អ្នកជំងឺកូវីដ-១៩ ចំនួន១០នាក់ទៀតបានស្លាប់កាលពីម្សិលមិញនេះ ដែលធ្វើឱ្យចំនួនអ្នកស្លាប់ដោយសារជំងឺកូវីដ-១៩នៅកម្ពុជា កើនឡើងដល់២៥២នាក់ ខណៈអ្នកឆ្លងថ្មីមានចំនួន៥៣៨នាក់។
យោងតាមសេចក្ដីជូនដំណឹងរបស់ក្រសួងសុខាភិបាលចេញផ្សាយនៅថ្ងៃសៅរ៍ ទី៥ ខែមិថុនា ឆ្នាំ២០២១ ឱ្យដឹងថា ចំនួនអ្នកស្លាប់ដោយសារជំងឺកូវីដ-១៩ គិតត្រឹមថ្ងៃទី៥ ខែមិថុនា ឆ្នាំ២០២១ បានកើនដល់២៥២នាក់។
ក្រៅពីអ្នកស្លាប់ចំនួន១០នាក់ ក្រសួងក៏បានរកឃើញអ្នកឆ្លងជំងឺកូវីដ-១៩ថ្មី ចំនួន៥៣៨នាក់ ក្នុងនោះករណីនាំចូលពីក្រៅប្រទេសចំនួន២៩នាក់ ហើយអ្នកឆ្លងក្នុងព្រឹត្តិការណ៍សហគមន៍ចំនួន៥០៩នាក់ ខណៈអ្នកជំងឺដែលព្យាបាលជាសះស្បើយចំនួន៥៣៤នាក់។
ទាក់ទងនឹងជំងឺកូវីដ-១៩នេះ ក្រសួងសុខាភិបាលទើបបានប្រកាសពីម្សិលមិញពីការរកឃើញមេរោគកូវីដ-១៩ បំប្លែងខ្លួនថ្មីប្រភេទ B.1.617 នៅលើខ្លួនពលករខ្មែរ៣នាក់ដែលទើបត្រឡប់មកពីប្រទេសថៃ។ B.1.617 ជាប្រភេទវីរុសបំប្លែងខ្លួនថ្មី ដែលពិភពលោកកំពុងព្រួយបារម្ភខ្លាំង។
ករណីនេះ ក្រសួងណែនាំទៅមន្ទីរសុខាភិបាលខេត្តទាំងអស់ឱ្យបង្កើនការយកចិត្តទុកដាក់និងអនុវត្តឱ្យបានត្រឹមត្រូវតាមគោលការណ៍ប្រតិបត្តិស្ដង់ដារបច្ចេកទេសការពារការចម្លងពីបុគ្គលម្នាក់ទៅម្នាក់ទៀត។ ក្នុងនោះ ត្រូវដាក់អ្នកជំងឺឱ្យនៅដោយឡែកពីគ្នា និងបន្តការស្រាវជ្រាវដោយហ្មត់ចត់លើករណីដែលសង្ស័យឬពាក់ព័ន្ធទៅនឹងការចម្លងបន្តគ្នាផ្សេងៗទៀតនៅតាមទីតាំងដែលមានការរកឃើញករណីវិជ្ជមានវីរុសកូវីដ-១៩។
បើតាមក្រសួងសុខាភិបាល គិតត្រឹមថ្ងៃទី៥ ខែមិថុនានេះ កម្ពុជារកឃើញអ្នកឆ្លងជំងឺកូវីដ-១៩ សរុប៣៣ ៦១៣នាក់ ក្នុងនោះ អ្នកជំងឺជាសះស្បើយចំនួន២៦ ០៧៨នាក់ ហើយអ្នកស្លាប់ចំនួន២៥២នាក់ និងករណីនាំចូលពីក្រៅប្រទេសសរុប១ ០៥៣នាក់៕
