យ៉ាងហោចណាស់ មានមនុស្ស៣នាក់បានស្លាប់បាត់បង់ជីវិត និង២០នាក់ផ្សេងទៀតបានរងរបួស ខណៈមួយចំនួនទៀត ជាប់នៅក្នុងអគ្គិភ័យដែលបានឆាបឆេះនៅរោងចក្រមួយកន្លែងក្នុងប្រទេសបង់ក្លាដែស។
ទីភ្នាក់ងារសារព័ត៌មាន Reuters បានរាយការណ៍នៅថ្ងៃសុក្រនេះថា អគ្គិភ័យនេះផ្តើមចេញពីជាន់ផ្ទាល់ដីក្នុងអគារច្រើនជាន់នៃរោងចក្រផលិតទឹកផ្លែឈើ កាលពីយប់ថ្ងៃព្រហស្បតិ៍ នៅក្នុងទីក្រុង Narayanganj ដែលមានចម្ងាយប្រមាណ២០គីឡូម៉ែត្រពីរដ្ឋធានី Dhaka ប្រទេសបង់ក្លាដែស ប៉ុន្តែគេនៅមិនទាន់ដឹងពីមូលហេតុនៃការឆាបឆេះនេះនៅឡើយទេ។
មន្រ្តីនៃទីក្រុង Narayanganj មួយរូប លោក Mustain Billah បានប្រាប់ទីភ្នាក់ងារសារព័ត៌មាន Reuters ពីកន្លែងកើតហេតុថា៖ «យើងនៅមិនទាន់ដឹងថាតើមានកម្មករប៉ុន្មាននាក់ដែលកំពុងជាប់នៅក្នុងអាគារដែលឆេះនោះទេ ខណៈដែលបច្ចុប្បន្នយើងកំពុងតែប្រមូលព័ត៌មានបន្ថែមទៀត»។
លោកបន្ថែមថា មនុស្ស២នាក់បានស្លាប់នៅនឹងកន្លែងកើតហេតុ និងម្នាក់ទៀតបានស្លាប់បាត់បង់ជីវិតនៅមន្ទីរពេទ្យ ខណៈមនុស្ស២០នាក់ផ្សេងទៀតបានរងរបួស។
មន្ត្រីពន្លត់អគ្គិភ័យមួយរូប លោក Shah Alam ថ្លែងថា កម្មករជាច្រើននាក់បានរងរបួស ដោយសារតែពួកគេបានលោតចុះពីជាន់ទី២និងជាន់ទី៣នៃអគារដែលឆេះនោះ។
បើតាមប្រភពដដែល ករណីអគ្គិភ័យបែបនេះច្រើនកើតឡើងនៅក្នុងរោងចក្រដែលបើកដំណើរការដោយខុសច្បាប់និងគ្មានវិធានការសុវត្ថិភាពអគ្គិភ័យ ហើយករណីនេះបានកើតឡើងជាញឹកញាប់នៅក្នុងប្រទេសបង់ក្លាដែស៕
