អ្នកជំងឺ១៨នាក់ទៀតបានស្លាប់ដោយជំងឺកូវីដ-១៩ ខណៈអ្នកឆ្លងថ្មីមានជាង៦០០នាក់ទៀត ដែលធ្វើឱ្យអ្នកឆ្លងជំងឺនេះសរុបកើនដល់ជាង៤៤ ០០០នាក់។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី២២ ខែមិថុនា ឆ្នាំ២០២១ បានឱ្យដឹងថា អ្នកស្លាប់ដោយ ជំងឺកូវីដ-១៩ កាលពីថ្ងៃម្សិលមិញ មានចំនួន១៨នាក់បន្ថែមទៀត និងករណីឆ្លងថ្មីមានចំនួន៦៧៨នាក់ ស្របពេលអ្នកជាសះស្បើយថ្មីមានចំនួន៧៦៣នាក់។
បើតាមក្រសួងសុខាភិបាល គិតត្រឹមព្រឹកថ្ងៃអង្គារនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៤៤ ១២៤នាក់ ក្នុងនោះ អ្នកជំងឺព្យាបាលជាសះស្បើយមានចំនួន៣៨ ៧៦៦នាក់ អ្នកស្លាប់សរុប៤៥៩នាក់ និងករណីនាំចូលពីក្រៅប្រទេសសរុប១ ៧៩៩នាក់៕
