ធនាគារពិភពលោក (World Bank) បាននិយាយថា អត្រាកំណើនសេដ្ឋកិច្ចកម្ពុជាឆ្នាំ២០២១នេះ គឺអាស្រ័យស្ទើរតែទាំងស្រុងទៅលើសភាពនៃការរាលដាលនៃវីរុស និងល្បឿននៃការចាក់វ៉ាក់សាំងការពារជំងឺកូវីដ-១៩។
នៅក្នុងរបាយការណ៍បច្ចុប្បន្នភាពសេដ្ឋកិច្ចរបស់កម្ពុជា ក្រោមចំណងជើងថា «ដំណើរឆ្ពោះទៅការរើបឡើងវិញ» ចេញផ្សាយកាលពីថ្ងៃទី១៦ ខែមិថុនា របស់ធនាគារពិភពលោក (World Bank) បានឱ្យដឹងថា សេដ្ឋកិច្ចរបស់កម្ពុជាកំពុងងើបឡើងវិញបន្តិចម្តងៗហើយ ជាមួយការព្យាករទុកថា វានឹងទទួលបានកំណើនជិត ៤ភាគរយ ក្នុងឆ្នាំ២០២១ បន្ទាប់ពីរួញទំហំអស់ ៣,១ភាគរយ កាលពីឆ្នាំ២០២០។
ក៏ប៉ុន្តែរបាយការណ៍នេះ ក៏បានពិនិត្យមើលសេណារីយ៉ូអវិជ្ជមានដែរ ថាបើកម្មវិធីចាក់វ៉ាក់សាំងមានសភាពយឺតយ៉ាវ ហើយវិធានការបិទខ្ទប់ទូទាំងប្រទេសនៅតែមានភាពញឹកញាប់និងអូសបន្លាយយូរនោះ ការព្យាករកំណើនសេដ្ឋកិច្ចនេះ គឺមានត្រឹមតែ ១ភាគរយ ប៉ុណ្ណោះ នៅឆ្នាំ២០២១។
ប្រធានគ្រប់គ្រងការិយាល័យធនាគាពិភពលោកប្រចាំកម្ពុជា លោកស្រី អ៊ិនហ្គូណា ដូប្រាចា មានប្រសាសន៍ថា៖ «ដូចប្រទេសជាច្រើនទៀតនៅក្នុងតំបន់ដែរ កម្ពុជាបានរងការប៉ះទង្គិចខ្លាំងពីការធ្លាក់ចុះនៃតម្រូវការលើសកលលោកដោយសារតែកូវីដ-១៩។ ប៉ុន្តែដំណឹងល្អនៅត្រង់ថា កម្ពុជាបានចាក់វ៉ាក់សាំងឱ្យមនុស្សក្នុងប្រទេសបានជាង៣លាននាក់រួចហើយ ដែលជាអត្រាខ្ពស់មួយនៅក្នុងតំបន់»។
លោកនាយករដ្ឋមន្ត្រី ហ៊ុន សែន កាលពីថ្ងៃទី២៩ ខែឧសភា បានប្រកាសថា កម្ពុជាមានគម្រាងចាក់វ៉ាក់សាំងការពារជំងឺកូវីដ-១៩ ជាដំណាក់កាលៗដល់ប្រជាពលរដ្ឋរបស់ខ្លួនដែលមានអាយុចាប់ពី១៨ឆ្នាំឡើងទៅ ឱ្យបាន១០លាននាក់ នៅត្រឹមចុងឆ្នាំ២០២១ ឬដើមឆ្នាំ២០២២ខាងមុខ។ ហើយបើគិតត្រឹមថ្ងៃទី១៧ ខែមិថុនា ម្សិលមិញ កម្ពុជាបានចាក់វ៉ាក់សាំងការពារជំងឺកូវីដ-១៩ លើកទី១ ជូនដល់ប្រជាពលរដ្ឋរបស់ខ្លួនបានចំនួន៣ ១៩៩ ៦៤២នាក់ហើយ។
បើតាមធនាគារពិភពលោក ខណៈដែលវិស័យមួយចំនួនមានការរីកចម្រើន ផ្នែកដទៃទៀតនៅគាំងទ្រឹង ដោយសារតែការរាតត្បាតនៃជំងឺកូវីដ-១៩។ វិស័យកសិកម្មនៅរក្សាភាពធន់បានគួរសម ដោយសារតែមានតម្រូវការខ្លាំង អមដោយការនាំចេញក្រោមកិច្ចព្រមព្រៀងពាណិជ្ជកម្មសេរីដែលកម្ពុជានិងចិនបានចុះហត្ថលេខាជាមួយគ្នា។
ចំណែកផ្នែកឧស្សាហកម្មផលិតវិញ របាយការណ៍ថា ក៏បានរើបឡើងវិញជាបណ្តើរៗដែរ ដោយត្រូវសម្របខ្លួនទៅតាមលក្ខខណ្ឌប្រែប្រួលនៅខាងក្រៅ។ រីឯអាជីវកម្មបោះដុំនិងលក់រាយ បានប្រឹងរើបឡើងវិញយឺតៗដែរ នៅពេលដែលសកម្មភាពសេដ្ឋកិច្ចក្នុងស្រុកងើបឡើងវិញបន្តិចម្តងៗ។ ផ្ទុយទៅវិញ ផ្នែកនានានៃវិស័យសេវា ដូចជា ផ្នែកស្នាក់នៅ ភោជនីយដ្ឋាន និងផ្នែកដឹកជញ្ជូន នៅតែបន្តរងការប៉ះទង្គិចខ្លាំងពីការធ្លាក់ចុះនៃទេសចរណ៍ក្នុងស្រុកនិងអន្តរជាតិ។ ការវិនិយោគផ្ទាល់ពីបរទេសនៅតែហូរចូលឥតដាច់ ព្រមទាំងជួយទ្រទ្រង់ដល់វិស័យក្រៅប្រទេសផងដែរ។
របាយការណ៍បច្ចុប្បន្នភាពនេះ ផ្តល់អនុសាសន៍ថា កម្ពុជាគួរតែចាត់វិធានការភ្លាមៗដើម្បីលើកកម្ពស់ភាពជឿជាក់របស់ទីផ្សារ តាមរយៈការពន្លឿនកម្មវិធីចាក់វ៉ាក់សាំង ទន្ទឹមគ្នានឹងការប្រឹងប្រែងទប់ស្កាត់ការឆ្លងវីរុសនិងការស្លាប់ឱ្យមានប្រសិទ្ធភាពបន្តទៀត។
ដោយសារតែកម្ពុជានៅមានសមត្ថភាពហិរញ្ញវត្ថុល្មមដែរ របាយការណ៍នេះថា រដ្ឋាភិបាលអាចបន្តការគាំទ្រដល់កម្មវិធីសង្គ្រោះ ស្តារឡើងវិញ និងកំណើន ដោយធ្វើការកែលម្អបរិយាកាសធុរកិច្ចនិងវិនិយោគ ផ្តល់កម្មវិធីគាំពារសង្គម និងជំរុញការវិនិយោគសាធារណៈ និងកំណើនសេដ្ឋកិច្ចដែលគិតគូរដល់អ្នកក្រីក្រ។ ដើម្បីរក្សាបានស្ថិរភាពនៃវិស័យហិរញ្ញវត្ថុ ជារឿងសំខាន់មួយដែរ ដែលអាជ្ញាធររដ្ឋាភិបាលត្រូវបន្តតាមដានឱ្យបានដិតដល់លើភាពងាយរងគ្រោះ ដែលអាចបណ្តាលមកពីការពុះកញ្ជ្រោលយូរពេករបស់វិស័យអចលនទ្រព្យ និងការផ្តល់ឥណទានកាន់តែច្រើនឡើងចំពោះវិស័យសំណង់។
គួរជម្រាបជូនថា កាលពីឆ្នាំ២០២០ អត្រាកំណើនសេដ្ឋកិច្ចកម្ពុជាបានធ្លាក់ចុះដល់ -៣,១% ដែលជាអត្រាធ្លាក់ចុះមិនធ្លាប់មាន បន្ទាប់ពីបានស្គាល់កំណើនក្នុងរង្វង់ជាមធ្យម ៧% ក្នុងរយៈពេលជិត១ទសវត្សរ៍៕
