ក្រសួងសុខាភិបាល នៅល្ងាចម្សិលមិញនេះ បានប្រកាសរកឃើញមេរោគកូវីដ-១៩ បំប្លែងខ្លួនថ្មីប្រភេទ B.1.617 នៅលើខ្លួនពលករខ្មែរ៣នាក់ដែលវិលត្រឡប់មកពីប្រទេសថៃ ខណៈពិភពលោកកំពុងព្រួយបារម្ភខ្លាំងពីប្រភេទមេរោគបំប្លែងខ្លួនថ្មីនេះ។
ក្នុងសេចក្ដីជូនដំណឹងរបស់ក្រសួងសុខាភិបាលចុះថ្ងៃទី០៤ ខែមិថុនា ឆ្នាំ២០២១ ឱ្យដឹងថា ការរកឃើញមេរោគកូវីដ-១៩ បំប្លែងខ្លួនថ្មីនេះធ្វើឡើងបន្ទាប់មន្ត្រីសុខាភិបាលបានយកសំណាកពលករខ្មែរ៣នាក់ មកធ្វើតេស្ត Sequencing នៅវិទ្យាស្ថានប៉ាស្ទ័រកម្ពុជា។
ក្រសួងបន្តថា ពលករទាំង៣នាក់ដែលត្រូវបានរកឃើញមេរោគកូវីដ-១៩បំប្លែងខ្លួនថ្មីប្រភេទ B.1.617 បន្ទាប់ពីពួកគេត្រឡប់មកពីប្រទេសថៃ តាមច្រកអូរស្មាច់។ បច្ចុប្បន្ន ពួកគេត្រូវបានដាក់ឱ្យសម្រាកព្យាបាលនៅមន្ទីរពេទ្យបង្អែកខេត្តឧត្តរមានជ័យ និងខេត្តបាត់ដំបង រៀងៗខ្លួន ដែលរួមមាន ស្ត្រីវ័យ២៧ឆ្នាំកំពុងសម្រាកព្យាបាលនៅឯមន្ទីរពេទ្យខេត្តឧត្តរមានជ័យ, បុរសអាយុ៤៦ឆ្នាំ កំពុងសម្រាកព្យាបាលនៅមន្ទីរពេទ្យឯកភ្នំ ខេត្តបាត់ដំបង និងស្ត្រីវ័យ៤៣ឆ្នាំកំពុកសម្រាកនៅមន្ទីរពេទ្យមោងឫស្សី ខេត្តបាត់ដំបង។
បើតាមក្រសួងសុខាភិបាលបានកត់សម្គាល់ថា វីរុសបំប្លែងខ្លួនថ្មីប្រភេទ B.I.617 ត្រូវបានគេរកឃើញនៅបណ្តាប្រទេសចំនួន៧នៅតំបន់អាស៊ាន ក្នុងនោះ មានប្រទេសឥណ្ឌូនេស៊ី ប្រទេសម៉ាឡេស៊ី ប្រទេសហ្វីលីពីន ប្រទេសសិង្ហបុរី ប្រទេសថៃ ប្រទេសវៀតណាម និងបណ្តាប្រទេសមួយចំនួនទៀត ដែលពិភពលោកកំពុងមានការព្រួយបារម្ភជាខ្លាំង។
ករណីនេះ ក្រសួងបានអំពាវនាវឱ្យទៅមន្ទីរសុខាភិបាលខេត្តទាំងអស់ឱ្យបង្កើនការយកចិត្តទុកដាក់និងអនុវត្តឱ្យបានត្រឹមត្រូវតាមគោលការណ៍ប្រតិបត្តិស្ដង់ដារបច្ចេកទេសការពារការចម្លងពីបុគ្គលម្នាក់ទៅម្នាក់ទៀត។ ក្នុងនោះ ត្រូវដាក់អ្នកជំងឺឱ្យនៅដោយឡែកពីគ្នា និងបន្តការស្រាវជ្រាវដោយហ្មត់ចត់ លើករណីដែលសង្ស័យឬពាក់ព័ន្ធទៅនឹងការចម្លងបន្តគ្នាផ្សេងៗទៀតនៅតាមទីតាំងដែលមានការរកឃើញករណីវិជ្ជមានវីរុសកូវីដ-១៩។
ក្រៅពីណែនាំទៅមន្ទីរសុខាភិបាលខេត្ត ក្រសួងសុខាភិបាលអំពាវនាវនិងក្រើនរំឭកឱ្យប្រជាពលរដ្ឋទាំងអស់ត្រូវចូលរួមអនុវត្តវិធានការសុខាភិបាល «៣ការពារ និង៣កុំ» ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងបញ្ចៀសបាននូវការចម្លងទ្រង់ទ្រាយធំក្នុងសហគមន៍កម្ពុជា។
គិតត្រឹមថ្ងៃទី៤ ខែមិថុនា ម្សិលមិញនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៣៣ ០៧៥នាក់ ក្នុងនោះ អ្នកជំងឺជាសះស្បើយសរុបមានចំនួន២៥ ៥៤៤នាក់ ព្រមទាំងចំនួនអ្នកស្លាប់បានកើនឡើង២៤២នាក់ និងករណីនាំចូលពីក្រៅប្រទេសសរុប៩៩៤នាក់៕
