អាជ្ញាធរខេត្តបាត់ដំបង បានឱ្យដឹងថា សមត្ថកិច្ចកំពុងបំពេញបែបបទបញ្ជូនមេខ្យល់ម្នាក់និងតៃកុងឡាន២នាក់បញ្ជូនទៅតុលាការចាត់វិធានការផ្លូវច្បាប់ បន្ទាប់ពីរកឃើញថា ពួកគេនាំពលករជិត៣០នាក់ដែលបម្រុងនឹងឆ្លងដែនខុសច្បាប់ទៅប្រទេសថៃ ស្ថិតក្នុងភូមិសាស្ត្រស្រុកកំរៀង ខេត្តបាត់ដំបង។
អភិបាលខេត្តបាត់ដំបង លោក ងួន រតនៈ មានប្រសាសន៍នៅថ្ងៃអាទិត្យទី៣០ ខែឧសភា ឆ្នាំ២០២១នេះថា គណៈបញ្ជាការកងឯកភាពស្រុកកំរៀង រួមមាន កម្លាំងកងការពារព្រំដែនលេខ៥០៤ កងរាជអាវុធហត្ថ កម្លាំងនគរបាល បានឃាត់ខ្លួនមេខ្យល់ម្នាក់និងតៃកុងឡាន២នាក់ដែលបានដឹកនាំពលករចំនួន២៦នាក់ឆ្លងដែនដោយខុសច្បាប់បម្រុងទៅប្រទេសថៃ ស្ថិតក្នុងភូមិសាស្ត្រស្រុកកំរៀង កាលពីថ្ងៃទី២៩ ខែឧសភា ឆ្នាំ២០២១។
មេខ្យល់និងតៃកុងឡាននោះ រួមមាន មេខ្យល់ឈ្មោះ វង្ស ភឿត ភេទប្រុស អាយុ២៩ឆ្នាំ រស់នៅក្នុងភូមិអូរជ្រៃ ស្រុកកំរៀង និងតៃកុងឡានឈ្មោះ កាន់ ឌីណា ព្រមទាំងឈ្មោះ គង់ ថង ភេទប្រុស អាយុ៤០ឆ្នាំ រស់នៅក្នុងភូមិស្ដៅ ឃុំស្ដៅ ស្រុករតនមណ្ឌល ហើយប្រតិបត្តិការនេះក៏បានឃាត់រថយន្ត២គ្រឿងផងដែរ។
អភិបាលខេត្តរូបនោះបញ្ជាក់ថា បច្ចុប្បន្ន សមត្ថកិច្ចកំពុងសួរចម្លើយហើយរៀបចំសំណុំរឿងបញ្ជូនខ្លួនមនុស្សទាំង៣នាក់ ទៅតុលាការ ដើម្បីចាត់វិធានការច្បាប់ ខណៈពលករ២៦នាក់ត្រូវបានឱ្យធ្វើកិច្ចសន្យា ហើយអនុញ្ញាតឱ្យត្រឡប់ទៅផ្ទះនៅស្រុកកំណើតវិញ។
លោកមានប្រសាសន៍ថា៖ «មេខ្យល់និងតៃកុងឡាន យើងនឹងបញ្ជូនទៅតុលាការ គាត់គប់គិតគ្នា។ រីឯពលរដ្ឋ២៦នាក់ គាត់ចាញ់បោកគេ[មេខ្យល់] អ៊ីចឹងយើងអប់រំគាត់និងធ្វើកិច្ចសន្យាឱ្យគាត់ទៅផ្ទះវិញ»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត គាំទ្រចំពោះវិធានការរបស់អាជ្ញាធរ ក្នុងការទប់ស្កាត់និងឃាត់ខ្លួនមេខ្យល់ រួមទាំងតៃកុងឡានពេលនេះ ដើម្បីចាត់វិធានការច្បាប់។
លោកផ្តល់ជាអនុសាសន៍ថា អាជ្ញាធរត្រូវធ្វើការស្រាវជ្រាវបន្ថែមទៀតរកអ្នកពាក់ព័ន្ធ ជាពិសេសមន្ត្រីនៅតាមព្រំដែន ដើម្បីយកទៅអនុវត្តតាមច្បាប់ធ្វើជាគំរូល្អ កុំឱ្យអ្នកដទៃប្រព្រឹត្តខុសបែបនេះទៀត និងកុំឱ្យប៉ះពាល់ដល់ពលរដ្ឋចំណាកស្រុកខុសច្បាប់ទៅក្រៅប្រទេសនៅថ្ងៃក្រោយបន្តទៀត។
លោកផ្តល់ជាអនុសាសន៍ថា៖ «ការជួញដូរមនុស្សនេះ មិនមែនមានតែក្រុមគាត់ [មេខ្យល់ និងតៃកុងឡាន] ធ្វើបានទេ វាអាចជាលក្ខណៈប្រព័ន្ធ ត្រូវតែរកឫសគល់ថានៅតាមច្រករបៀងដែលអនុញ្ញាតឱ្យនាំមនុស្សចេញបានពាក់ព័ន្ធនឹងអ្នកណាខ្លះ ហើយបើសិនជាពាក់ព័ន្ធជាមួយកងកម្លាំងដែលការពារព្រំដែនដែលគប់គិតថាឱ្យនាំចេញ ត្រូវអនុវត្តតាមច្បាប់ដូចគ្នា ដើម្បីជាគំរូល្អ កុំឱ្យអ្នកពាក់ព័ន្ធដទៃទៀតអនុវត្តតាម»។
ពាក់ព័ន្ធការជួញដូរមនុស្សនេះដែរ កាលពីថ្ងៃទី១៦ ខែកុម្ភៈ ឆ្នាំ២០២១ ចៅក្រមស៊ើបសួរសាលាដំបូងខេត្ដបាត់ដំបង បានសម្រេចចោទប្រកាន់អតីតអធិការនគរបាលស្រុកកំរៀង លោក គឹម ពន្លក ពីបទនាំចេញដោយមិនស្របច្បាប់សម្រាប់នាំឆ្លងដែន តាមច្បាប់ស្ដីពីការបង្ក្រាបអំពើជួញដូរមនុស្ស និងអំពើអាជីវកម្មផ្លូវភេទ តាមមាត្រា៨ និងមាត្រា១១ ព្រមទាំងបញ្ជាឱ្យឃុំខ្លួនអតីតអធិការស្រុកកំរៀងរូបនេះដាក់ពន្ធនាគារជាបណ្តោះអាសន្នទៀតផង។
លោក គឹម ពន្លក ត្រូវបានលោកនាយករដ្ឋមន្ដ្រី ហ៊ុន សែន ចេញអនុក្រឹត្យឱ្យអនុវត្ដពិន័យមន្ដ្រីនគរបាលជាតិ ដោយសម្រេចដកហូតនិងបណ្ដេញចេញពីក្របខណ្ឌមន្ដ្រីនគរបាលជាតិកម្ពុជា កាលពីថ្ងៃទី១៥ ខែកុម្ភៈ ពាក់ព័ន្ធការដោះលែងមេខ្យល់នាំពលករចេញ-ចូលតាមច្រកព្រំដែនកម្ពុជា-ថៃដោយខុសច្បាប់ និងគេចវេះពីវិធានការធ្វើចត្តាឡីស័ករបស់ក្រសួងសុខាភិបាលទៀតផង។
របាយការណ៍របស់ក្រសួងការងារសម្រាប់ឆ្នាំ២០១៨ ដែលចេញផ្សាយនៅដើមឆ្នាំមុន បញ្ជាក់ថា ពលករខ្មែរជាង១លាន១សែននាក់ កំពុងធ្វើការនៅប្រទេសថៃ ដោយចំនួននេះ ក្រសួងមិនបានបង្ហាញពីតួលេខអ្នកដែលទៅធ្វើការដោយខុសច្បាប់នៅប្រទេសថៃនៅឡើយទេ។
របាយការណ៍ចេញផ្សាយដោយអង្គការអន្តរជាតិខាងការងារ (ILO) ចេញផ្សាយកាលពីចុងខែមេសា ឆ្នាំ២០២០ បង្ហាញថា យ៉ាងតិចណាស់មានពលករចំណាកស្រុកស្របច្បាប់ជាង២លាន៧សែននាក់ និងពលករខុសច្បាប់ជាច្រើនម៉ឺននាក់ផ្សេងទៀតជាប់ក្នុងប្រទេសថៃ ដែលភាគច្រើនជាពលករមកពីកម្ពុជា ឡាវ និងមីយ៉ាន់ម៉ា៕
