មន្ត្រីអង្គការសង្គមស៊ីវិលមួយចំនួន បានសម្ដែងការសោកស្ដាយ ចំពោះការលាឈប់ពីប្រធានសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា ហៅកាត់ថា (អាដហុក) របស់លោក ធន សារាយ ប៉ុន្តែពួកគេមួយចំនួនយល់ដែរថា វាជាគំរូមួយសម្រាប់ថ្នាក់ដឹកនាំអង្គការ និងស្ថាប័នពាក់ព័ន្ធផ្សេងៗទៀត។
នាយករងអង្គការការពារសិទ្ធិមនុស្សលីកាដូលោក អំ សំអាត បានសម្ដែងការសោកស្ដាយចំពោះការលាឈប់របស់លោក ធន សារាយ នេះ។ សម្រាប់លោក អំ សំអាត លោកបានកត់សម្គាល់ឃើញថា លោក ធន សារាយ បានកសាងស្នាដៃច្រើន បើទោះបីជាជួបបញ្ហាប្រឈមយ៉ាងណាក្តី។ ប៉ុន្តែលោក ធន សារាយ នៅតែពុះពារដឹកនាំក្នុងការធ្វើកិច្ចការងារផ្នែកសិទ្ធិមនុស្ស ដើម្បីកែលម្អស្ថានភាពសិទ្ធិមនុស្សនៅកម្ពុជានាពេលកន្លងមក។
លោក អំ សំអាត ថ្លែងយ៉ាងដូច្នេះថា៖ «នៅក្នុងហ្នឹង លោកបានទទួលពានរង្វាន់ជាច្រើនដែរ ពាក់ព័ន្ធនឹងវិស័យសិទ្ធិមនុស្ស។ អ៊ីចឹង ការលាឈប់របស់លោកពេលនេះ យើងមានការសោកស្តាយខ្លាំង ទៅលើការសម្រេចចិត្ត ប៉ុន្តែទោះជាយ៉ាងណាក៏ដោយ យើងនៅសង្ឃឹមថា សមាគមអាដហុក នៅតែមានភាពរឹងមាំដដែល ដោយអ្នកបន្តវេនពីលោកប្រធាន ធន សារាយ។ តែទោះជាយ៉ាងណាយើងនៅតែសោកស្ដាយ ហើយយើងគោរពនូវវីរភាព នូវសកម្មភាពលោក ធន សារាយ នេះ»។
ស្ថាបនិកសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (អាដហុក) លោក ធន សារាយ បានលាឈប់ពីតួនាទីជាប្រធានសមាគម បន្ទាប់លោកបានបម្រើការងារអស់រយៈពេល ៣០ ឆ្នាំកន្លងមក។ លោកគឺជាស្ថាបនិកសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (អាដហុក) បន្ទាប់ពីមានកិច្ចព្រមព្រៀងសន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១។
នាយិកាមជ្ឈមណ្ឌលសិទ្ធិមនុស្សកម្ពុជាលោកស្រី ចក់ សុភាព មានប្រសាសន៍ថា លោក ធន សារាយ មានស្នាដៃ និងគុណសម្បត្តិជាច្រើន ក្នុងអំឡុងពេលលោកប្រឡូកធ្វើកិច្ចការពារសិទ្ធិមនុស្សនេះ។ ប៉ុន្តែលោកស្រីចាត់ទុកការលាឈប់នេះថា ជាការបង្ហាញនូវគំរូមួយសម្រាប់ប្រធានអង្គការសង្គមស៊ីវិល និងស្ថាប័នពាក់ព័ន្ធផ្សេងៗទៀត។
លោកស្រីថា៖ «ខ្ញុំយល់ថា ជាឱកាសមួយខាងអង្គការសង្គមស៊ីវិលយើង គួរតែសិក្សាក្នុងការពិនិត្យអាណត្តិអ្នកដឹកនាំដែរ ព្រោះយើងដឹងហើយ ជាធម្មតាភាពជាអ្នកដឹកនាំ យើងគួរព្យាយាមបណ្ដុះនូវអ្នកជំនាន់ថ្មីដែរ។ អ៊ីចឹងការផ្លាស់ប្ដូរអ្នកដឹកនាំនេះ គឺជាឱកាសមួយ សម្រាប់តួអង្គថ្មីដែលគាត់អាចចូលមកបង្ហាញស្នាដៃ ហើយអាចទទួលបានថាមពលថ្មី តាមរយៈការរៀនសូត្រពីថាមពលចាស់ ដើម្បីយើងអាចបន្តនូវកិច្ចការងារទាំងអស់នេះទៅមុខទៀត»។
រីឯប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធលោក វន់ ពៅ ក៏បានបង្ហាញការយល់ឃើញប្រហាក់ប្រហែលលោកស្រី ចក់ សុភាព នេះដែរ។
ដោយឡែកសម្រាប់មន្ត្រីជាន់ខ្ពស់រដ្ឋាភិបាលលោក ផៃ ស៊ីផាន ឯណេះវិញ លោកបានចាត់ទុកការលាឈប់របស់លោក ធន សារាយ ថាជាកាយវិការគួរឱ្យគោរព។ ប្រធានអង្គភាពអ្នកនាំពាក្យរដ្ឋាភិបាលកម្ពុជារូបនេះ ក៍បានកើតសរសើរចំពោះស្នាដៃរបស់លោក ធន សារាយ លើការងារខាងផ្នែកសិទ្ធិមនុស្សនេះដែរ។
លោក ផៃ ស៊ីផាន មានប្រសាសន៍យ៉ាងដូច្នេះថា៖ «ខ្ញុំយល់ឃើញថា លោកធន សារាយ គាត់នៅក្រៅ តើមានប្រយោជន៍អ្វីដែលយើងយកតំណែងហ្នឹងតាមខ្លួន អនុញ្ញាតឱ្យអ្នកនៅខាងក្នុងបន្តទៅស្រួលធ្វើកិច្ចការ។ នេះជាកាយវិការមួយត្រូវគោរព។ ខ្ញុំមើលឃើញថា គាត់ជាអ្នកសម្របសម្រួលល្អ ដែលខុសពីអ្នកដទៃទៀត ដែលគ្រាន់តែតួនាទីជាអង្គការមិនមែនរដ្ឋាភិបាល មិននិយាយរករដ្ឋាភិបាលទេ គាត់ជាដៃគូរ ខ្ញុំសូមគោរពគាត់»។
លោក ធន សារាយ ស្ថាបនិកសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (អាដហុក) បានលាឈប់ពីតួនាទីជាប្រធានសមាគមនេះក្រោយបញ្ចប់អាណត្តិរបស់លោកនៅខែមិថុនាឆ្នាំ២០២១ និងបានជំនួសមកវិញដោយលោក នី សុខា ដែលជាសហការីរបស់លោក។
យោងតាមលិខិតថ្លែងអំណរគុណពីប្រធានថ្មី គឺលោក នី សុខា ជូនចំពោះលោក ធន សារាយ កាលពីថ្ងៃទី១ ខែកក្កដា ឆ្នាំ២០២១ បានចាត់ទុកលោក ធន សារាយ ថាជាអ្នកដែលបានលះបង់ស្ទើតែពេញមួយជីវិតនូវកម្លាំងកាយ ចិត្ត បញ្ញា និងស្មារតី និងអ្វីៗជាច្រើនទៀត ក្នុងបុព្វហេតុលើកស្ទួយការគោរពសិទ្ធិមនុស្ស និងលទ្ធិប្រជាធិបតេយ្យ។ អាដហុក បានចាត់ទុក លោក ធន សារាយ គឺជាវីរជនការពារសិទ្ធិមនុស្សដែលមានកេរ្តិ៍ឈ្មោះល្បីល្បាញ និងទទួលស្គាល់ទាំងនៅថ្នាក់ជាតិ តំបន់ និងអន្តរជាតិ។
បើតាមលិខិតនេះ លោក ធន សារាយ ធ្លាប់ទទួលបាននូវពានរង្វាន់ជាច្រើនដូចជា ពានរង្វាន់ «មូលនិធិសិទ្ធិមនុស្សរបស់ប្រទេសបារាំង ឆ្នាំ១១៣» ពានរង្វាន់ «មូលនិធិសិទ្ធិមនុស្សប្រចាំអាស៊ីលើកទី៣» នៅទីក្រុងតូក្យូប្រទេសជប៉ុនឆ្នាំ១៩៩៨ ពានរង្វាន់ ដែលផ្តល់ដោយក្រុមអ្នកច្បាប់ទីក្រុងញូយ៉កសហរដ្ឋអាមេរិក ឆ្នាំ១៩៩៩ ពានរង្វាន់ «មូលនិធិសិទ្ធិមនុស្សសាធារណរដ្ឋបារាំង ដែលផ្តល់ដោយលោកនាយករដ្ឋមន្ត្រីបារាំង លីយ៉ូណែល ហ្សូសប៉័ង (Lionel Jospin) នៅទីក្រុងប៉ារីស ឆ្នាំ១៩៩៩ និងពានរង្វាន់ណូបែល «MARTIN ENNALS AWARD» សម្រាប់អ្នកការពារសិទ្ធិមនុស្ស ដែលផ្តល់ដោយអង្គការអន្តរជាតិធំៗចំនួន ១០ នៅទីក្រុងសឺណែវ (GENAVE) ប្រទេសស្វីស ឆ្នាំ២០១៧ ជាដើម។
បើតាមលិខិតដដែលនេះបានចាត់ទុកថា វីរភាពរបស់លោក ធន សារាយ គឺជាគំរូ និងជាមេរៀនដ៏ល្អសម្រាប់បុគ្គលិកសមាគមអាដហុក មនុស្សទូទៅ និងជាពិសេសសម្រាប់យុវជនជំនាន់ក្រោយ រៀនសូត្រ និងប្រតិបត្តិ ដើម្បីជាមូលដ្ឋានក្នុងការចូលរួមកសាងសង្គមជាតិ ឆ្ពោះទៅរកការគោរពសិទ្ធិមនុស្ស និងលទ្ធិប្រជាធិបតេយ្យពិតប្រាកដ។
យោងតាមលិខិតដដែលនេះ បានបញ្ជាក់អំពីមូលហេតុនៃការលាឈប់របស់លោក ធន សារាយ នេះថា គឺបន្ទាប់ពីលោកអស់អាណត្តិ។ ប៉ុន្តែទោះជាយ៉ាងនេះក្តី កន្លងមកគេបានដឹងថា លោក ធន សារាយ ដែលមានវ័យចាស់ជរាណាស់ទៅហើយនោះ មានបញ្ហាសុខភាព ដែលកំពុងសម្រាកព្យាបាលនៅឯប្រទេសកាណាដា។
លោក ធន សារាយ បានចាកចេញពីប្រទេសកម្ពុជាចាប់តាំងពីខែឧសភា ឆ្នាំ២០១៦ ទៅកាន់ប្រទេសកាណាដា ដោយហេតុផលបារម្ភពីសុវត្ថិភាពផ្ទាល់ខ្លួន ក្រោយបុគ្គលិករបស់លោក ៤នាក់ និងអតីតបុគ្គលិក១នាក់ បានរងការចោទប្រកាន់ និងចាប់ខ្លួនពីអាជ្ញាធរកម្ពុជាលើសំណុំរឿងសូកប៉ាន់សាក្សីនាង ខុម ច័ន្ទតារាទី ហៅ ស្រីមុំ៕
