ប្រជាពលរដ្ឋជិត២០០នាក់ នៅស្រុកបរិបូណ៌ ខេត្តកំពង់ឆ្នាំង បាននាំគ្នាបិទកំណាត់ផ្លូវជាតិលេខ៥ ចំណុចព្រំប្រទល់ខេត្តកំពង់ឆ្នាំង និងខេត្តពោធិ៍សាត់ រយៈពេលជិតកន្លះម៉ោង ក្រោយមិនមានដំណោះស្រាយពាក់ព័ន្ធបញ្ហាដីធ្លីរបស់ពួកគាត់។
ក្រុមពលរដ្ឋតវ៉ាអះអាងថា ការឈានទៅបិទកំណាត់ផ្លូវជាតិលេខ៥ ចំណុចភូមិក្បាលដំរី ព្រំប្រទល់ខេត្តទាំងពីរ នៅរសៀលថ្ងៃទី១១ ខែឧសភានេះ ធ្វើឡើងដោយសារតែអាជ្ញាធរមិនព្រមដោះស្រាយបញ្ហាដីធ្លីរបស់ពួកគាត់ដែលធ្លាប់អាស្រ័យផលជាច្រើនឆ្នាំមកហើយ និងថែមទាំងចោទពលរដ្ឋថាបានទៅកាន់កាប់ដីនៅក្នុងភូមិសាស្ត្រខេត្តពោធិ៍សាត់ដោយខុសច្បាប់ទៀតផង។
យ៉ាងណា នៅម៉ោងជាង២រសៀលនេះ អភិបាលស្រុកបរិបូណ៌ បានទៅសម្របសម្រួលជាមួយពលរដ្ឋ ដើម្បីបើកចរាចណ៍កំណាត់ផ្លូវជាតិលេខ៥ឡើងវិញ ដោយសន្យាថានឹងយកបញ្ហានេះទៅជួយរកដំណោះស្រាយជាមួយអាជ្ញាធរខេត្តពោធិ៍សាត់នៅថ្ងៃស្អែក៕
