ទីភ្នាក់ងារសារព័ត៌មាន Reuters – រដ្ឋាភិបាលវៀតណាម បានប្រកាសពីការដាក់ចេញវិធានការរឹតបន្តឹងការធ្វើដំណើរនៅក្នុងទីក្រុង Can Tho សម្រាប់រយៈពេល១៤ថ្ងៃ ដោយចាប់ផ្តើមពីថ្ងៃចន្ទនេះ ក្នុងការប្រយុទ្ធប្រឆាំងនឹងការឆ្លងរីករាលដាលនៃជំងឺកូវីដ-១៩។
បន្ទាប់ពីទទួលបានជោគជ័យក្នុងការគ្រប់គ្រងករណីឆ្លងរីករាលដាលនៃជំងឺរាតត្បាតនេះកាលពីពេលកន្លងទៅ ប្រទេសវៀតណាម បច្ចុប្បន្ន បានប្រឈមនឹងការផ្ទុះឡើងនៃវីរុសនេះយ៉ាងធ្ងន់ធ្ងរ គិតចាប់តាំងពីចុងខែមេសា ខណៈតួលេខឆ្លងប្រចាំថ្ងៃកើនឡើងដល់កម្រិតខ្ពស់។
ក្រសួងសុខាភិបាលវៀតណាម បានរាយការណ៍ពីការឆ្លងថ្មីចំនួន១ ៩៥៣ករណី កាលពីថ្ងៃអាទិត្យ និង ១ ៨៥៣ករណី នៅថ្ងៃសៅរ៍ ខណៈដែលករណីភាគច្រើនត្រូវបានរកឃើញនៅក្នុងទីក្រុងហូជីមិញ។
សម្រាប់ទីក្រុង Can Tho ដែលមានប្រជាជនរស់នៅចំនួន១,២៣លាននាក់ ក៏បានរាយការណ៍ពីការឆ្លងថ្មីចំនួន៧ករណី ក្នុងរយៈពេលមួយសប្តាហ៍កន្លងមកនេះ។
គួរបញ្ជាក់ថា ប្រទេសវៀតណាមមានអ្នកឆ្លងជំងឺកូវីដ-១៩ សរុបចំនួន២៩ ៨១៦នាក់ និងស្លាប់សរុបចំនួន១១៦នាក់ ចាប់គិតតាំងពីមានការឆ្លងរាលដាលដំបូងនៃជំងឺរាតត្បាតនេះ។
កាលពីសប្តាហ៍កន្លងទៅ ប្រទេសនេះក៏បានចាប់ផ្តើមដាក់ចេញវិធានការរឹតបន្តឹងការធ្វើដំណើរនៅក្នុងទីក្រុងធំៗរបស់ខ្លួនផងដែរ ដែលរួមមានទីក្រុងហូជីមិញ និងទីក្រុងហាណូយ៕
