ប្រជាពលរដ្ឋជិត២០០នាក់ នៅស្រុកបរិបូណ៌ ខេត្តកំពង់ឆ្នាំង បាននាំគ្នាបិទកំណាត់ផ្លូវជាតិលេខ៥ ចំណុចព្រំប្រទល់ខេត្តកំពង់ឆ្នាំង និងខេត្តពោធិ៍សាត់ រយៈពេលជិតកន្លះម៉ោង ក្រោយមិនមានដំណោះស្រាយពាក់ព័ន្ធបញ្ហាដីធ្លីរបស់ពួកគាត់។
ក្រុមពលរដ្ឋដែលតវ៉ា អះអាងថា ការឈានទៅបិទកំណាត់ផ្លូវជាតិលេខ៥ ត្រង់ចំណុចភូមិក្បាលដំរី ព្រំប្រទល់ខេត្តទាំងពីរ នៅរសៀលថ្ងៃទី១១ ខែឧសភានេះ ធ្វើឡើងដោយសារតែអាជ្ញាធរមិនព្រមដោះស្រាយបញ្ហាដីធ្លីរបស់ពួកគាត់ដែលធ្លាប់អាស្រ័យផលជាច្រើនឆ្នាំមកហើយ និងថែមទាំងចោទពលរដ្ឋថាបានទៅកាន់កាប់ដីនៅក្នុងភូមិសាស្ត្រខេត្តពោធិ៍សាត់ដោយខុសច្បាប់ទៀតផង។
យ៉ាងណា នៅម៉ោងជាង២រសៀលនេះ អភិបាលស្រុកបរិបូណ៌ បានចុះទៅសម្របសម្រួលជាមួយពលរដ្ឋ ដើម្បីបើកឱ្យមានការចរាចណ៍ឡើងវិញ ដោយសន្យាថា នឹងជួយយកបញ្ហានេះទៅរកដំណោះស្រាយជាមួយអាជ្ញាធរខេត្តពោធិ៍សាត់នៅថ្ងៃស្អែក។
ពលរដ្ឋម្នាក់នៅខេត្តកំពង់ឆ្នាំង ដែលសុំមិនបញ្ចេញឈ្មោះដោយសារបារម្ភពីសុវត្ថិភាព បានប្រាប់ វីអូឌី នៅកន្លែងប្រមូលផ្តុំតវ៉ាថា ប្រជាពលរដ្ឋមិនចង់តវ៉ាបិទកំណាត់បិទផ្លូវជាតិនោះទេ ប៉ុន្តែដោយសារគ្មានជម្រើសនិងគ្មានដំណោះស្រាយដីធ្លីសមស្របណាមួយពីអាជ្ញាធរ។ លោកថា ដីទំហំ១ ៦៦១ហិកតារបស់ប្រជាពលរដ្ឋចំនួន៥៧២គ្រួសារ នៅឃុំចំនួន៥ នៃស្រុកបរិបូណ៌ ខេត្តកំពង់ឆ្នាំង បានរងផលប៉ះពាល់ដោយអាជ្ញាធរខេត្តមួយនេះដកហូតយកទៅបែងចែកឱ្យពលរដ្ឋផ្សេងទៀតនៅខេត្តពោធិ៍សាត់។
កសិកររូបនេះបន្តថា គ្រួសាររបស់លោកបានកាន់កាប់ដីធ្លី៥ហិកតាបន្តពីឪពុកម្តាយនៅតំបន់ចាន់ជ្វា ស្ថិតក្នុងឃុំអន្សាចំបក់ ស្រុកក្រគរ ខេត្តពោធិ៍សាត់ តាំងពីឆ្នាំ១៩៩៨ រហូតមក ដោយពុំធ្លាប់មានបញ្ហាអ្វីនោះទេ។
លោកបន្តថា ទើបតែនៅឆ្នាំ២០២០ អាជ្ញាធរខេត្តពោធិ៍សាត់ បានចុះហាមឃាត់មិនឱ្យប្រជាពលរដ្ឋនៅខេត្តកំពង់ឆ្នាំងអាស្រ័យផល និងបានដកហូតដីនោះយកទៅចែកឱ្យប្រជាពលរដ្ឋនៅខេត្តរបស់ខ្លួនវិញ ដោយចោទប្រជាពលរដ្ឋខេត្តកំពង់ឆ្នាំងថាបានចូលកាន់កាប់ដីក្នុងខេត្តពោធិ៍សាត់ដោយខុសច្បាប់ទៅវិញ។
លោកបន្ថែមថា៖ «គាត់ [អាជ្ញាធរ] និយាយមកថា យើងរំលោភយកដីរបស់រដ្ឋ ចុះអ្នកណាមួយដែលរស់នៅក្រៅដីរបស់រដ្ឋ។ ការកាន់កាប់៥យ៉ាង យើងមានគ្រប់គ្រាន់។ អាជ្ញាធរនៅខេត្តកំពង់ឆ្នាំងនៅឃុំយើងនេះ គាត់បានដឹងឮតើ! ថាយើងកាន់កាប់នៅតំបន់ហ្នឹងយូរឆ្នាំដែរតើ! មិនមែនពួកគាត់អត់ដឹងអីណា! គ្រួសារខ្ញុំ បើគេដកយកដីហ្នឹងអស់ គឺអស់ហើយ អត់ស្រែឯណាធ្វើទៀតទេ»។
ពលរដ្ឋនៅកំពង់ឆ្នាំងម្នាក់ទៀត អ្នកស្រី គន រ័ត្ន ចាត់ទុកករណីអាជ្ញាធរខេត្តពោធិ៍សាត់ដកហូតយកដីពីប្រជាពលរដ្ឋ ទៅបែងចែកឱ្យពលរដ្ឋផ្សេងទៀតនេះ ថាជារឿងអយុត្តិធម៌ និងជាការរើសអើងលើប្រជាពលរដ្ឋនៅខេត្តជាប់គ្នា។
អ្នកស្រីបន្តថា បងប្អូនរបស់អ្នកស្រីរស់នៅខេត្តកំពង់ឆ្នាំងជាប់ព្រំប្រទល់ខេត្តពោធិ៍សាត់ជាង១០នាក់ មានដីស្រែនៅក្នុងខេត្តពោធិ៍សាត់ទាំងអស់គ្នា ដោយម្នាក់ៗមានដីទំហំ២ឬ៣ហិកតាដែលរងផលប៉ះពាល់ ហើយពួកគាត់ក៏ពុំមានដីសម្រាប់បង្កបង្កើនផលនៅកន្លែងផ្សេងទៀតដែរ។
អ្នកស្រីបន្ថែមថា៖ «គាត់ [អាជ្ញាធរខេត្តពោធិ៍សាត់] មិនដែលគិតថាពួកខ្ញុំជាប្រជាពលរដ្ឋផង។ គាត់និយាយប្រកាន់បក្សពួកថា ពលរដ្ឋខេត្តកំពង់ឆ្នាំង ពលរដ្ឋខេត្តពោធិ៍សាត់ ដោយគាត់បានរើសអើងប្រជាពលរដ្ឋយើងនៅខេត្តកំពង់ឆ្នាំងយ៉ាងខ្លាំង។ គាត់និយាយមួយមាត់ណាក៏ថាពួកយើងជាចោរលួចដីគេ។ តាមការពិត យើងខំថែរក្សាតាំងពីដូនតាមកពីរបីជំនាន់ រហូតឪពុកម្តាយស្លាប់អស់ហើយ។ ខ្ញុំសូមអំពាវនាវដល់សម្តេច ហ៊ុន សែន ឱ្យគាត់ចុះជួយដល់ពលរដ្ឋកំពង់ឆ្នាំងដែលមានដីនៅខេត្តពោធិ៍សាត់ ដែលកំពុងរងគ្រោះនេះផង»។
អ្នកស្រី គន រ័ត្ន បន្ថែមថា ពាក់ព័ន្ធបញ្ហាដីធ្លីនេះ ក៏ធ្លាប់មានការចាប់ខ្លួនពលរដ្ឋចំនួន២នាក់បញ្ជូនទៅដាក់ពន្ធនាគារកាលពីឆ្នាំ២០២០ និងបានគំរាមចាប់ពលរដ្ឋបន្ថែមទៀត ប្រសិនបើពួកគេហ៊ានចេញមុខតវ៉ាប្រឆាំង។
អភិបាលរងខេត្តពោធិ៍សាត់ លោក ចេង ឡៃ មានប្រសាសន៍ថា ពលរដ្ឋនៅខេត្តកំពង់ឆ្នាំងបានទៅឈូសឆាយដីព្រៃរបស់រដ្ឋដែលស្ថិតក្រោមការគ្រប់គ្រងរបស់អាជ្ញាធរខេត្តពោធិ៍សាត់។
យ៉ាងណា លោក ចេង ឡៃ ឱ្យដឹងថា សម្រាប់ប្រជាពលរដ្ឋខេត្តកំពង់ឆ្នាំងដែលបានចូលទៅអាស្រ័យផលនិងរស់នៅជាក់ស្តែង គឺអាជ្ញាធរខេត្តមិនដកហូតយកនោះទេ ហើយពួកគេអាចទទួលបានដីសម្បទានសង្គមកិច្ចកន្លះហិកតាពីអាជ្ញាធរខេត្តនេះផងដែរ។
លោកបន្ថែមថា៖ «យើង រូបថតលើអាកាសដែលយើងបានថតកាលពីឆ្នាំ២០១៧ រួចហើយ ថាតំបន់ណាខ្លះជាតំបន់ព្រៃ ហើយតំបន់ណាខ្លះជាតំបន់វាលដែលបានកាប់ទន្ទ្រានរួច។ សកម្មភាពកាប់ឬឈូសឆាយក្រោយឆ្នាំ២០១៧ គឺជាសកម្មភាពខុសច្បាប់»។
លោក ចេង ឡៃ បញ្ជាក់ថា អាជ្ញាធរខេត្តបានដកហូតដីពីពលរដ្ឋខេត្តកំពង់ឆ្នាំង និងដីក្រុមហ៊ុន ភាពីម៉ិច ទំហំជាង៥ ០០០ហិកតា ដើម្បីទុកបែងចែកដីសង្គមកិច្ចទៅឱ្យពលរដ្ឋខេត្តពោធិ៍សាត់ នៅឃុំអន្សាចំបក់ ជាង៣ ០០០គ្រួសារ ទៅតាម សជណ របស់រដ្ឋាភិបាលដែលបានចេញកាលពីឆ្នាំ២០១០។
ពាក់ព័ន្ធករណីនេះ អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ស្នើឱ្យអាជ្ញាធរខេត្តពោធិ៍សាត់ ត្រូវរកដំណោះស្រាយឱ្យបានសមរម្យនិងមានតម្លាភាពជូនប្រជាពលរដ្ឋ ដើម្បីចៀសវាងការធ្វើឱ្យខាតបង់ផលប្រយោជន៍របស់ប្រជាពលរដ្ឋ ហើយធ្វើឱ្យពួកគេផ្ទុះការតវ៉ា។
លោកបន្ថែមថា៖ «យើងសុំឱ្យភាគីទាំងខាងប្រជាពលរដ្ឋនិងអាជ្ញាធរ គប្បីចុះធ្វើការងារស្រាវជ្រាវនៅក្នុងវិវាទដីធ្លីហ្នឹង ឱ្យមានភាពច្បាស់លាស់ ដើម្បីរកដំណោះស្រាយ កុំឱ្យមានបញ្ហាការទាមទារតវ៉ាបន្តទៅទៀត។ អ៊ីចឹងធ្វើយ៉ាងណាពន្លឿនក្នុងការធ្វើកិច្ចការងារហ្នឹង ពីព្រោះតាមដឹងគឺប្រជាពលរដ្ឋត្រូវការដីដើម្បីបង្កបង្កើនផល ដែលរដូវវស្សាដែលកំពុងមកដល់ហ្នឹង។ អ៊ីចឹងគប្បីធ្វើយ៉ាងណាដោះស្រាយរឿងហ្នឹងជូនពួកគាត់។ ខ្ញុំគិតថា ប្រសិនជាការដោះស្រាយហ្នឹង ពួកគាត់អាចទទួលយកបាន ប្រហែលជាមិនមានការតវ៉ាអ្វីទៀតទេ»។
កាលឆ្នាំ២០២០ លោក សឹង សារិត ហៅ តេវ អាយុ៦០ឆ្នាំ រស់នៅភូមិសន្លង់ និងលោក ពឹម ចិត្រា រស់នៅភូមិក្បាលដំរី ដែលភូមិទាំងពីរស្ថិតនៅក្នុងឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង ត្រូវបានចាប់ខ្លួនដោយសមត្ថកិច្ចខេត្តពោធិ៍សាត់ជាបន្តបន្ទាប់ ក្រោយពួកគេចេញមុខតវ៉ាដីធ្លីជាមួយអាជ្ញាធរខេត្តមួយនេះ៕
