អាជ្ញាធរក្រុងសៀមរាប កំពុងស៊ើបអង្កេតរកមើលដើមហេតុដែលបណ្តាលឱ្យកើតមានភ្លើងឆេះព្រៃតំបន់អភិរក្សធនធានជីវចម្រុះ «បឹងពារាំង» លើផ្ទៃដីជាង១០ហិកតា រយៈពេលជិត១សប្តាហ៍ ខណៈប្រធានសហគមន៍មើលឃើញពីតម្រុយបង្កឡើងដោយស្នាដៃមនុស្ស។
អភិបាលក្រុងសៀមរាប លោក នួន ពុទ្ធារ៉ា លើកឡើងនៅថ្ងៃពុធនេះថា ភ្លើងបានឆេះរាលដាលជាដុំៗលើផ្ទៃដីព្រៃលិចទឹកជាង១០ហិកតា ក្នុងភូមិសាស្រ្តមួយផ្នែកធំនៃសង្កាត់ជ្រាវ ហើយរាលដល់ផ្នែកខ្លះនៃសង្កាត់សៀមរាប និងចុងឃ្នៀស។ លោកថា ស្ថានភាពអគ្គិភ័យបានផុតរលត់ហើយ បន្ទាប់ពីអាជ្ញាធរបានប្រើរថយន្តពន្លត់អគ្គិភ័យជាង១០គ្រឿង និងមានភ្លៀងធ្លាក់មួយមេកាលពីយប់ថ្ងៃម្សិលមិញ។
ប្រភពដដែលបន្ថែមថា មន្រ្តីជំនាញកំពុងស៊ើបអង្កេតរកមូលហេតុនៃការឆេះ ដោយមិនទាន់អាចសន្និដ្ឋានបានថាកើតឡើងដោយសារពលរដ្ឋដុតយកឃ្មុំដូចឆ្នាំកន្លងទៅ ឬបង្កាត់ភ្លើងដាំបាយ ឬដោយសារការដុតរានដើម្បីយកដីធ្វើជាកម្មសិទ្ធិនៅឡើយទេ។
លោក នួន ពុទ្ធារ៉ា មានប្រសាសន៍ថា៖ «[មន្ត្រី]ជំនាញគេកំពុងធ្វើការ អ៊ីចឹងខ្ញុំមិនទាន់អាចនិយាយថាម៉េចទេ ក៏ប៉ុន្តែយើងព្យាយាមទប់ស្កាត់ការឆេះនេះ ហើយឯកឧត្តមអភិបាល[ខេត្ត] លោកប្រយ័ត្នប្រយែងរឿងនេះណាស់ ដាច់ខាតហើយមិនឱ្យអ្នកណាទៅបំពានឈូសព្រៃឈូសអីយកដីអ៊ីចឹងទេ»។
ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប លោក ទា គឹមសុទ្ធ ថ្លែងបន្ថែមថា ភ្លើងបានចាប់ផ្តើមឆេះព្រៃឈើជាច្រើនក្នុងតំបន់ទេសចរណ៍ធម្មជាតិ និងព្រៃលិចទឹកជ្រាវ តាំងពីថ្ងៃទី១៣ ខែឧសភា។ លោកថា កម្លាំងចម្រុះនិងពលរដ្ឋបានព្យាយាមពន្លត់ តែមិនមានប្រសិទ្ធភាព ដោយសារនៅទីនោះមានព្រៃដុះក្រាស់ គ្មានផ្លូវសម្រាប់រថយន្តពន្លត់អគ្គិភ័យចូល ដែលត្រូវការគ្រឿងចក្រកាយបើកផ្លូវជាមុន។
លោក ទា គឹមសុទ្ធ មានប្រសាសន៍ថា៖ «ឥលូវហ្នឹងវារលត់ហើយ ប៉ុន្តែវានៅសល់ផ្សែងៗ យើងកំពុងដើរពន្លត់កន្លែងគល់ៗ ដោយសារវាពិបាកនឹងចូល អ៊ីចឹងយើងត្រូវប្រើអេស្កា៤[ទៅ]៥គ្រឿងដើម្បីកាយចូលទៅ»។
ប្រធានសហគមន៍នៃសមាគមទេសចរណ៍វប្បធម៌ធម្មជាតិបឹងពារាំង លោក គង់ មង្គល សន្និដ្ឋានជាបឋមថា ការឆេះព្រៃអភិរក្សនេះ គឺផ្តើមចេញពីការដុតព្រៃរានយកដីធ្វើចម្ការ ខុសពីការឆេះកាលឆ្នាំមុនៗដែលផ្តើមចេញពីការដុតព្រៃយកឃ្មុំនិងការដុតជញ្ច្រាំងស្រូវ ដោយសារលោកឃើញមានដីឈូសឆាយនៅបរិវេណឆាបឆេះខាងក្នុង។
លោក គង់ មង្គល ប្រាប់ថា៖ «ដល់ពេលយើងស្រាវជ្រាវ និងយើងបានយកអេស្កាវ៉ាទ័រចូលវាយព្រៃ ដើម្បីយើងចូលទៅមើលកន្លែងឆេះ បែរជាខាងក្នុងនោះគឺមានមនុស្សលួចឈូស»។
លោកបន្ថែមថា ការឆេះលើកនេះគឺមានទំហំធំជាងឆ្នាំកន្លងមក ប្រមាណ៣ទៅ៤ដង និងធ្វើឱ្យខូចខាតតំបន់ដែលប្រជាសហគមន៍បានប្រឹងប្រែងថែរក្សានិងអភិរក្សតាំងពីឆ្នាំ១៩៩៣មក ដូចជា សំបុកសត្វស្លាបប្រភេទកុក ខ្វែក ក្រសារ និងទ្រូង ជាដើម ហើយបានសម្លាប់ជីវិតសត្វល្មូនដូចជាពស់ អណ្តើក និងភេ រាប់រយក្បាលទៀត។
លោកនិយាយថា៖ «ការឆេះនេះគឺប្រឈមនឹងការប៉ះពាល់និងបាត់បង់ជីវចម្រុះ ក៏ដូចជាព្រៃលិចទឹកជាច្រើន ហើយដែលយើងសោកស្តាយបំផុត ព្រោះនេះគឺជាជម្រកនៃជីវចម្រុះ ជាពិសេសគឺសត្វស្លាបទឹកតំបន់របស់ខ្ញុំដែលជាកន្លែងជ្រកពងកូន ត្រូវឆេះអស់»។
លោកបានអំពាវនាវដល់អាជ្ញាធរមានសមត្ថកិច្ចនិងភាគីពាក់ព័ន្ធដទៃទៀត រួមគ្នាចាត់វិធានការបង្ការនិងទប់ស្កាត់ករណីភ្លើងឆេះព្រៃនាពេលខាងមុខ ដោយការធ្វើផ្លូវបើកឱ្យរថយន្តពន្លត់អគ្គិភ័យអាចចូលមកដល់ និងជីកស្រះស្តុកទឹកសម្រាប់បូមបាញ់ពន្លត់ ដើម្បីចៀសវាងការខូចខាតជីវចម្រុះបន្ថែមទៀត។
ផ្អែកតាមរូបភាពផ្កាយរណបរបស់អង្គការអភិរក្សព្រៃឈើ ដែលមានឈ្មោះថា Global Forest Watch កាលពីឆ្នាំមុន បានប៉ាន់ប្រមាណថា ប្រទេសកម្ពុជាបានបាត់បង់ព្រៃឈើជាង២លានហិកតា (២,១៧) ចាប់ពីចន្លោះឆ្នាំ២០០១ ដល់ឆ្នាំ២០១៨ គឺស្មើនឹង ១ភាគ៤ នៃការបាត់បង់គម្របព្រៃឈើចាប់តាំងពីឆ្នាំ២០០០ ហើយបានបញ្ចេញសារធាតុកាបោនប្រមាណ៩១៤ម៉េហ្គាតោន (megaton) ឬស្មើនឹង៩១៤លានតោនទៅក្នុងបរិយាកាស។
ប្រភពដដែលបន្តថា ដោយឡែក តំបន់ការពារបឹងទន្លេសាប ត្រូវបានកត់ត្រាថាបាត់បង់ព្រៃឈើប្រមាណ១៦ ៨០០ហិកតា ចាប់ពីចន្លោះឆ្នាំ២០០១ និងឆ្នាំ២០០៨៕
