មន្រ្តីអង្គការមិនមែនរដ្ឋាភិបាលដែលប្រយុទ្ធប្រឆាំងទៅនឹងអំពើពុករលួយ បានហៅការមិនដាក់ពេលវេលាឱ្យមន្រ្តីជាន់ខ្ពស់អគ្គនាយកដ្ឋានគយនិងរដ្ឋាករកម្ពុជាដែលដល់វ័យចូលនិវត្តន៍ឈប់ពីការងារ ថាជាគំរូអាក្រក់និងធ្វើឱ្យបាត់បង់ឱកាសសម្រាប់អ្នកមានសមត្ថភាពជំនាន់ក្រោយៗទៀតក្នុងការបង្ហាញស្នាដៃ ចូលរួមអភិវឌ្ឍ និងជួយបង្កើនប្រាក់ចំណូលសម្រាប់ជាតិ។
ប្រធានគណៈកម្មាធិការកម្ពុជាឯករាជ្យប្រឆាំងអំពើពុករលួយ អ្នកស្រី ម៉ម ស៊ីថា មានប្រសាសន៍នៅថ្ងៃទី១៤ ខែកក្កដានេះថា ច្បាប់ដែលបានបង្កើតមកហើយ រដ្ឋាភិបាលគួរអនុវត្តទៅតាមវិធានដែលបានចែងនិងកំណត់ពីទិសដៅនៃខ្លឹមសារច្បាប់ឱ្យបានត្រឹមត្រូវ។
អ្នកស្រីបន្តថា មន្រ្តីរាជការស៊ីវិលដែលដល់ពេលចូលនិវត្តន៍ហើយ ត្រូវរៀបចំដាក់ឱ្យចូលនិវត្តន៍ ដោយមិនត្រូវពន្យារពេលក្រោមហេតុផលអ្វីផ្សេងឡើយ។ ហើយការបន្តអូសបន្លាយឬជួយជ្រោមជ្រែងមន្រ្តីដែលត្រូវចូលនិវត្តន៍ឱ្យបន្តការងារបែបនេះ ជាគំរូអាក្រក់និងធ្វើឱ្យមនុស្សជំនាន់ក្រោយបាត់បង់ឱកាសក្នុងការបញ្ចេញសមត្ថភាពរបស់ពួកគេ។
អ្នកស្រី ម៉ម ស៊ីថា ថ្លែងថា៖ «ល្អប៉ុនណាក៏ដោយ វាត្រូវដល់ពេលវេលាដែលកំណត់ដោយច្បាប់ គឺត្រូវអនុវត្តអ៊ីចឹងទៅ! មិនចាំបាច់ដំឡើងនិងពន្យារអីបែបហ្នឹងទេ នាំឱ្យខូចប្រពៃណីការងារយើង។ មើលទៅវាអត់កើតទេ ចូលនិវត្តន៍ទៅ ទុកឱកាសឱ្យក្មេងៗក្រោយផង»។
អ្នកស្រីចាត់ទុកថា នេះជាមូលហេតុតែមួយគត់ដែលនាំឱ្យកម្ពុជាមិនអាចមានការអភិវឌ្ឍនិងកែទម្រង់ទៅរកភាពជឿនលឿនបាន ព្រោះតែជាប់ជំពាក់នឹងផលប្រយោជន៍បក្សនយោបាយ រួមទាំងផលប្រយោជន៍បុគ្គល។
ដោយឡែក លោក ប៉ិច ពិសី នាយកប្រតិបត្តិអង្គការតម្លាភាពកម្ពុជា ក៏ឯកភាពដែរថា ការបន្តក្រាញក្នុងតួនាទីនេះជាបច្ច័យដែលធ្វើឱ្យអ្នកបន្តវេនជំនាន់ក្រោយគ្មានឱកាសក្នុងការបញ្ចេញនូវសមត្ថភាពរបស់ពួកគេ។
លោកបន្តថា យ៉ាងណា ការទុកឱ្យមន្រ្តីរបស់ខ្លួនស្ថិតនៅក្នុងក្របខណ្ឌដើមនេះ អាចជាយុទ្ធសាស្រ្តរបស់រដ្ឋាភិបាលដែរ តាមរយៈគោលនយោបាយ«រក្សាចាស់ បង្កើតថ្មី»។
លោកបន្តថា៖ «ទម្លាប់ហ្នឹង បើយើងស្តាប់ថ្នាក់ដឹកនាំគាត់មានប្រសាសន៍ទៅ គឺគាត់រៀបចំជាយុទ្ធសាស្រ្តមួយ គឺថារក្សាចាស់បង្កើតថ្មី មានន័យថា គាត់មិនបោះបង់អ្នកចាស់ចោលទេ ហើយនៅតែរក្សាផ្តល់អត្ថប្រយោជន៍ជូនគាត់អ៊ីចឹងទៅ។ ដូច្នេះ នេះជាយុទ្ធសាស្រ្តនៃការដឹកនាំផ្សេងៗ»។
មន្រ្តីមួយចំនួននៅតាមនាយកដ្ឋានគយនិងរដ្ឋាករកម្ពុជាមួយចំនួន ឱ្យដឹងថា ពួកគេមិនសប្បាយចិត្តចំពោះមេគយ លោក គុណ ញឹម ដែលដល់ពេលចូលនិវត្តន៍ហើយ តែបែរជាមិនដាក់ឱ្យចូលនិវត្តន៍ទៅវិញ។
យោងតាមឯកសារពីអគ្គនាយកដ្ឋានគយនិងរដ្ឋាករកម្ពុជា ដែល វីអូឌី ទទួលបាន បញ្ជាក់ថា គិតត្រឹមឆ្នាំ២០២១នេះ លោក គុណ ញឹម ដែលមានតួនាទីជាប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានគយនិងរដ្ឋាករកម្ពុជា មានវ័យ៦០ឆ្នាំហើយ ដែលវ័យនេះជាវ័យដល់ពេលដែលត្រូវចូលនិវត្តន៍។
ក្រៅពីមិនបានដាក់ឱ្យចូលនិវត្តន៍ទៅតាមការកំណត់ដូចមានចែងនៅក្នុងវិធាននៃច្បាប់ហើយ កាលពីខែមករា ឆ្នាំ២០២១ កន្លងទៅនេះ លោក គុណ ញឹម ក៏ត្រូវបានព្រះមហាក្សត្រត្រាស់បង្គាប់តែងតាំងជា «រដ្ឋមន្រ្តីប្រតិភូអមនាយករដ្ឋមន្រ្តី» បន្ថែមលើមុខងារបច្ចុប្បន្ន។
ព្រះរាជក្រឹត្យតែងតាំងមុខងារនេះ គឺធ្វើឡើងរួមគ្នាក្នុងចំណោមឥស្សរជនជាន់ខ្ពស់២រូបផ្សេងទៀត រួមមាន លោក ជូ វិចិត្ត និងលោក គង់ វិបុល ដែលជាមន្រ្តីនៅក្នុងក្រសួងសេដ្ឋកិច្ច និងហិរញ្ញវត្ថុ។
វីអូឌី ព្យាយាមសុំការបំភ្លឺជាច្រើនដងតាមទូរសព្ទពីលោក គុណ ញឹម ព្រមទាំងមន្រ្តីនាំពាក្យក្រសួងមុខងារសាធារណៈ លោក យក់ ប៊ុនណា នៅថ្ងៃពុធនេះ ប៉ុន្តែមិនមានការឆ្លើយតប។
ច្បាប់ស្តីពី «សហលក្ខន្តិកៈមន្រ្តីរាជការស៊ីវិល» មាត្រា៥៤ ចែងពីការកំណត់អាយុនៃការចូលនិវិត្តន៍របស់មន្រ្តីរាជការស៊ីវិល ដែលត្រូវដាក់ឱ្យចូលនិវត្តន៍ជាកំហិត គិតត្រឹមអាយុ៥៥ឆ្នាំ។ ប៉ុន្តែនៅក្នុងច្បាប់ដដែលនេះ ក៏បានបើកផ្លូវអាចរំកិលអាយុដល់ត្រឹម៦០ឆ្នាំ ចំពោះមន្ត្រីរាជការស៊ីវិលដែលមានតួនាទីចាប់ពីអគ្គនាយកដ្ឋានចុះក្រោម។ ចំពោះមន្រ្តីនយោបាយវិញ អាយុចាប់ពី៦០ឆ្នាំទៅ អាចនៅបន្តការងារបាន ប្រសិនបើសុខភាពនៅអំណោយផល៕
