វ៉ាក់សាំងបង្ការជំងឺកូវីដ-១៩ របស់ចិន ចំនួន៤លានដូសបន្ថែមទៀត ដែលរដ្ឋាភិបាលបញ្ជាទិញពីភាគីចិន ត្រូវបានដឹកតាមយន្តហោះមកដល់ប្រទេសកម្ពុជាហើយ នៅព្រឹកថ្ងៃសៅរិ៍នេះ។
រដ្ឋលេខាធិការក្រសួងសុខាភិបាល លោកស្រី យក់ សម្បត្តិ ដែលទៅទទួលវ៉ាក់សាំងបង្ការជំងឺកូវីដ-១៩នេះ នៅព្រលានយន្តហោះអន្តរជាតិភ្នំពេញ បានឱ្យក្រុមអ្នកសារព័ត៌មានដឹងថា រដ្ឋាភិបាល បានបញ្ជាទិញវ៉ាក់សាំងបង្ការជំងឺកូវីដ-១៩ ចំនួន៤លានដូស ពីចិន ក្នុងនោះ មានប្រភេទស៊ីណូវ៉ាក់ចំនួន ៣លានដូស និងវ៉ាក់សាំង ស៊ីណូហ្វាម ១លានដូស ដើម្បីយកចាក់ជូនប្រជាពលរដ្ឋ ជាពិសេសប្រជាពលរដ្ឋរស់នៅតាមបណ្តាខេត្តដែលកំពុងប្រឈមខ្លាំង ដោយមិនគិតថ្លៃនោះទេ។
ទំព័រហ្វេសប៊ុករបស់នាយកដ្ឋានព័ត៌មានក្រសួងការពារជាតិ ឱ្យដឹងថា កម្ពុជាទទួលបានវ៉ាក់សាំងប្រឆាំងជំងឺកូវីដ-១៩ជាង៤លាន៥សែនដូសរួចមកហើយ រួមមាន វ៉ាក់សាំងស៊ីណូហ្វាម ជំនួយរបស់រដ្ឋាភិបាលចិន ចំនួន១លាន៧សែនដូស។ វ៉ាក់សាំងស៊ីណូវ៉ាក់ ទិញពីចិន ចំនួន២លាន៥សែនដូស និងវ៉ាក់សាំងអាស្ត្រាហ្សេនិកា ជាង ៣២ម៉ឺនដូស (៣២៤ ០០០) ជាជំនួយរបស់ខូវ៉ាក់ តាមរយៈអង្គការសុខភាពពិភពលោក។
តាមរបាយការណ៍អនុគណៈកម្មការតាមដាន និងវាយតម្លៃនៃគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស ចេញនៅថ្ងៃទី០៩ ខែកក្កដា ឆ្នាំ២០២១នេះ បញ្ជាក់ថា ចំនួនអ្នកបានចាក់វ៉ាក់សាំងបង្ការជំងឺកូវីដ-១៩ នៅទូទាំងប្រទេស ចាប់តាំងពីថ្ងៃទី១០ ខែកុម្ភៈ ឆ្នាំ២០២១ ដល់ត្រឹមថ្ងៃទី០៩ ខែកក្កដា ឆ្នាំ២០២១នេះ មានចំនួន ៤៧,៩៣% បើធៀបជាមួយចំនួនមនុស្ស១០លាននាក់ ដែលត្រូវចាក់ឱ្យបានចប់ត្រឹមខែវិច្ឆិកា ឆ្នាំ២០២១ខាងមុខនេះ៕
