អភិបាលខេត្តកណ្តាលចាត់មន្ត្រីជំនាញចុះស្រាវជ្រាវករណីលក់ដីវត្តសុវណ្ណសាគរ និងដីប៉ុស្តិ៍នគរបាលឃុំអរិយក្សត្រ ក្រោយពីទទួលព័ត៌មានថា ដីនោះត្រូវបានលក់ទៅឱ្យឈ្មួញស្ងាត់ៗ សរុបក្នុងតម្លៃជិត១លានដុល្លារ។
អភិបាលខេត្តកណ្តាល លោក គង់ សោភ័ណ្ឌ ប្រាប់វីអូឌីនៅថ្ងៃអាទិត្យនេះថា កាលពីថ្ងៃទី៩ ខែកក្កដានេះ លោក ទទួលព័ត៌មានមិនទាន់ច្បាស់ថា ដីវត្តសុវណ្ណសាគរ ហៅវត្តបន្ទាយ និងដីប៉ុស្តិ៍រដ្ឋបាលឃុំអរិយក្សត្រ ស្រុកល្វាឯម ត្រូវបានលក់ឱ្យឈ្មួញស្ងាត់ៗ ក្នុងតម្លៃជិត១លានដុល្លារ ឬមិនទាន់លក់នៅឡើយទេ។
យ៉ាងនេះក្តី អភិបាលខេត្តរូបនោះបញ្ជាក់យ៉ាងខ្លីថា ក្រោយពីទទួលបានព័ត៌មានបែបនេះ លោកបានចាត់មន្ត្រីជំនាញ ដើម្បីចុះទៅស្រាវជ្រាវរកការពិត ពាក់ព័ន្ធនឹងការលួចលក់ដីគរុភណ្ឌរបស់វត្ត និងដីប៉ុស្តិ៍នគរបាលរដ្ឋបាលអរិយក្សត្រក្នុងតម្លៃជិត១លានដុល្លារអាមេរិកនេះផងដែរ។
លោកមានប្រសាសន៍ថា៖ «កំពុងស្រាវជ្រាវ ខ្ញុំឱ្យមន្ត្រីមូលដ្ឋានស្រុក និងឃុំ រាយការណ៍មក [ដើម្បីចង់ដឹងថា ដីនោះលក់មែនឬមិនលក់]»។
វីអូឌី មិនអាចសុំការបំភ្លឺបន្ថែមពី អភិបាលស្រុកល្វាឯមលោក កន សុខកាយ និង លោក ជា ប៉ុន ប្រធានគណៈកម្មការវត្តសុវណ្ណសាគរ ព្រមទាំងមេភូមិអរិយក្សត្រ លោក ខ្លូត សំអឿន បានទេនៅថ្ងៃអាទិត្យនេះ។
មន្ត្រីសម្របសម្រួលកម្មវិធីកំណែទម្រង់ដីធ្លីនៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត មានប្រសាសន៍ថា បើសិនជាមានការលក់ដីគរុភណ្ឌរបស់វត្ត និងដីប៉ុស្តិ៍រដ្ឋបាលឃុំអរិយក្សត្រពិតមែន គឺជាទង្វើខុសច្បាប់ ពីព្រោះដីរបស់រដ្ឋមិនមែនជាកម្មវត្ថុនៃការលក់ដូរនោះទេ។
លោក សូផាត បន្តថា ការលក់ដីវត្ត និងដីប៉ុស្តិ៍រដ្ឋបាលនោះបាន លុះត្រាតែមានការគប់គិតគ្នាជាមួយអាជ្ញាធរជាប្រព័ន្ធ។ ករណីនេះ លោកជំរុញទៅរដ្ឋាភិបាលត្រូវស្រាវជ្រាវ និងចាត់វិធានការផ្លូវច្បាប់លើអ្នកដែលគប់គិតគ្នាលក់ដីទាំងនោះ ដើម្បីកុំឱ្យរឿងបែបនេះកើតឡើងបន្តទៀត។
លោកមានប្រសាសន៍ថា៖ «ស្ថាប័នសមត្ថកិច្ច ក៏ដូចជារដ្ឋាភិបាលត្រូវពិនិត្យមើលដែលលក់ខុសច្បាប់ ហើយអ្នកដែលពាក់ព័ន្ធតាមច្បាប់ភូមិបាល បើលក់ខុសច្បាប់ចូលក្នុងបទល្មើសព្រហ្មទណ្ឌ អ្នកដែលឃុបខិតគ្នាក្នុងការលក់ត្រូវមានទោសព្រហ្មទណ្ឌ»។
គួរបញ្ជាក់ថា ដីគរុភណ្ឌរបស់វត្តសុវណ្ណសាគរ មានទំហំទទឹងប្រវែង៤០ម៉ែត្រ ស្ថិតនៅទល់មុខសាលាបឋមសិក្សាសុវណ្ណសាគរ ខាងជើង ទល់នឹងសាលាឃុំអរិយក្សត្រ ខាងត្បូង ទល់នឹងប៉ុស្តិ៍នគរបាលឃុំអរិយក្សត្រ ខាងកើតទល់នឹងផ្លូវកៅស៊ូ ហើយខាងលិច ទល់នឹងដីអូរ ស្ថិតនៅភូមិអរិយក្សត្រ ឃុំអរិយក្សត្រ ស្រុកល្វាឯម ខេត្តកណ្ដាល ខណៈដីប៉ុស្តិ៍រដ្ឋបាលអរិយក្សត្រដែលនៅជាប់គ្នានឹងដីវត្តនោះ ក៏ត្រូវបានលក់ទៅឱ្យឈ្មួញតែមួយផងដែរ៕
