លោកស្រី ជឹង សុគន្ធាវី ដែលជាអគ្គនាយិកាក្រុមហ៊ុនផលិតទឹកសុទ្ធវីតាល់ ហើយក៏ជាអគ្គនាយិកាក្រុមហ៊ុនផលិតមីជាតិ ត្រូវបានផ្តល់គោរមងារជា «អ្នកឧកញ៉ា»។
ស្ត្រីរូបនេះត្រូវជាកូនស្រីបង្កើតរបស់លោកស្រី ជឹង សុភាព ហៅ «យាយភូ» អនុប្រធានកាកបាទក្រហមកម្ពុជា។
យោងតាមព្រះរាជក្រឹត្យ ចុះថ្ងៃទី០៤ ខែមករា ឆ្នាំ២០២១ ដែល វីអូឌី ទើបទទួលបាន ឱ្យដឹងថា ការផ្តល់គោរមងារជា«អ្នកឧកញ៉ា» ដល់លោកស្រី ជឹង សុគន្ធាវី ធ្វើឡើងតាមសំណើរបស់លោកនាយករដ្ឋមន្ត្រី ហ៊ុន សែន ខណៈអ្នកស្រីធ្លាប់ត្រូវបានផ្តល់គោរមងារជាឧកញ៉ាម្តងរួចមកហើយកាលពីថ្ងៃទី១៤ ខែវិច្ឆិកា ឆ្នាំ២០០៩។ លោកស្រី ជឹង សុគន្ធាវី ជាភរិយារបស់ឧត្តមសេនីយ៍យោធា ឡាវ វ៉ាន់ ដែលលោក ឡាវ វ៉ាន់ គឺកូនប្រុសបង្កើតប្រពន្ធមុនរបស់លោកឧកញ៉ា ឡាវ ម៉េងឃីន សមាជិកព្រឹទ្ធសភាមកពីគណបក្សប្រជាជនកម្ពុជា មុនពេលលោកបានក្លាយជាស្វាមីលោកស្រី ជឹង សុភាព។
លោកស្រី ជឹង សុភាព ហៅ «យាយភូ» ដែលត្រូវជាម្តាយ ទទួលបានការតែងតាំងជាឧកញ៉ាដោយព្រះរាជក្រឹត្យកាលពីថ្ងៃទី០៨ ខែវិច្ឆិកា ឆ្នាំ២០០៦។ ដោយឡែក លោក ឡាវ ម៉េងឃីន ទទួលបានការតែងតាំងជាឧកញ៉ាដោយព្រះរាជក្រឹត្យកាលពីថ្ងៃទី២៧ ខែមិថុនា ឆ្នាំ១៩៩៥។ ចំណែកលោក ឡាវ វ៉ាន់ ដែលមានក្របខណ្ឌជានាយទាហានថ្នាក់ឧត្តមសេនីយ៍នៃកងយោធពលខេមរភូមិន្ទក្រសួងការពារជាតិ ដែលជាស្វាមីលោកស្រី ជឹង សុគន្ធាវី និងត្រូវជាកូនប្រុសរបស់លោកឧកញ៉ា ឡាវ ម៉េងឃីន ទទួលបានការតែងតាំងជាឧកញ៉ា កាលពីថ្ងៃទី០៩ ខែកុម្ភៈ ឆ្នាំ២០០៦។
ក្រោយមក ឧកញ៉ា ឡាវ វ៉ាន់ ក៏ត្រូវបានបញ្ចប់គោរមងារជាឧកញ៉ាវិញ ត្រឹមរក្សាទុកក្របខណ្ឌជានាយទាហានថ្នាក់ឧត្តមសេនីយ៍នៃកងយោធពលខេមរភូមិន្ទក្រសួងការពារជាតិ (ឋានន្តរសក្តិឧត្តមសេនីយ៍ទោ) ដោយព្រះរាជក្រឹត្យកាលពីថ្ងៃទី២៦ ខែកញ្ញា ឆ្នាំ២០១៩។ មុខតំណែងលោកឧត្តមសេនីយ៍យោធា ឡាវ វ៉ាន់ ក្នុងក្របខណ្ឌកងយោធពលខេមរភូមិន្ទក្រសួងការពារជាតិ គឺជាមេបញ្ជាការរងនៃបញ្ជាការដ្ឋានកងពលតូចលេខ៧០។
បើតាមអនុក្រឹត្យមួយកាលពីខែមីនា ឆ្នាំ២០១៧ រាជរដ្ឋាភិបាលបានសម្រេចថា សប្បុរសជនដែលបានធ្វើអំណោយជូនរដ្ឋ ជាថវិកាក្ដី ជាសម្ភារក្ដី ប្រសិនបើមានតម្លៃលើសពី១០ម៉ឺនដុល្លារ រដ្ឋនឹងជូនមេដាយស្ថាបនាជាតិថ្នាក់លេខ១។
ចំណែកសប្បុរសជនដែលបានធ្វើអំណោយជូនរដ្ឋក្នុងតម្លៃលើសពី៥០ម៉ឺនដុល្លារឡើងទៅ នឹងត្រូវរដ្ឋាភិបាលស្នើថ្វាយសុំព្រះមហាក្សត្រព្រះរាជទានគោរមងារជា «ឧកញ៉ា»៕
