មន្ត្រីជាន់ខ្ពស់ក្រសួងសុខាភិបាលបានអះអាងថា វ៉ាក់សាំងប្រឆាំងជំងឺកូវីដ-១៩ ចំនួន៥០ម៉ឺនដូសបន្ថែមទៀត បានមកដល់កម្ពុជានៅថ្ងៃទី១៦ ខែឧសភានេះ ខណៈចំនួននេះបានធ្វើឱ្យវ៉ាក់សាំងដែលកម្ពុជាទទួលបានពីប្រទេសមហាមិត្តចិនទាំងការបញ្ជាទិញនិងជំនួយ កើនឡើងដល់ទៅជាង៤លានដូស។
រដ្ឋលេខាធិការក្រសួងសុខាភិបាល លោស្រី យក់ សម្បត្តិ បានថ្លែងប្រាប់អ្នកសារព័ត៌មាននៅក្នុងពិធីទទួលវ៉ាក់សាំងចំនួន៥០ម៉ឺនដូស នៅព្រឹកថ្ងៃអាទិត្យនេះថា វ៉ាក់សាំងប្រឆាំងកូវីដ-១៩កន្លះលានដូសដែលមកដល់ព្រលានយន្តហោះក្រុងភ្នំពេញនេះ ធ្វើឡើងតាមការបញ្ជាទិញរបស់រដ្ឋាភិបាលកម្ពុជាពីក្រុមហ៊ុនស៊ីណូវ៉ាក់ ប្រទេសចិន។
អ្នកស្រីបន្តថា បច្ចុប្បន្ននេះ គណៈកម្មការចំពោះកិច្ច ក៏ដូចជាគណៈកម្មការលទ្ធកម្ម ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន កំពុងជំរុញការចាក់វ៉ាក់សាំងនៅរាជធានីភ្នំពេញ ខេត្តកណ្ដាល និងបណ្ដាខេត្តដែលប្រឈមមួយចំនួន ជូនប្រជាពលរដ្ឋគ្រប់ៗគ្នាចាប់ពីអាយុ១៨ឆ្នាំឡើងទៅ។
ករណីនេះ អ្នកស្រីថា រដ្ឋាភិបាលបានបញ្ជាទិញវ៉ាក់សាំងចំនួន៥០ម៉ឺនដូសបន្ថែមទៀតពីក្រុមហ៊ុនស៊ីណូវ៉ាក់ នៃប្រទេសចិន ដោយក្រុមហ៊ុនបានបញ្ជូនមកដល់កម្ពុជានៅព្រឹកថ្ងៃទី១៦ ខែឧសភានេះ នៅឯព្រលានយន្តហោះអន្តរជាតិភ្នំពេញផងដែរ។
លោកស្រី យក់ សម្បត្តិ បញ្ជាក់ទៀតថា រដ្ឋាភិបាលកំពុងតែបញ្ជាទិញវ៉ាក់សាំងប្រឆាំងកូវីដ-១៩ ជាបន្តបន្ទាប់បន្ថែមទៀត ពីក្រុមហ៊ុនស៊ីណូហ្វាម ក្រុមហ៊ុនស៊ីណូវ៉ាក់ និងវ៉ាក់សាំងជំនួយផ្សេងៗទៀត។
ទំព័រហ្វេសប៊ុករបស់នាយកដ្ឋានព័ត៌មានក្រសួងការពារជាតិ នៅថ្ងៃអាទិត្យនេះ អះអាងថា កម្ពុជាបានទទួលវ៉ាក់សាំងពីប្រទេសចិនចំនួន៤លើក រួមមាន លើកទី១ មានចំនួន១លាន៥សែនដូស ត្រូវបានដឹកមកដល់កម្ពុជា កាលពីថ្ងៃទី២៦ ខែមីនា ឆ្នាំ២០២១។ លើកទី២ មានចំនួន៥០ម៉ឺនដូស ដឹកមកដល់កម្ពុជានៅថ្ងៃទី១៧ ខែមេសា។ ដោយឡែក លើកទី៣ មានចំនួន៥០ម៉ឺនដូស ដឹកមកដល់កម្ពុជាថ្ងៃទី១១ ខែឧសភា និងលើកទី៤ នៅថ្ងៃទី១៦ ខែឧសភានេះ ដោយកម្ពុជាទទួលបានវ៉ាក់សាំងស៊ីណូវ៉ាក់ ពីក្រុមហ៊ុនស៊ីណូវ៉ាក់ ប្រទេសចិន ចំនួន៥០ម៉ឺនដូសបន្ថែមទៀត។
កម្ពុជាទទួលបានវ៉ាក់សាំងប្រឆាំងជំងឺកូវីដ-១៩ ជាង៤លាន៥សែនដូសរួចមកហើយ រួមមាន វ៉ាក់សាំងស៊ីណូហ្វាម ជំនួយរបស់រដ្ឋាភិបាលចិន ចំនួន១លាន៧សែនដូស។ វ៉ាក់សាំងស៊ីណូវ៉ាក់ ទិញពីចិន ចំនួន២លាន៥សែនដូស និងវ៉ាក់សាំងអាស្ត្រាហ្សេនិកា ជាង៣២ម៉ឺនដូស (៣២៤ ០០០) ជាជំនួយរបស់ខូវ៉ាក់ តាមរយៈអង្គការសុខភាពពិភពលោក។
ប្រមុខរាជរដ្ឋាភិបាល លោក ហ៊ុន សែន ធ្លាប់ប្រកាសថា ការចាក់វ៉ាក់សាំងកូវីដ-១៩ គឺជាផ្នែកមួយដ៏សំខាន់បន្ថែមទៀតក្នុងប្រតិបត្តិការប្រយុទ្ធប្រឆាំងជំងឺកូវីដ-១៩ និងជួយការពារសុខភាពរបស់មនុស្សពីការវាយប្រហារដោយជំងឺកូវីដ-១៩។ ប្រមុខរាជរដ្ឋាភិបាលបានដាក់ចេញយុទ្ធសាស្ត្រចាក់វ៉ាក់សាំងនេះឱ្យបានលឿនតាមដែលអាចធ្វើទៅបានជូនដល់ប្រជាពលរដ្ឋរបស់ខ្លួន។
នាយកដ្ឋានព័ត៌មានក្រសួងការពារជាតិ ឱ្យដឹងទៀតថា កម្ពុជាបានចាប់ផ្តើមចាក់វ៉ាក់សាំងជូនប្រជាពលរដ្ឋនៅថ្ងៃទី១០ ខែកុម្ភៈ ហើយមកដល់ពេលនេះ ប្រជាពលរដ្ឋជាង២លាននាក់ហើយបានចាក់វ៉ាក់សាំង៕
