លោកនាយករដ្ឋមន្ត្រី ហ៊ុន សែន បានប្រកាសលុបចោលជំនួបទាំងអស់ ចាប់ពីថ្ងៃទី១៩ ខែមិថុនា ដល់ថ្ងៃទី៣ ខែកក្កដា បន្ទាប់ពីលោកត្រូវធ្វើចត្តាឡីស័ករយៈពេល១៤ថ្ងៃ ក្រោយជាប់ពាក់ព័ន្ធដោយប្រយោលជាមួយអ្នកកើតជំងឺកូវីដ១៩។
លោកនាយករដ្ឋមន្ត្រី បានសរសេរនៅលើទំព័រហ្វេសប៊ុកផ្លូវការរបស់លោកនៅល្ងាចថ្ងៃសៅរ៍នេះថា ក្រុមគ្រូពេទ្យបានតម្រូវឱ្យលោកធ្វើតេស្តនិងធ្វើចត្តាឡីស័ករយៈពេល១៤ថ្ងៃ ចាប់ពីល្ងាចថ្ងៃទី១៩ ខែមិថុនា រហូតដល់ថ្ងៃទី៣ ខែកក្កដា ឆ្នាំ២០២១ បន្ទាប់ពីលោកបានជាប់ពាក់ព័ន្ធដោយប្រយោលជាមួយអ្នកកើតជំងឺកូវីដ១៩។ ប៉ុន្តែលោកមិនបញ្ជាក់ថា តើអ្នកជំងឺរូបណា និងនៅទីណានោះទេ។
លោកនាយករដ្ឋមន្ត្រី ក៏បានសូមអភ័យទោសដែលត្រូវលុបចោលកម្មវិធីជួបជុំទាំងអស់ដែលបានគ្រោងទុក រាប់ទាំងការជួបផ្ទាល់ ទាំងការជួបតាមវីដេអូ ជាពិសេសជំនួបជាមួយរដ្ឋមន្ត្រីការបរទេសអង់គ្លេសដែលគ្រោងធ្វើនៅព្រឹកថ្ងៃទី២៣ ខែមិថុនា ខាងមុខនេះ។
តែទោះជាយ៉ាងនេះក្តី លោកនាយករដ្ឋមន្ត្រីអះអាងថា លោកនៅតែបំពេញការងារជាធម្មតាជាមួយគ្រប់ស្ថាប័នទាំងស៊ីវិល ទាំងកងកម្លាំងប្រដាប់អាវុធ រាប់ទាំងការប្រជុំតាម ZOOM ផង ដោយសារបច្ចេកទេសនេះមិនតម្រូវឱ្យមានមនុស្សចូលមកជិតលោកនោះទេ៕
