គិតត្រឹមរយៈពេល៦ខែ ឆ្នាំ២០២១នេះ គ្រោះមហន្តរាយធម្មជាតិរន្ទះបាញ់ បានបណ្តាលឱ្យមនុស្ស៥៩នាក់ស្លាប់ និង៤៤នាក់បានរងរបួស ខណៈគោក្របីចំនួន៣២ក្បាលបានងាប់នៅក្នុងខេត្តក្រុងសរុបចំនួន១៨។
យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ ចេញផ្សាយនៅថ្ងៃទី៦ ខែកក្កដានេះ បានឱ្យដឹងថា ខេត្តបាត់ដំបង មានជនរងគ្រោះស្លាប់ច្រើនជាងគេ ចំនួន១៤នាក់ ខេត្តកំពង់ធំ ៨នាក់ ខេត្តត្បូងឃ្មុំ ៥នាក់ និងខេត្តក្រុងមួយចំនួនទៀតមានអ្នកស្លាប់ចាប់ពី២នាក់ ដល់៤នាក់។
របាយការណ៍ដដែល ក្រៅពីរន្ទះបាញ់ គ្រោះមហន្តរាយធម្មជាតិដោយខ្យល់កន្ត្រាក់ ក៏បានបណ្តាលឱ្យមនុស្ស៥នាក់ស្លាប់ ៥៦នាក់រងរបួស និងរលំផ្ទះចំនួន៦០០ខ្នង របើកដំបូលផ្ទះចំនួន៤ ៥៦៥ខ្នង សាលារៀន៣១ខ្នង នៅក្នុងចំណោមហេតុការណ៍ដែលបានកើតឡើងចំនួន១៣៨លើក។ ចំណែកគ្រោះអគ្គិភ័យវិញ បានកើតឡើងនៅគ្រប់ខេត្តចំនួន២៨៨លើក បណ្តាលឱ្យមនុស្ស១៤នាក់ស្លាប់ និង២៩នាក់របងរបួស៕
