រដ្ឋបាលរាជធានីភ្នំពេញ ព្រមានចាត់វិធានការច្បាប់លើបុគ្គលណាដែលបំពាននឹងវិធានការហាមឃាត់ការធ្វើដំណើរ ការជួបជុំ ឬការប្រមូលផ្តុំមនុស្សក្នុងភូមិសាស្ត្រ «តំបន់លឿង» ក្នុងខណ្ឌពោធិ៍សែនជ័យ ខណៈអាជ្ញាធរកំពុងទប់ស្កាត់ការឆ្លងរាលដាលនៃជំងឺកូវីដ-១៩នៅតំបន់នោះបន្ថែមទៀត។
ក្នុងសេចក្តីសម្រេចរបស់រដ្ឋបាលរាជធានីភ្នំពេញ កាលពីថ្ងៃទី២៣ ខែមិថុនា ឆ្នាំ២០២១នេះ ឱ្យដឹងថា អាជ្ញាធររាជធានីភ្នំពេញ កាលពីថ្ងៃទី៨ ខែមិថុនា បានកំណត់ភូមិសាស្ត្រ «តំបន់លឿងទុំ» ដូចជា ភូមិចោមចៅ៣ នៃសង្កាត់ចោមចៅទី២ និងផ្នែកខ្លះនៃភូមិត្រពាំងពោធិ៍ ផ្នែកខ្លះនៃភូមិព្រៃព្រីងខាងជើង២ និងផ្នែកខ្លះនៃភូមិជម្ពូវ័ន២ នៃសង្កាត់ចោមចៅទី៣ ខណ្ឌពោធិ៍សែនជ័យ ជា «តំបន់លឿងទុំ» មកជា «តំបន់លឿង» វិញ សម្រាប់រយៈពេល១៤ថ្ងៃ គិតចាប់ពីម៉ោងសូន្យ នាថ្ងៃទី២៤ ខែមិថុនា ឆ្នាំ២០២១ រហូតដល់ថ្ងៃទី៧ ខែកក្កដា ឆ្នាំ២០២១ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
សេចក្តីសម្រេចដដែលឱ្យដឹងទៀតថា ចំពោះការធ្វើចរាចរណ៍គ្រប់ប្រភេទនៅក្នុងភូមិសាស្ត្រ «តំបន់លឿង» ត្រូវអនុញ្ញាតឱ្យប្រព្រឹត្តទៅធម្មតា ប៉ុន្តែការធ្វើដំណើរចេញ-ចូលត្រូវបានអនុញ្ញាតក្នុងករណីចាំបាច់ ដូចជា ការធ្វើដំណើរប្រកបមុខរបរ ឬអាជីវកម្ម ឬបំពេញការងារក្នុងវិស័យឯកជន ត្រូវមានលិខិតអនុញ្ញាតធ្វើដំណើរពីរដ្ឋបាលរាជធានីភ្នំពេញ អមដោយឯកសារបញ្ជាក់អត្តសញ្ញាណ និងលិខិតបញ្ជាក់ការងារ ឈ្មោះ មុខងារ និងប្រភេទអាជីវកម្មច្បាស់លាស់ជាដើម។
រីឯការធ្វើដំណើរទៅកាន់កន្លែងលក់ម្ហូបអាហារ ឬគ្រឿងឧបភោគបរិភោគ ឱសថស្ថាន និងទីកន្លែងលក់សម្ភារប្រើប្រាស់ប្រចាំថ្ងៃ ត្រូវបានការអនុញ្ញាតពីអាជ្ញាធរមានសមត្ថកិច្ច ហើយសកម្មភាពការងារ មុខរបរ និងអាជីវកម្មគ្រប់ប្រភេទនៅក្នុង «តំបន់លឿង» ត្រូវអនុញ្ញាតឱ្យបើកដំណើរការធម្មតា លើកលែងតែសាលារៀន សាលាបណ្តុះបណ្តាលវិជ្ជាជីវៈទាំងរដ្ឋនិងឯកជន ព្រមទាំងអាជីវកម្មផ្សេងទៀតដែលមានលក្ខណៈប្រមូលផ្តុំមនុស្សច្រើន។
សេចក្តីសម្រេចដដែលក៏បានហាមឃាត់មិនឱ្យមនុស្សលើសពី១០នាក់ជួបជុំ ឬការប្រមូលផ្តុំគ្នាជាលក្ខណៈឯកជនដែលមានការកកកុញច្រើន លើកលែងតែករណីចាំបាច់មួយចំនួន ប៉ុន្តែក្នុងករណីបុគ្គលទាំងឡាយណាល្មើសបម្រាមនេះ នឹងត្រូវឃាត់ទុកមធ្យោបាយធ្វើដំណើរ និងត្រូវអនុវត្តទោសទណ្ឌផងដែរ។
លិខិតរដ្ឋបាលរាជធានីភ្នំពេញសរសេរថា៖ «បុគ្គលឬនីតិបុគ្គលទាំងឡាយណាដែលបំពានវិធានការហាមឃាត់ការធ្វើដំណើរ វិធានការហាមឃាត់សកម្មភាពការងារ មុខរបរ ឬអាជីវកម្ម និងវិធានការហាមឃាត់រាល់ការជួបជុំ ឬប្រមូលផ្តុំមនុស្ស ក្នុងភូមិសាស្ត្រតំបន់លឿង នឹងត្រូវអនុវត្តច្បាប់យ៉ាងម៉ឺងម៉ាត់ ដោយរួមទាំងការឃាត់ទុកជាបណ្តោះអាសន្ននូវមធ្យោបាយធ្វើដំណើរ និងទណ្ឌកម្មរដ្ឋបាល ដោយអនុលោមតាមបទប្បញ្ញត្តិនិងនីតិវិធីជាធរមាន»។
រដ្ឋបាលរាជធានីភ្នំពេញ បន្តថា៖ «បន្ថែមពីលើវិធានការខាងលើ បុគ្គលឬនីតិបុគ្គលទាំងឡាយណាដែលមិនអនុវត្តតាមប្រការ២ នៃសេចក្តីសម្រេចនេះ នឹងត្រូវកសាងសំណុំរឿងបញ្ជូនទៅស្ថាប័នតុលាការ ដើម្បីផ្តន្ទាទោសដាក់ពន្ធនាគារនិងពិន័យជាប្រាក់ស្របតាមមាត្រា១០ និងមាត្រា១១ នៃច្បាប់ស្តីពីវិធានការទប់ស្កាត់ការឆ្លងរីករាលជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋានគតិយុត្តិពាក់ព័ន្ធជាធរមាន»។
បើតាមក្រសួងសុខាភិបាល គិតត្រឹមព្រឹកថ្ងៃពុធម្សិលមិញ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៤៤ ៧១១នាក់ ក្នុងនោះ អ្នកជំងឺព្យាបាលជាសះស្បើយសរុបមានចំនួន៣៩ ៣១៤នាក់ អ្នកស្លាប់សរុប៤៧៥នាក់ និងករណីនាំចូលពីក្រៅប្រទេសសរុប១ ៨៥៣នាក់៕
