អាជ្ញាធររាជធានីភ្នំពេញ ព្រមានចាត់វិធានការរដ្ឋបាលលើម្ចាស់ខុនដូម្នាក់ដែលជាអតីតមន្ត្រីជំនាញផ្នែកភូមិបាលសុរិយោដី រាជធានីភ្នំពេញ ដែលសង់សំណង់រឹងមាំលើដីចំណីផ្លូវសាធារណៈសម្រាប់ដាក់ម៉ាស៊ីនភ្លើងខ្នាតធំប្រើប្រាស់ក្នុងខុនដូរបស់ខ្លួន។
អភិបាលរងខណ្ឌចំការមន លោក អាំង សិរីពិសិដ្ឋ មានប្រសាសន៍ប្រាប់ វីអូឌី នៅថ្ងៃទី២០ ខែឧសភានេះថា ថ្មីៗនេះ អាជ្ញាធរបានទទួលពាក្យបណ្តឹងពីប្រជាពលរដ្ឋថា អគារខុនដូមួយកន្លែងស្ថិតនៅក្នុងខណ្ឌចំការមន បានរំលោភយកដីចិញ្ចើមផ្លូវសាធារណៈធ្វើជាទីតាំងសម្រាប់ដាក់ម៉ាស៊ីនភ្លើងខ្នាតធំដើម្បីបម្រើផលប្រយោជន៍ផ្ទាល់ខ្លួន និងធ្វើឱ្យផ្លូវតូចចង្អៀត រួមទាំងពិបាកធ្វើដំណើរ។
អភិបាលខណ្ឌរូបនោះបញ្ជាក់ថា ក្រុមការងារជំនាញរបស់ខណ្ឌបានសហការជាមួយមន្ត្រីមន្ទីរដែនដី នគរូបនីយកម្ម និងសំណង់ បានចុះទៅដល់ទីតាំងខុនដូ ដើម្បីវាស់វែងតាមបច្ចេកទេស និងរកឃើញថា អតីតអនុប្រធានមន្ទីរដែនដី នគរូបនីយកម្ម និងសំណង់ នៅរាជធានីភ្នំពេញ រូបនោះ បានសង់សំណង់រឹងសម្រាប់ដាក់ម៉ាស៊ីនភ្លើងខ្នាតធំចូលផ្លូវសាធារណៈប្រវែងប្រហែលជា៨តឹក។
ក្រោយពីចុះវាស់វែង អាជ្ញាធរបានហៅម្ចាស់ខុនដូធ្វើកិច្ចសន្យាឱ្យឈប់សាងសង់សំណង់សម្រាប់ដាក់ម៉ាស៊ីនភ្លើងខ្នាតធំ ចូលផ្លូវសាធារណៈ និងទុកពេល១៤ថ្ងៃឱ្យរុះរើចេញវិញ។ លោកបន្តថា បើម្ចាស់ខុនដូមិនព្រមធ្វើតាមការជូនដំណឹងរបស់អាជ្ញាធរទេ មន្ត្រីជំនាញនឹងចាត់វិធានការរដ្ឋបាលឬវិធានការច្បាប់លើបុគ្គលនោះផងដែរ។
លោកមានប្រសាសន៍ថា៖ «បើគាត់ថយទៅក្រោយ៨តឹកវិញទៅ វាស្របច្បាប់ហើយ។ នៅក្នុងកំណត់ហេតុ យើងទុកពេលឱ្យគាត់រុះរើចេញ២សប្តាហ៍។ ជាគោលការណ៍ នៅពេលដែលគាត់មិនអនុវត្តតាម យើងនឹងធ្វើសេចក្តីជូនដំណឹងជាលើកទី២ បើសិនជាជូនដំណឹងលើកទី៣ គាត់មិនព្រមរុះរើចេញទៀត នឹងយកច្បាប់មកអនុវត្តជាគោល»។
វីអូឌី មិនអាចសុំការឆ្លើយតបពីតំណាងម្ចាស់ខុនដូនោះបានទេ នៅថ្ងៃព្រហស្បតិ៍នេះ។
គួរបញ្ជាក់ថា ទីតាំងដែលម្ចាស់ខុនដូសង់កន្លែងសម្រាប់ដាក់ម៉ាស៊ីនភ្លើងខ្នាតធំចូលផ្លូវសាធារណៈ ស្ថិតនៅលើដីឡូត៍លេខ១២៣ ផ្លូវលេខ១០៣ កែង៤៧៤ ក្នុងសង្កាត់បឹងត្របែក ខណ្ឌចំការមន៕
