កាលពីពេលថ្មីៗ កសិករមួយរូបដែលដាំបន្លែនៅស្រុកស្អាង ខេត្តកណ្តាល លោក ងៀប តៃសុង ត្រូវបានអាជ្ញាធរខេត្ត រួមមាន អនុប្រធានមន្ទីរពាណិជ្ជកម្ម និងមន្ទីរកសិកម្ម រុក្ខាប្រមាញ់ និងនេសាទ បានចុះទៅធ្វើកំណត់ហេតុ និងព្រមានឱ្យបញ្ឈប់ការបង្ហោះព័ត៌មានអវិជ្ជមានលើបណ្តាញសង្គមហ្វេសប៊ុក។ កិច្ចសន្យានេះបានធ្វើឡើងក្រោយពីកសិករដាំបន្លែម្នាក់នេះបានបង្ហោះរូបភាពលើបណ្តាញសង្គមហ្វេសប៊ុកកាលពីថ្ងៃទី២៦ ខែមេសា ស្តីពីការឈូសបន្លែសាលាដចោល ដោយសារតែគ្មានទីផ្សារ និងដោយសារតែសាលាដចាស់ខែមិនអាចកាត់លក់បានទៀតឡើយ។
បើទោះបីជាមានការព្រមានបែបនេះក្តី កសិករពាក់កណ្តាលស្វ័យប្រវត្តិកម្មរូបនេះ បានបន្តប្រើប្រាស់បណ្តាញសង្គម ដើម្បីបញ្ចេញមតិត្អូញត្អែរបន្តទៀត ដើម្បីទាក់ទាញការចាប់អារម្មណ៍ស្វែងរកទីផ្សារបន្លែរបស់លោក។
លោក តៃសុង មានប្រសាសន៍ថា៖ «ដោយសារតែខាតធ្ងន់ធ្ងរពេកចាប់តាំងពីខែ១២ ឆ្នាំ២០២០មក មិនមានទីផ្សារ មិនមានអ្នកមកទិញ ផ្សារត្រូវបានបិទ។ បើខ្ទឹមមានអ្នកទិញក្នុង១គីឡូ ១២០០រៀល តែបើសាលាដវិញ គឺគ្មានអ្នកទិញតែម្ដង។ ដូច្នេះ សម្រេចឈូសសាលាដចោល ដែលមានផ្ទៃដី៣ហត្ថ [ហិកតា]»។
លោកបន្ថែមថា៖ «ក្រោយពីបង្ហោះសារពីការឈូសចោល [បន្លែ] អាជ្ញាធរបានឱ្យខ្ញុំធ្វើកិច្ចសន្យា ហាមបង្ហោះសារនៅលើហ្វេសប៊ុកនាំឱ្យមានការញុះញង់ ចាំអាជ្ញាធរនឹងជួយរកដំណោះស្រាយ ដោយឱ្យលេខ៣ខ្សែ បើសិនជាភ្ជួរចោលលើកក្រោយ តែខលចូលគ្មានអ្នកលើក»។
កសិករដាំបន្លែនៅស្រុកស្អាងរូបនេះបានប្រកបរបរកសិកម្មរយៈពេល៥ឆ្នាំមកហើយ។ លោកបន្តថា មានកសិករនៅតំបន់នោះជាច្រើនដែលដាំហើយគ្មានទីផ្សារ ដែលត្រូវប្រឈមនឹងការភ្ជួរបន្លែចោលដូចគ្នាដែរ តែមិនហ៊ានបញ្ចេញមតិតាមបណ្តាញសង្គមនោះទេ ព្រោះពួកគេឃើញអាជ្ញាធរ មានប៉ូលិស មានក្រសួង ចុះមកសួរនាំលោកច្រើន ពួកគាត់បារម្ភពីសុវត្ថិភាពគ្រួសារ និងមិនចង់មានរឿងរ៉ាងវែងឆ្ងាយ។
លោក តៃសុង បានបន្ថែមថា៖ «ខ្ញុំក៏បានស្នើពួកគាត់ឱ្យរកដំណោះស្រាយ តែពួកគាត់ថា កូវីដអ៊ីចឹង គាត់ជួយអត់បានទេ ចាំចប់កូវីដ ចាំគាត់រកដំណោះស្រាយឱ្យ។ បើដាំលើកក្រោយ សុំកុំបញ្ចេញមតិលើបណ្ដាញសង្គមអ៊ីចឹង ព្រោះអីត្រូវរកទីផ្សារខ្លួនឯងឱ្យហើយ ចាំដាំ ហើយកុំដាំច្រើនពេក ដាំដីតិចតួចបានហើយ គេប្រាប់ខ្ញុំអ៊ីចឹង! កុំឱ្យអំពល់ទុក្ខដល់គេទៀត គេប្រាប់ឱ្យហើយ! អ៊ីចឹងយើងចាំតែខុសទៅ»។
យ៉ាងណាក្តី កសិករដាំបន្លែពាក់កណ្តាលស្វ័យប្រវត្តិកម្មរូបនេះ យល់ថា លោកមិនខុសនោះទេ ហើយលោកនៅតែបន្តបញ្ចេញមតិបែបនេះ ដើម្បីស្វែងរកទីផ្សារបន្លែរបស់លោក។
លោកបានសង្កត់ធ្ងន់ថា៖ «ខ្ញុំគិតថា បើតាមច្បាប់ ខ្ញុំអត់ខុសទេ! ហើយបើយើងមិននិយាយ មិនក្រោក គេនៅតែជិះពីលើយើង អ៊ីចឹងយើងនៅតែក្រ។ ខ្ញុំហាក់អស់កម្លាំងចិត្ត ខាតទាំងលុយ ស្ដាយទាំងដំណាំ ហើយត្រូវអាជ្ញាធររករឿងទៀត ខ្ញុំខាតប្រហែល២ម៉ឺនដុល្លារ គ្មាននរណាចង់ឈូសចោលទេ»។
តើលោក តៃសុង គឺជានណា?
លោក ងៀប តៃសុង កើតនៅថ្ងៃទី២៣ ខែឧសភា ឆ្នាំ១៩៨៧ នៅភូមិព្រែកអុងប៉ាង ឃុំទឹកវិល ស្រុកស្អាង ខេត្តកណ្ដាល ដែលមានឪពុកឈ្មោះ ឡៅ វេងងៀប និងអ្នកម្ដាយឈ្មោះ តុង គីមស្រ៊ាង។ នៅឆ្នាំ២០១៩ លោក តៃ សុង បានរៀបអាពាហ៍ពិពាហ៍ជាមួយនឹងអ្នកស្រី អេង លក្ខិណា រហូតមកទល់ពេលនេះ ភរិយាលោកកំពុងពពោះ៧ខែ។
ឆ្នាំ២០០៧ ជាឆ្នាំដែលគាត់បញ្ចប់ការសិក្សាត្រឹមថ្នាក់វិទ្យាល័យប៉ុណ្ណោះ ក្រោយមក លោកក៏ចាប់ផ្ដើមរកស៊ីជួលមេក្រូ ជួលធុងបាស់ ជួលម៉ាស៊ីនភ្លើង និងធ្វើចម្ការខ្លះៗ។ ក្រោយមក លោកក៏ចាប់ផ្ដើមដាំដំណាំបន្លែ ខ្ទឹម ល្ហុង អំពៅ និងក្រោយមក ក៏ចាប់ផ្ដើមដាំសាលាដ និងដំណាំកសិកម្មមួយចំនួនទៀត។
លោកបន្ថែមថា៖ «សម្រាប់កសិកម្ម ខ្ញុំមិនដែលរៀនពីសាលាណាទេ រៀនដាំដោយខ្លួនឯង សាកល្បងដាំពីតិចៗរហូតមានបទពិសោធន៍ពីការ មើលដី ដាក់ជី ថែរក្សាសាលាដទាំងនោះ ខ្ញុំក៏ពង្រីកការដាំដុះជាទ្រង់ទ្រាយធំ»។
លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា បានលើកឡើងថា ប្រជាពលរដ្ឋមានសិទ្ធិក្នុងការបញ្ចេញមតិរបស់ខ្លួន ព្រោះសិទ្ធិនេះត្រូវបានធានាដោយរដ្ឋធម្មនុញ្ញកម្ពុជា។
លោកស្រីនិយាយថា៖ «រាល់ការរឹតត្បិតណាមួយនោះ គឺត្រូវគោរពទៅតាមគោលការណ៍ ៣ នៃយន្តការអន្តរជាតិសិទ្ធិមនុស្សដែលបានចែង គឺត្រូវតែមានចែងក្នុងច្បាប់ ត្រូវតែស្របច្បាប់ និងត្រូវតែសមាមាត្រនឹងច្បាប់។ ការរឹតបន្តឹងសិទ្ធិសេរីភាពណាមួយនោះ ត្រូវតែអនុលោមទៅតាមគោលការណ៍នេះ បើមិនដូច្នោះទេ គឺជាការបំពានសិទ្ធិសេរីភាពរបស់ប្រជាពលរដ្ឋហើយ»។
លោកស្រីបានបន្ថែមថា អាជ្ញាធរមិនគួរគំរាមកំហែងទៅដល់ការលើកឡើងរបស់កសិករដែលបានបញ្ចេញមតិនោះទេ ហើយគួរតែយកមតិទាំងឡាយដែលពួកគាត់ប្រឈមនោះទៅពិចារណាដោះស្រាយ ព្រោះវាជាទំនួលខុសត្រូវក្នុងនាមជាអាណាព្យាបាលដែលជួយគាំពារដល់ពលរដ្ឋ។
លោកស្រីនិយាយថា៖ «ការរឹតត្បឹតសិទ្ធិសេរីភាពអាចធ្វើទៅបាន ដរាបណាការបញ្ចេញមតិនេះបានប៉ះពាល់ធ្ងន់ធ្ងរ បង្កឱ្យមានការរើសអើងស្អប់ខ្ពើមពូជសាសន៍ ប៉ះពាល់សុខភាពសាធារណៈជាដើម នោះទើបជាការគួររឹតត្បិត»។
វីអូឌី មិនអាចសុំការអត្ថាធិប្បាយពីអភិបាលខេត្តកណ្តាល លោក គង់ សោភ័ណ្ឌ បានទេ។
យោងតាមរបាយការណ៍ឃ្លាំមើលសេរីភាពមូលដ្ឋានឆ្នាំទី៥ របស់មជ្ឈមណ្ឌលសិទ្ធិមនុស្សកម្ពុជា សមាគមសិទ្ធិមនុស្សអាដហុក និងមជ្ឈមណ្ឌលសាមគ្គីភាព ចេញផ្សាយកាលពីថ្ងៃទី១៣ ខែឧសភា ឆ្នាំ២០២១ បានកត់សម្គាល់ថា រដ្ឋាភិបាលកម្ពុជាបានប្រើប្រាស់ច្បាប់ ដើម្បីកាត់បន្ថយលំហសិទ្ធិពលរដ្ឋ និងរឹតត្បិតការអនុវត្តសេរីភាពមូលដ្ឋានរបស់ប្រជាពលរដ្ឋ។ ការរឹតត្បិតសេរីភាពមូលដ្ឋានកើតឡើងគ្រប់ខេត្ត ជាពិសេសនៅរាជធានីភ្នំពេញ ចាប់តាំងពីខែកក្កដាមក។
នៅក្នុងរបាយការណ៍ឆ្នាំទី៥នេះ មានការកោះហៅប្រជាពលរដ្ឋចំនួន២១៥នាក់ បង្គាប់ឱ្យចូលខ្លួនឆ្លើយបំភ្លឺចំនួន១១៧នាក់ ការចាប់ខ្លួនចំនួន៨៥នាក់ និងការផ្តន្ទាទោសចំនួន១៧នាក់ ដោយសារការអនុវត្តសេរីភាពមូលដ្ឋានរបស់ខ្លួន។
ងាកមកនិយាយពីកសិករដាំបន្លែ លោក តៃសុង វិញ លោកយល់ថា បណ្ដាញសង្គមគឺជាកន្លែងដែលគេប្រើប្រាស់ច្រើននិងងាយក្នុងការចែករំលែកព័ត៌មានឱ្យប្រជាពលរដ្ឋបានដឹង ជាពិសេសគឺក្រសួងកសិកម្ម ដើម្បីជួយអន្តរាគមន៍ជួយរកទីផ្សារជូនកសិករ៕
អត្ថបទ៖ សំ សុពេជ្រ