អ្នកជំងឺកូវីដ-១៩ ចំនួន២៣នាក់បន្ថែមទៀតបានស្លាប់ ដែលធ្វើឱ្យអត្រាអ្នកស្លាប់បានកើនដល់ជាង៩០០នាក់ ខណៈអ្នកឆ្លងថ្មីមានជិត១ ០០០នាក់។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី១២ ខែកក្កដា ឆ្នាំ២០២១ ឱ្យដឹងថា អ្នកស្លាប់ដោយជំងឺកូវីដ-១៩ កាលពីថ្ងៃម្សិលមិញ មានចំនួន២៣នាក់ និងករណីឆ្លងថ្មីមានចំនួន៩១១នាក់ ស្របពេលអ្នកជាសះស្បើយថ្មីមានចំនួន១ ០០២នាក់។
បើតាមក្រសួងសុខាភិបាល គិតត្រឹមព្រឹកថ្ងៃទី១២ ខែកក្កដា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៦១ ៨៧០នាក់ ក្នុងនោះ អ្នកជំងឺព្យាបាលជាសះស្បើយសរុបចំនួន៥៣ ៤៧៧នាក់ អ្នកស្លាប់សរុប៩២៥នាក់ ខណៈករណីនាំចូលពីក្រៅប្រទេសសរុបមាន៤ ៨៧៣នាក់៕
