មន្ត្រីអង្គការសង្គមស៊ីវិល លើកឡើងថា យុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត ហាក់មិនទាន់មានប្រសិទ្ធភាពនៅឡើយ ពិសេសសំណុំរឿងនយោបាយ និងសកម្មជនសិទ្ធិមនុស្ស ជាដើម។
ការលើកឡើងនេះ ក្រោយពេលក្រសួងយុត្តិធម៌បានចេញរបាយការណ៍មួយស្តីពីលទ្ធផលការងាររយៈពេល៣៩៥ថ្ងៃ ក្នុងយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត ចេញផ្សាយនៅថ្ងៃទី២៨ ខែមិថុនា ឆ្នាំ២០២១ ត្រូវបានបញ្ចប់។
ក្រសួងបន្តថា ការបិទបញ្ចប់យុទ្ធនាការនេះ ក្រសួងបានដោះស្រាយសំណុំរឿងព្រហ្មទណ្ឌតាមដំណាក់កាលអយ្យការ ដំណាក់កាលស៊ើបសួរ និងដំណាក់កាលជំនុំជម្រះ មានចំនួនសរុប ៣៧ ៩០០ ស្មើនឹង ៩៦% នៃសំណុំរឿងព្រហ្មទណ្ឌដែលកកស្ទះសរុបជិត ៤ម៉ឺនសំណុំរឿង (៣៩ ៥០០) ក្នុងនោះ សំណុំរឿងដែលត្រូវជំនុំជម្រះរួចមានជាង ១២ ៦០០ ស្មើនឹង ៩៧% នៃចំនួនសំណុំរឿងសរុបជាង ១៣ ០០០ ក្នុងដំណាក់កាលជំនុំជម្រះ។
ក្រសួងបន្ថែមទៀតថា យុទ្ធនាការនេះក៏បានដោះស្រាយរឿងព្រហ្មទណ្ឌដែលចូលថ្មីបានចំនួនជាង ៦២ ៨០០សំណុំរឿង ស្មើនឹងជាង ៧៨% នៃសំណុំរឿងចូលថ្មីសរុបចំនួន ៨០ ៦០០។
យ៉ាងនេះក្តី នាយករងអង្គការការពារសិទ្ធិមនុស្សលីកាដូ លោក អំ សំអាត ប្រាប់ វីអូឌី នៅថ្ងៃពុធនេះថា យុទ្ធនាការដោះស្រាយការកកស្ទះសំណុំរឿងទាំងនេះហាក់មិនទាន់មានប្រសិទ្ធភាពទេ ព្រោះរឿងធំៗមួយចំនួន ជាពិសេសរឿងនយោបាយ មិនទាន់បានបន្តនីតិវិធីឡើងវិញនៅឡើយ ក្រោមហេតុផលនៃការរីករាលដាលជំងឺកូវីដ-១៩ ដូចជា ករណីអតីតប្រធានគណបក្សសង្រ្គោះជាតិ លោក កឹម សុខា តែម្តង។
ប៉ុន្តែលោកទទួលស្គាល់ចំពោះយុទ្ធនាការនេះអាចជួយពន្លឿននីតិវិធីតាមសាលាដំបូងរាជធានី-ខេត្តបានខ្លះដែរ ដូចជា អាចជួយកាត់បន្ថយការកកស្ទះសំណុំរឿងនៅតុលាការ ជាដើម។
តែយ៉ាងណា លោក អំ សំអាត នៅតែបង្ហាញក្តីបារម្ភចំពោះស្ថានភាពចង្អៀតណែនក្នុងពន្ធនាគារ ខណៈការឆ្លងរាលដាលជំងឺកូវីដ-១៩ ក៏បានចូលទៅដល់ពន្ធនាគារមួយចំនួននៅកម្ពុជាផងដែរ។
លោកបន្តថា៖ «ដើម្បីកុំឱ្យយុទ្ធនាការនេះចេះតែបន្តកើតបន្ត ក្រសួងធ្វើម៉េចឱ្យសាលាដំបូងរាជធានី-ខេត្តត្រូវអនុវត្តជាប្រចាំឬជានិរន្តរ៍ ហើយសំណុំរឿងនិងនីតិវិធីធ្វើយ៉ាងម៉េចឱ្យមានភាពប្រក្រតី កុំទាល់តែមានយុទ្ធនាការពីក្រសួងទើបមកពន្លឿននីតិវិធី។ ប៉ុន្តែយុទ្ធនាការនេះ ក៏ជាគំរូមួយជំរុញឱ្យខាងសាលាដំបូងរាជធានី-ខេត្តបន្តអនុវត្តយុទ្ធនាការនេះ កុំឱ្យកកស្ទះសំណុំរឿងផងដែរ»។
មន្ត្រីសិទ្ធិមនុស្សដដែល ជំរុញឱ្យមានការអនុវត្តច្បាប់និងចាត់ចែងនីតិវិធីឱ្យមានតម្លាភាព សមភាព យុត្តិធម៌ និងស្នើពិចារណាឱ្យមានការដោះលែងទៅលើជនជាប់ឃុំមួយចំនួន ដូចជា អ្នកជាប់ឃុំបណ្តោះអាសន្នចំពោះបទល្មើសដែលបានពិនិត្យផ្លូវច្បាប់អាចឱ្យនៅក្រៅឃុំបាន ជាពិសេសសំណុំរឿងការចាប់ខ្លួនសកម្មជនបរិស្ថាន និងសកម្មជនសិទ្ធិមនុស្ស ដែលកំពុងរងការរិះគន់ជាខ្លាំងពីមជ្ឈដ្ឋានជាតិនិងអន្តរជាតិ។
អ្នកនាំពាក្យក្រសួងយុត្តិធម៌ លោក ជិន ម៉ាលីន ប្រាប់ វីអូឌី កាលពីថ្ងៃម្សិលមិញថា វាជាយុទ្ធនាការផ្តោតលើសំណុំរឿងព្រហ្មទណ្ឌនៅកម្ពុជា អត់មានសំណុំរឿងនយោបាយឬអ្នកទោសនយោបាយទេ។ លោកបន្តថា យុទ្ធនាការនេះក៏បានបង្ហាញពីលទ្ធផលជោគជ័យផងដែរ។
លោកបន្តទៀតថា៖ «ការលើកឡើងខុសនឹងទិដ្ឋភាពច្បាប់។ ចំណែកលទ្ធផលបង្ហាញពីជោគជ័យនៃការដោះស្រាយសំណុំរឿងកកស្ទះ ដោយសម្រេចបានរហូតដល់ ៩៦%»។
យ៉ាងណា កាលពីថ្ងៃទី៤ ខែមិថុនា មន្ត្រីជាន់ខ្ពស់ក្រសួងយុត្តិធម៌ លោក គឹម សន្តិភាព អះអាងថា ឆាប់ៗនេះ ក្រសួងនឹងអនុវត្តយន្តការដោះលែងទណ្ឌិតដែលអនុវត្តទោសជិតចប់តាមលក្ខខណ្ឌច្បាប់ ដើម្បីកាត់បន្ថយភាពចង្អៀតណែនក្នុងពន្ធនាគារ និងយន្តការមួយចំនួនទៀត។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា ធ្លាប់ឱ្យដឹងថា អ្នកជាប់ឃុំសរុបនៅទូទាំងប្រទេសមានចំនួនជិត៤០ ០០០នាក់។ ដោយឡែក អង្គការលើកលែងទោសអន្តរជាតិ (Amnesty International) កាលពីដើមឆ្នាំមុន បានបង្ហាញរបាយការណ៍មួយថា គិតត្រឹមខែមីនា ឆ្នាំ២០២០ អ្នកជាប់ឃុំនៅទូទាំងប្រទេសជិត៤០ ០០០នាក់ ខណៈពន្ធនាគាររបស់កម្ពុជាអាចដាក់អ្នកជាប់ឃុំបានប្រមាណ២៦ ០០០នាក់តែប៉ុណ្ណោះ៕
