វ៉ាក់សាំងបង្ការជំងឺកូវីដ-១៩ ប្រភេទ «ស៊ីណូហ្វាម» របស់ចិន ចំនួន១លានដូសបន្ថែមទៀតដែលរដ្ឋាភិបាលបញ្ជាទិញពីភាគីចិន ត្រូវបានដឹកតាមយន្តហោះមកដល់ប្រទេសកម្ពុជា នៅព្រឹកថ្ងៃអង្គារនេះ។
រដ្ឋលេខាធិការក្រសួងសុខាភិបាល លោកស្រី យក់ សម្បត្តិ ដែលទៅទទួលវ៉ាក់សាំងបង្ការជំងឺកូវីដ-១៩នេះ នៅព្រលានយន្តហោះអន្តរជាតិភ្នំពេញ បានឱ្យក្រុមអ្នកសារព័ត៌មានដឹងថា វ៉ាក់សាំងបង្ការជំងឺកូវីដ-១៩ ប្រភេទស៊ីណូហ្វាម ចំនួន១លានដូសថែមទៀតដែលរដ្ឋាភិបាលកម្ពុជាបញ្ជាទិញពីចិននេះ គឺដើម្បីយកចាក់ជូនប្រជាពលរដ្ឋ ជាពិសេសនៅតាមបណ្តាខេត្តដែលកំពុងប្រឈមខ្លាំង ដោយមិនគិតថ្លៃនោះទេ។
ទំព័រហ្វេសប៊ុករបស់នាយកដ្ឋានព័ត៌មានក្រសួងការពារជាតិ ឱ្យដឹងថា កម្ពុជាបានទទួលវ៉ាក់សាំងពីប្រទេសចិនជាបន្តបន្ទាប់ រួមមាន លើកទី១ មានចំនួន១លាន៥សែនដូស ត្រូវបានដឹកមកដល់កម្ពុជា កាលពីថ្ងៃទី២៦ ខែមីនា ឆ្នាំ២០២១។ លើកទី២ មានចំនួន៥០ម៉ឺនដូស ដឹកមកដល់កម្ពុជា នៅថ្ងៃទី១៧ ខែមេសា។ លើកទី៣ មានចំនួន៥០ម៉ឺនដូស ដឹកមកដល់កម្ពុជា ថ្ងៃទី១១ ខែឧសភា។ លើកទី៤ នៅថ្ងៃទី១៦ ខែឧសភា ដោយកម្ពុជាទទួលបានវ៉ាក់សាំងស៊ីណូវ៉ាក់ ពីក្រុមហ៊ុនស៊ីណូវ៉ាក់ ប្រទេសចិន ចំនួន៥០ម៉ឺនដូស។ លើកទី៥ វ៉ាក់សាំងស៊ីណូវ៉ាក់ ចំនួន១លានដូសទៀត ដែលកម្ពុជាបញ្ជាទិញពីប្រទេសចិន ហើយមកដល់អាកាសយានដ្ឋានអន្តរជាតិភ្នំពេញ កាលពីថ្ងៃទី២៦ ខែមិថុនា ឆ្នាំ២០២១។ លើកទី៦ វ៉ាក់សាំងចិន១លានដូសទៀត មកដល់កម្ពុជា នៅថ្ងៃទី២៨ ខែមិថុនា ឆ្នាំ២០២១ និងលើកទី៧ កម្ពុជាទទួលបានវ៉ាក់សាំងស៊ីណូហ្វាម ១លានដូស នៅថ្ងៃទី៦ ខែកក្កដានេះផងដែរ។
ប្រភពដដែលបញ្ជាក់ថា កម្ពុជាទទួលបានវ៉ាក់សាំងប្រឆាំងជំងឺកូវីដ-១៩ជាង៤លាន៥សែនដូសរួចមកហើយ រួមមាន វ៉ាក់សាំងស៊ីណូហ្វាម ជំនួយរបស់រដ្ឋាភិបាលចិន ចំនួន១លាន៧សែនដូស។ វ៉ាក់សាំងស៊ីណូវ៉ាក់ ទិញពីចិន ចំនួន២លាន៥សែនដូស និងវ៉ាក់សាំងអាស្ត្រាហ្សេនិកា ជាង៣២ម៉ឺនដូស (៣២៤ ០០០) ជាជំនួយរបស់ខូវ៉ាក់ តាមរយៈអង្គការសុខភាពពិភពលោក។
កាលពីថ្ងៃទី១ ខែកក្កដា លោក ហ៊ុន សែន អះអាងថា ក្នុងខែកក្កដា ឆ្នាំ២០២១នេះ កម្ពុជានឹងទទួលបានវ៉ាក់សាំងពីចិន ចំនួន៥លានដូស ក្នុងនោះ ថ្ងៃទី៦ ខែកក្កដា ទទួលបានវ៉ាក់សាំងស៊ីណូហ្វាម ១លានដូស ហើយនៅថ្ងៃទី១០ ខែកក្កដា នឹងទទួលបានវ៉ាក់សាំងស៊ីណូហ្វាម ១លានដូស និងវ៉ាក់សាំងស៊ីណូវ៉ាក់ ៣លានដូសផងដែរ។
តាមរបាយការណ៍អនុគណៈកម្មការតាមដាន និងវាយតម្លៃនៃគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស ចេញនៅថ្ងៃទី០៥ ខែកក្កដា ឆ្នាំ២០២១នេះ បញ្ជាក់ថា ចំនួនអ្នកបានចាក់វ៉ាក់សាំងបង្ការជំងឺកូវីដ-១៩ នៅទូទាំងប្រទេស ចាប់តាំងពីថ្ងៃទី១០ ខែកុម្ភៈ ឆ្នាំ២០២១ ដល់ត្រឹមថ្ងៃទី០៥ ខែកក្កដា ឆ្នាំ២០២១នេះ មានចំនួន៤ ៦៥៨ ៤៤២នាក់ ឬស្មើនឹង៤៦ភាគរយនៃចំនួនមនុស្ស១០លាននាក់ ដែលត្រូវចាក់ឱ្យបានចប់ត្រឹមខែវិច្ឆិកា ឆ្នាំ២០២១ខាងមុខនេះ៕
