អតីតសកម្មជនគណបក្សសង្គ្រោះជាតិម្នាក់ទៀត ត្រូវបានជនមិនស្គាល់មុខចំនួន៤នាក់ព្រួតគ្នាវាយដោយដំបងដែកបណ្តាលឱ្យរងរបួសច្រើនកន្លែង ខណៈសំណុំរឿងហិង្សាទៅលើអតីតសកម្មជននិងមន្ត្រីបក្សប្រឆាំងមុនៗ មិនទាន់ត្រូវបានសមត្ថកិច្ចរាយការណ៍ថាបានរកឃើញជនល្មើសមកផ្តន្ទាទោសតាមច្បាប់នៅឡើយ។
ជនរងគ្រោះឈ្មោះ ស៊ិន ខុន អាយុ៣១ឆ្នាំ ជាអតីតសកម្មជនគណបក្សសង្គ្រោះជាតិ បានរៀបរាប់ប្រាប់ វីអូឌី ថា មុនពេលកើតហេតុ រូបលោកបានទៅផ្សារដើមស្រល់ ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ដើម្បីទិញបន្លែធ្វើម្ហូបប្រគេនព្រះសង្ឃ ប៉ុន្តែនៅពេលទៅដល់ មិនទាន់ទាំងដាក់ចន្ទល់ម៉ូតូផង ស្រាប់តែមានជនមួយក្រុមដែលមានគ្នា៤នាក់ បានចូលមកវាយគាត់ក្នុងចំណោមមនុស្សម្នាជាច្រើន។ លោកថា ហេតុការណ៍ហិង្សានេះបានកើតឡើងនៅម៉ោង១០និង៣០នាទី ព្រឹកថ្ងៃទី១២ ខែឧសភា ឆ្នាំ២០២១នេះ។
លោកថា៖ «ដំបូងវាយតែ២នាក់ទេ ទាល់តែវាយខ្ញុំអត់បាន វារួមទាំងអស់គ្នាតែម្តង»។
លោកបន្ថែមថា ជនដៃដល់មានមាឌធំ កម្ពស់ពី១,៧៥ម៉ែត្រ ទៅ១,៨០ម៉ែត្រ ពាក់មួកសុវត្ថិភាព ប្រដាប់ដោយដំបងដែករលាស់ និងដែកបំពង់ទីប ចូលទៅវាយសន្ធប់លើរូបលោក បណ្តាលឱ្យរងរបួសត្រង់ក្បាល លើចិញ្ចើមខាងឆ្វេង និងដៃខាងឆ្វេង ហូរឈាមស្រោចខ្លួន ហើយពួកគេក៏ជិះម៉ូតូ២គ្រឿងម៉ាក PCX ពណ៌ស និង Honda C100 ដោយមិនស្គាល់ស្លាកលេខ ចេញទៅបាត់។
លោកបន្តថា លោកត្រូវបានអ្នកផ្សារដែលធ្លាប់ស្គាល់ជូនទៅដេរភ្ជិតមុខរបួសចំនួន១២ថ្នេរនៅពេទ្យឯកជនមួយកន្លែង បន្ទាប់ពីមណ្ឌលសុខភាពក្នុងសង្កាត់ជ្រោយចង្វារ មិនព្រមទទួលព្យាបាល។
លោក ស៊ិន ខុន និយាយថា៖ «ខ្ញុំគិតថាការប្រើអំពើហិង្សាចំពោះខ្ញុំ ដូចជាព្រៃផ្សៃពេកហើយ។ ព្រៃផ្សៃខ្លាំងណាស់ ព្រៃផ្សៃមែនទែន ដោយសារអី? គេវាយយើងអត់មានមូលហេតុ។ បើអារម្មណ៍វិញ មើលមកខ្ញុំជាមនុស្សហ្នឹងអត់ប្រៀបបានជាសត្វផង អាការវាយរបស់ពួកគេ។ អត់ស្មើនឹងសត្វ អត់ចាត់ទុកខ្ញុំជាមនុស្សសោះ»។
អតីតយុវជនបក្សប្រឆាំងរូបនេះ យល់ឃើញថា ករណីហិង្សាទៅលើរូបលោកនេះ គឺពាក់ព័ន្ធនឹងការគំរាមកំហែងផ្នែកនយោបាយ ដោយសារលោកគ្មានជម្លោះឬជំពាក់បំណុលជាមួយអ្នកណាទេពីមុនមក ប៉ុន្តែលោកឧស្សាហ៍បង្ហោះរឿងនយោបាយលើបណ្តាញសង្គម និងបានចុះចែកអំណោយដល់ពលរដ្ឋខ្វះខាតដោយសារវិធានបិទខ្ទប់កាលពីសប្តាហ៍មុន។
លោកបន្តថា លោកបានដាក់ពាក្យប្តឹងទៅកាន់អធិការដ្ឋានខណ្ឌជ្រោយចង្វាររួចហើយនៅថ្ងៃត្រង់នេះ ប៉ុន្តែលោកមិនមានជំនឿថា អាជ្ញាធរនឹងអាចស្រាវជ្រាវវែកមុខជនដៃដល់យកមកផ្តន្ទាទោសតាមច្បាប់ និងផ្តល់យុត្តិធម៌ដល់រូបលោកនោះទេ ត្បិតសំណុំរឿងហិង្សាលើអតីតសកម្មជនបក្សប្រឆាំងមុនៗ ជនរងគ្រោះនៅមិនទាន់ទទួលបានយុត្តិធម៌នៅឡើយ។
លោកនិយាយថា៖ «មានសកម្មជនជាច្រើនដែលរងការវាយធ្វើបាប និងចាប់ដាក់ពន្ធនាគារហ្នឹងអ៊ីចឹង។ ឥលូវមានខ្ញុំមួយដែរ ខ្ញុំគ្មានសង្ឃឹមទេ»។
កាលពីសប្តាហ៍មុន ក្រុមគ្រួសារនិងអតីតមន្រ្តីបក្សប្រឆាំងមួយចំនួនបានបង្ហាញពីការបាត់បង់ជំនឿចិត្តលើសមត្ថកិច្ចក្នុងការវែកមុខជនដៃដល់មកផ្តន្ទាទោសតាមច្បាប់ ខណៈករណីហិង្សាក្នុងទម្រង់ស្រដៀងគ្នានេះបន្តកើតឡើង ហើយសមត្ថកិច្ចមិនទាន់រកឃើញជនសង្ស័យណាម្នាក់។
ព្រះតេជគុណ ណុប វណ្នី គង់នៅ«វត្តពោធិយារាម» ហៅ«វត្តចាស់» មានសង្ឃដីកាថា ជនរងគ្រោះស្នាក់នៅក្នុងវត្តជាមួយព្រះអង្គ និងធ្វើការនៅហាងលក់សម្ភារសំណង់មួយកន្លែង។ ព្រះតេជគុណមានសង្ឃដីកាបន្តថា មុនថ្ងៃកើតហេតុ២ទៅ៣ថ្ងៃ ព្រះអង្គបានកត់សម្គាល់ឃើញជនប្លែកមុខចូលមកវត្តច្រើន។
ព្រះអង្គ វណ្នី មានសង្ឃដីកាថា៖ «ប្លែក! ដូចមនុស្សដែលយើងមិនធ្លាប់ស្គាល់ វាដូចជាលក្ខណៈមួយដូចជាមកតាមដានឬមកមើលអ៊ីចឹង។ យើងមិនហ៊ានថាដែរ ប៉ុន្តែវាមានប្លែក ខុសប្លែកពីអ្នកដែលចូលមកសម្រាកធម្មតា»។
វីអូឌី មិនអាចទាក់ទងសុំការឆ្លើយតបពីអធិការខណ្ឌជ្រោយចង្វារ លោក សៀម សុត្ថាវុធ ដើម្បីសាកសួរជុំវិញករណីហិង្សានេះបានទេ នៅថ្ងៃទី១២ ខែឧសភា ឆ្នាំ២០២១នេះ។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា លើកឡើងថា ពលរដ្ឋគ្រប់រូបមុននឹងដាក់ពាក្យបណ្តឹង ត្រូវមានជំនឿចិត្តលើសមត្ថកិច្ច ហើយលោកថា ការឆាប់សន្និដ្ឋានពីមូលហេតុនៃករណីហិង្សាថាពាក់ព័ន្ធរឿងនយោបាយ គឺជាសិទ្ធិរបស់បុគ្គលនិងធ្វើឡើងដោយផ្អែកលើនិន្នាការរបស់ពួកគេ។
លោកបន្ថែមថា សម្រាប់សមត្ថកិច្ច មុននឹងឈានដល់ការសន្និដ្ឋានមូលហេតុនៃបទល្មើសណាមួយ គឺត្រូវផ្អែកលើលទ្ធផលនៃការស្រាវជ្រាវនិងភស្តុតាងជាក់ស្តែង។
លោក សាន សុខសីហា មានប្រសាសន៍ថា៖ «បញ្ហាសំខាន់គឺមកពីគោលគំនិតគាត់ផ្ទាល់ គាត់មាននិន្នាការប្រឆាំង។ អ្វីបន្តិចគឺគាត់ចោទទៅលើខាងហ្នឹង អ្វីបន្តិចគឺគាត់ចោទទៅលើសមត្ថកិច្ច អ្វីបន្តិចគឺគាត់ចោទទៅលើរដ្ឋាភិបាល លើបញ្ហាអស់ហ្នឹង។ អាហ្នឹងហើយគឺជាចំណុចមួយដែលថាគ្មានជំនឿចិត្ត គ្មានជំនឿចិត្តទៅលើសមត្ថកិច្ចគឺត្រង់ចំណុចហ្នឹង»។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព បង្ហាញពីក្តីបារម្ភចំពោះករណីហិង្សាពលរដ្ឋដែលជាអតីតសកម្មជន ឬមន្រ្តីគណបក្សប្រឆាំង ដែលនៅបន្តកើតមានក្នុងស្ថានភាពនៃការរីករាលដាលនៃជំងឺកូវីដ-១៩។ លោកស្រីបន្តថា ករណីនេះ ទោះតិចឬច្រើនក្តីអាចនឹងប៉ះពាល់ដល់សិទ្ធិបញ្ចេញមតិផ្នែកនយោបាយរបស់ប្រជាពលរដ្ឋទូទៅនៅកម្ពុជា។
លោកស្រី ចក់ សុភាព មានប្រសាសន៍ថា៖ «ខ្ញុំអំពាវនាវដល់អាជ្ញាធរក្នុងការធ្វើយ៉ាងម៉េចស្វែងរកយុត្តិធម៌ដល់ជនរងគ្រោះ ហើយធ្វើយ៉ាងម៉េចធានាសុវត្ថិភាពដល់ពលរដ្ឋទាំងអស់នៅក្នុងសង្គមហ្នឹង ដើម្បីឱ្យយើងមានអារម្មណ៍កក់ក្តៅថា យើងមានសុវត្ថិភាពដូចដែលរដ្ឋាភិបាលព្យាយាមប្រឹងប្រែងក្នុងការងារធ្វើយ៉ាងម៉េចធានាដល់សុវត្ថិភាពភូមិឃុំ»។
នេះជាករណីហិង្សាលើកទី២ហើយដែលកើតឡើងទៅអតីតសកម្មជនគណបក្សសង្រ្គោះជាតិ អំឡុងពេលរដ្ឋាភិបាលបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល ដោយគិតត្រឹមចុងខែមេសា ឆ្នាំ២០២១មក។
កាលពីថ្ងៃទី២៧ ខែមេសា កុមារាម្នាក់ឈ្មោះ កាក់ សុវណ្ណច្ឆ័យ វ័យ១៥ឆ្នាំ ដែលជាកូនប្រុសបង្កើតរបស់អតីតមន្ត្រីគណបក្សសង្រ្គោះជាតិ លោក កាក់ កុម្ភារៈ ត្រូវបានជនមិនស្គាល់មុខជិះម៉ូតូយកដុំឥដ្ឋគប់លើបណ្តាលឱ្យរងរបួសក្បាលធ្ងន់ធ្ងរ ពេលកំពុងជិះម៉ូតូដឹកម្តាយត្រឡប់ពីទិញដំឡូងក្បែរផ្ទះ ក្នុងសង្កាត់បឹងទំពុនទី១ ខណ្ឌមានជ័យ រាជធានីភ្នំពេញ ហើយករណីនេះ សមត្ថកិច្ចនៅមិនទាន់ចាប់ខ្លួនជនល្មើសយកមកផ្តន្ទាទោសតាមច្បាប់បាននៅឡើយ៕
