អ្នកជំងឺចំនួន៣២នាក់ទៀតបានស្លាប់ក្នុងពេលតែមួយថ្ងៃដោយជំងឺកូវីដ-១៩ ដែលជាតួលេខមួយខ្ពស់មិនធ្លាប់មានចាប់តាំងពីមានព្រឹត្តិការណ៍សហគមន៍២០កុម្ភៈ ខណៈអ្នកឆ្លងមានជិត១ ០០០នាក់។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី០២ ខែកក្កដា ឆ្នាំ២០២១ បានឱ្យដឹងថា អ្នកស្លាប់ដោយ ជំងឺកូវីដ-១៩ កាលពីថ្ងៃម្សិលមិញ មានចំនួន៣២នាក់ និងករណីឆ្លងថ្មីមានចំនួន៩៦៦នាក់ ស្របពេលអ្នកជាសះស្បើយថ្មីមានចំនួន៦៥០នាក់។
បើតាមក្រសួងសុខាភិបាល គិតត្រឹមព្រឹកថ្ងៃទី២ ខែកក្កដា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៥២ ៣៥០នាក់ ក្នុងនោះ អ្នកជំងឺព្យាបាលជាសះស្បើយសរុបចំនួន៤៥ ៥០៨នាក់ អ្នកស្លាប់សរុប៦៦០នាក់ និងករណីនាំចូលពីក្រៅប្រទេសសរុប២ ៨៧២នាក់៕
