អ្នកជំងឺ៤នាក់ទៀតបានស្លាប់ដោយជំងឺកូវីដ-១៩ កាលពីថ្ងៃម្សិលមិញ ដែលធ្វើឱ្យចំនួនអ្នកស្លាប់សរុបកើនឡើងដល់ជិត២០០នាក់ ខណៈអ្នកឆ្លងថ្មីមានជាង៦៤០នាក់។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី២៧ ខែឧសភា ឆ្នាំ២០២១ បានឱ្យដឹងថា អ្នកស្លាប់ដោយ ជំងឺកូវីដ-១៩ ដែលបានរកឃើញ មានចំនួន៤នាក់ និងករណីឆ្លងថ្មីមានចំនួន៦៤៩នាក់ ស្របពេលអ្នកជាសះស្បើយថ្មីមានចំនួន៦២៦នាក់ ។
យោងតាមលិខិតរបស់រដ្ឋបាលខេត្តកំពង់ឆ្នាំងដែលផ្ញើជូនក្រសួងមហាផ្ទៃ បានឱ្យដឹងដែរថា កាលពីថ្ងៃម្សិលមិញ ក៏មានស្ត្រីជនជាតិចិនម្នាក់អាយុ៥១ឆ្នាំ បានស្លាប់ដោយសារជំងឺកូវីដ-១៩នេះដែរ។
លិខិតដដែលនោះបន្តថា ស្រ្តីជនជាតិចិនដែលស្លាប់នោះជាបុគ្គលិកបម្រើការងារនៅរោងចក្រ ហឺរ៉ាយហ្សិន អៅដរ ខេមបូឌា ស្ថិតក្នុងភូមិផ្សារត្រាច ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង ដោយបានរកឃើញតេស្តវិជ្ជមានវីរុសកូវីដ-១៩ កាលពីថ្ងៃទី១៧ ខែឧសភា និងត្រូវបានបញ្ជូនទៅសម្រាកព្យាបាលនៅមណ្ឌលព្យាបាលកំពង់ត្រឡាច។
លិខិតនោះបញ្ជាក់ទៀតថា នៅថ្ងៃទី២៣ ខែឧសភា ស្ត្រីរូបនោះមានអាការហត់ ពិបាកដកដង្ហើម ហើយត្រូវបានក្រុមគ្រូពេទ្យបញ្ជូនទៅមន្ទីរពេទ្យខេត្ត ប៉ុន្តែពុំអាចជួយសង្គ្រោះបាន បណ្តាលឱ្យស្លាប់នៅរសៀលថ្ងៃទី២៦ ខែឧសភា ឆ្នាំ២០២១។
បើតាមក្រសួងសុខាភិបាល គិតត្រឹមព្រឹកថ្ងៃទី២៧ ខែឧសភា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន២៧ ៦៣៨នាក់ ក្នុងនោះ អ្នកជំងឺព្យាបាលជាសះស្បើយសរុបមានចំនួន២០ ៣៩៨នាក់ និងអ្នកស្លាប់សរុប១៩៤នាក់៕
