ក្រុមអ្នកជួយសង្គ្រោះជាងមួយពាន់នាក់នៅថ្ងៃចន្ទនេះ បាននិងកំពុងស្វែងរកមនុស្សប្រមាណ៨០នាក់ដែលបានបាត់ខ្លួនក្នុងហេតុការណ៍បាក់ដីជាច្រើនកន្លែងនៅភាគកណ្តាលប្រទេសជប៉ុន។
យោងតាមការផ្សព្វផ្សាយរបស់ទីភ្នាក់ងារសារព័ត៌មាន Reuters ឱ្យដឹងថា មនុស្សយ៉ាងហោច៣នាក់បានស្លាប់បាត់បង់ជីវិត បន្ទាប់ពីមានភ្លៀងធ្លាក់យ៉ាងខ្លាំងដែលបានបង្កជាករណីបាក់ដីជាច្រើនកន្លែងនៅក្នុងទីក្រុង Atami ភាគកណ្ដាលប្រទេសជប៉ុន កាលពីចុងសប្ដាហ៍កន្លងទៅ។
បុរសម្នាក់បានប្រាប់សារព័ត៌មានជប៉ុន NHK ថា៖ «ម្តាយរបស់ខ្ញុំកំពុងតែបាត់ខ្លួន។ ខ្ញុំមិនដែលនឹកស្មានថា វាអាចកើតឡើងនៅទីនេះនោះទេ»។
ប្រជាពលរដ្ឋដែលត្រូវបានជម្លៀសមួយរូប អាយុ៧៥ឆ្នាំ បានឱ្យដឹងថា ផ្ទះរបស់លោកត្រូវបានរសាត់ទៅបាត់។
លោកបន្ថែមថា៖ «នេះគឺជាគ្រោះមហន្តរាយយ៉ាងធ្ងន់ធ្ងរ»។
មន្ត្រីឱ្យដឹងផងដែរថា គិតត្រឹមថ្ងៃចន្ទនេះ ចំនួនអ្នកជួយសង្គ្រោះដែលត្រូវបានបញ្ជូនទៅកាន់ទីតាំងនោះ បានកើនឡើងដល់១ ៥០០នាក់ហើយ ហើយចំនួននេះអាចនឹងមានការកើនឡើងបន្ថែមទៀត។
នាយករដ្ឋមន្រ្តីជប៉ុន លោក Yoshihide Suga បានប្រាប់ក្រុមអ្នកយកព័ត៌មានជប៉ុនថា៖ «យើងចង់ជួយសង្គ្រោះជនរងគ្រោះឱ្យបានឆាប់តាមដែលអាចធ្វើទៅបាន»។
លោកបន្ថែមថា កងកម្លាំងពាក់ព័ន្ធទាំងអស់បានព្យាយាមអស់ពីសមត្ថភាព ដើម្បីជួយដល់ការស្វែងរកជនរងគ្រោះទាំងអស់។
អ្នកនាំពាក្យនៅក្នុងតំបន់មួយរូប លោក Hiroki Onuma បានប្រាប់ទីភ្នាក់ងារព័ត៌មាន Reuters ថា មនុស្ស១១៣នាក់ បានបាត់ខ្លួន ខណៈចំនួនអ្នកស្លាប់បានកើនដល់៣នាក់នៅក្នុងទីក្រុង Atami ស្ថិតនៅចម្ងាយ៩០គីឡូម៉ែត្រពីទីក្រុងតូក្យូ។
ទោះជាយ៉ាងណា ចំនួនអ្នកបាត់ខ្លួនបានធ្លាក់ចុះដល់ប្រមាណជា៨០នាក់ គិតត្រឹមថ្ងៃត្រង់នាថ្ងៃចន្ទនេះ។
លោក Hiroki Onuma បន្តថា៖ «យើងកំពុងតែមានកិច្ចសហការជាមួយមន្រ្តីមកពីក្រុមផ្សេងៗគ្នា ហើយជំរុញកិច្ចការស្វែងរកអ្នកបាត់ខ្លួនបន្ថែមទៀត»។
គួរបញ្ជាក់ថា គ្រោះបាក់ដីនៅជប៉ុននេះក៏បានប៉ះពាល់ដល់អគារចំនួន១៣០កន្លែងបណ្តាលឱ្យរងការខូចខាតផងដែរ ខណៈខេត្ត Atami ជាតំបន់ទេសចរណ៍រដូវក្តៅដ៏ពេញនិយមមួយ។
ទាក់ទងទៅនឹងករណីនេះ ប្រធានលេខាធិការគណៈរដ្ឋមន្ត្រីជប៉ុន លោក Katsunobu Kato បានអំពាវនាវដល់ប្រជាពលរដ្ឋឱ្យមានការប្រុងប្រយ័ត្នខ្ពស់ ខណៈដែលភ្លៀងក៏អាចបង្កជាគ្រោះថ្នាក់បានដែរ៕
