តំណាងកម្ពុជាប្រចាំនៅអង្គការសហប្រជាជាតិ បានប្រាប់ក្រុមប្រឹក្សាសិទ្ធិមនុស្សអង្គការសហប្រជាជាតិ (អ.ស.ប)ថា ការធ្វើបាតុកម្មខុសច្បាប់ ឬបាតុកម្មស៊ីឈ្នួល ជាពិសេសធ្វើឡើងដោយក្រុមស្ត្រីតវ៉ាថ្ងៃសុក្រ ដើម្បីដាក់សម្ពាធលើប្រព័ន្ធតុលាការ ពុំមែនជាការអនុវត្តសិទ្ធិសេរីភាពប្រមូលផ្តុំដោយសន្តិវិធីនោះឡើយ។
ការលើកឡើងនេះ បានធ្វើឡើងនៅក្នុងសម័យប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិលើកទី៤៧ ដែលបានបិទបញ្ចប់ទៅកាលពីថ្ងៃទី១៤ ខែកក្កដា ឆ្នាំ២០២១នេះ។
តាមរយៈសេចក្តីប្រកាសព័ត៌មានរបស់ស្ថានបេសកម្មអចិន្ត្រៃយ៍កម្ពុជាប្រចាំអង្គការសហប្រជាជាតិ ស្តីពី «វឌ្ឍនភាពរបស់កម្ពុជាក្នុងវិស័យសិទ្ធិមនុស្ស» គណៈប្រតិភូកម្ពុជា បានគូសបញ្ជាក់ថា ការធ្វើបាតុកម្មខុសច្បាប់ ឬបាតុកម្មស៊ីឈ្នួល ដែលដាក់សម្ពាធលើប្រព័ន្ធតុលាការ ឬរំខានដល់សណ្តាប់ធ្នាប់សាធារណៈ ពុំមែនជាការអនុវត្តសិទ្ធិសេរីភាពប្រមូលផ្តុំដោយសន្តិវិធី ដូចមានចែងក្នុងរដ្ឋធម្មនុញ្ញឡើយ។
ប៉ុន្តែការចោទប្រកាន់នេះ ត្រូវបានអ្នកស្រី កុល សាត ភរិយារបស់លោក គង់ ម៉ាស់ ដែលកំពុងជាប់ពន្ធនាគារព្រៃសនោះបានបដិសេធ។ អ្នកស្រីថា ការធ្វើបាតុកម្ម ឬការតវ៉ារបស់ក្រុមស្ត្រីភរិយាអ្នកនយោបាយអតីតគណបក្សប្រឆាំងនេះ មិនមែនជាការស៊ីឈ្នួលនោះទេ។
អ្នកស្រីបាននិយាយថា៖ «ខ្ញុំគិតថា ខ្ញុំអត់មានស៊ីឈ្នួលនណាគេទេ ហើយបើសិនជាខ្ញុំស៊ីឈ្នួល ខ្ញុំគិតថាលំបាកណាស់ ឧទាហរណ៍ដូចជាខ្ញុំចឹង ខ្ញុំកំពុងតែឈឺប្តីខ្ញុំកំពុងតែជាប់ពន្ធនាគារ ហើយកំពុងតែកូវីដចឹងទៀត បើសិនជាខ្ញុំមកស៊ីឈ្នួលក៏ពិតមែន ខ្ញុំគិតថា លុយប៉ុន្មានក៏ដោយ យកមកទិញខ្ញុំពាក់ព័ន្ធនឹងកូវីដផង ហើយកូវីដដឹងស្រាប់ហើយ ជំងឺកូវីដឥឡូវកំពុងពេញនិយមស្លាប់ ចឹងអ្នកដែលនិយាយថាខ្ញុំ ស៊ីឈ្នួលគេមកតវ៉ាហ្នឹងខុសហើយៗ ពីព្រោះអីអ្វីដែលខ្ញុំធ្វើគឺជារឿងពិតជាក់ស្តែងដែលខ្ញុំមកតវ៉ាដើម្បីឱ្យដោះលែងក្រុមគ្រួសារ [ប្តី] របស់ខ្ញុំ»។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព មិនចង់បកស្រាយឡើយ ចំពោះការចោទប្រកាន់ថា ការធ្វើបាតុកម្មកន្លងមកជាបាតុកម្មស៊ីឈ្នួល។ ប៉ុន្តែលោកស្រីស្នើឱ្យអាជ្ញាធររដ្ឋាភិបាល បង្ហាញភស្តុតាងចំពោះការចោទប្រកាន់បែបនេះ។
លោកស្រី ចក់ សុភាព មានប្រសាសន៍ថា ក្នុងរយៈពេល៥ឆ្នាំចុងក្រោយនេះ សេរីភាពមូលដ្ឋានរបស់ពលរដ្ឋកម្ពុជា ហាក់បានធ្លាក់ចុះខ្លាំង។
លោកស្រីមានប្រសាសន៍យ៉ាងដូច្នេះថា៖ «ដូចខ្ញុំបានគូសបញ្ជាក់ចឹង សិទ្ធិទាំងអស់នេះ គឺត្រូវបានធានា ប៉ុន្តែមែនទែននៅពេលដែលប្រជាពលរដ្ឋព្យាយាមអនុវត្តនូវសិទ្ធិសេរីភាពនេះ គឺពួកគាត់តែងតែប្រឈមហើយបើទោះបីជាពេលខ្លះពលរដ្ឋបានព្យាយាមធ្វើទៅតាមនីតិវិធីដូចជាការជូនដំណឹងក្តីហ្នឹង ក៏ត្រូវបានអាជ្ញាធរបដិសេធដែរ ចឹងជារឿងមួយដែលអាជ្ញាធរលោកត្រូវតែពិនិត្យអំពីកាតព្វកិច្ចរបស់ខ្លួន ហើយនឹងធានាដល់សិទ្ធិពលរដ្ឋនៅក្នុងការអនុវត្តសិទ្ធិសេរីភាព ដូចដែលមានចែងនៅក្នុងរដ្ឋធម្មនុញ្ញ ហើយប្រទេសកម្ពុជាយើងក៏បានទទួលស្គាល់លិខិតូបករណ៍អន្តរជាតិដែរ»។
ក្រុមស្ត្រីថ្ងៃសុក្រ នៅថ្ងៃទី១៦ ខែកក្កដានេះ បានបន្តការប្រមូលផ្តុំតវ៉ាជាថ្មីនៅមុខផ្សារ ស៊ីធី ម៉ល (City Mall) ដើម្បីទាមទារឱ្យតុលាការដោះលែងស្វាមីរបស់ខ្លួន ខណៈដែលមន្ត្រីពន្ធនាគារបានដឹកស្វាមីរបស់ពួកគេ ទៅកាន់សាលាដំបូងរាជធានីភ្នំពេញ ដើម្បីសួរនាំបន្តនៅថ្ងៃនេះ។ ដូចសព្វមួយដងដែរ ក្រុមសន្តិសុខបានរារាំង និងដកហូតនូវរូបថត និងផ្ទាំងប៉ាណូផ្សេងៗទៀតរបស់ពួកគេ៕