៩ ទទួលបានប្រសិទ្ធភាពខ្ពស់។
លោកអំពាវនាវថា៖ «ទាក់ទងនឹងកងកម្លាំងអ្នកដែលអនុវត្ត អ្នកដែលបង្កើនកិច្ចការពារការរីករាលដាលនៃជំងឺកូវីដ-១៩ ត្រូវតែគោរពតាមគោលការណ៍ គោរពតាមតួនាទីរបស់ខ្លួន ហើយបើអ្នកណាប្រព្រឹត្តនូវបម្រាម ធ្វើខុសនឹងវិន័យរបស់កងកម្លាំងនៅពេលនេះ ត្រូវតែអនុវត្តឱ្យបានស្មើភាពគ្នា ជាគំរូល្អសម្រាប់ការអនុវត្តនោះ»។
កាលពីថ្ងៃទី៣ ខែឧសភានេះ ប្រមុខរដ្ឋាភិបាលបានចេញសេចក្តីសម្រេចបញ្ចប់ការបិទខ្ទប់រាជធានីភ្នំពេញ និងទីក្រុងតាខ្មៅ ខេត្តកណ្តាល ចាប់ពីថ្ងៃទី៦ ខែឧសភា ក្រោយតំបន់ទាំងពីរនេះបានបិទខ្ទប់អស់រយៈពេលប្រមាណ២០ថ្ងៃមកហើយ ដោយជំនួសមកនូវវិធានការថ្មីៗ និងបង្រួមតំបន់បិទខ្ទប់ឱ្យតូចជាងមុន ធ្វើយ៉ាងណាសំដៅទប់ស្កាត់ការឆ្លងរីករាលដាលកូវីដ-១៩។
កាលពីថ្ងៃទី២២ ខែមេសា អតីតមន្ត្រីយោធាផ្កាយពីរ លោក ស៊ុំ ពៅ និងបក្ខពួក៦នាក់ត្រូវបានសមត្ថកិច្ចចាប់ខ្លួន និងក្រោយមក រដ្ឋាភិបាលលុបឈ្មោះមន្ត្រីជាន់ខ្ពស់យោធារូបនេះចេញពីក្របខណ្ឌផងដែរ។ សំណុំរឿងអតីតមន្ត្រីយោធាផ្កាយពីរ និងបក្ខពួក ត្រូវបានបញ្ជូនទៅតុលាការខេត្តស្វាយរៀង ដោយចោទពីបទជួញដូរមនុស្ស។ ការចោទប្រកាន់នេះ បន្ទាប់ពីរកឃើញថា ពួកគេទាំងនោះបានប្រើប្រាស់រថយន្ត៤គ្រឿងដឹកជនជាតិចិន២៨នាក់ចេញពីតំបន់បិទខ្ទប់នៅរាជធានីភ្នំពេញ ប្រឆាំងនឹងបម្រាមរដ្ឋាភិបាល ដើម្បីឆ្ពោះទៅកាន់ខេត្តស្វាយរៀង។
បន្ទាប់មកទៀត កាលពីយប់ថ្ងៃទី២៤ ខែមេសា ឆ្នាំ២០២១ សមត្ថកិច្ចខេត្តកណ្តាលដែលកំពុងយាមប្រចាំការនៅសង្កាត់ព្រែកហូរ ក្រុងតាខ្មៅ ក្នុងអំឡុងបិទខ្ទប់ក្រុងតាខ្មៅ បានឃាត់ខ្លួនមនុស្ស៣នាក់ ក្នុងនោះមានលោក គឹម ពិសិដ្ឋ អាយុ៣៣ឆ្នាំ ជាមន្ត្រីយោធានៅនាយកដ្ឋានវិស្វកម្មនៃក្រសួងការពារជាតិ ខណៈដែលជនទាំង៣នាក់បាននាំគ្នាបើករថយន្តបម្រុងឆ្លងកាត់គោលដៅហាមឃាត់ក្នុងស្ថានភាពស្រវឹងស្រា និងល្មើសបម្រាមបិទខ្ទប់ទៀតផង។
ក្រោយមក នៅថ្ងៃទី២៦ ខែមេសា រដ្ឋមន្ត្រីក្រសួងការពារជាតិ លោក ទៀ បាញ់ បានសម្រេចដកឋានន្តរសក្តិ និងលុបឈ្មោះវរសេនីយ៍ត្រី គឹម ពិសិដ្ឋ ចេញពីក្របខណ្ឌនៃកងយោធពលខេមរភូមិន្ទផងដែរ។
បើតាមអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា ឱ្យដឹងថា គិតត្រឹមចុងខែមេសា ឆ្នាំ២០២១ សមត្ថកិច្ចក៏បានឃាត់ខ្លួនមនុស្សចំនួន២៣៦នាក់ដែលបានល្មើសទៅនឹងបម្រាមបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល ដោយក្នុងចំណោមនោះ មាន៦នាក់ត្រូវបានតុលាការចេញដីកាឃុំខ្លួនជាបណ្តោះអាសន្ន៕
