អ្នកទោសនយោបាយមីយ៉ាន់ម៉ាមួយរូប លោក Nyan Win បានស្លាប់បាត់បង់ជីវិតនៅក្នុងមន្ទីរពេទ្យកាលពីថ្ងៃម្សិលមិញ បន្ទាប់ពីបានឆ្លងវីរុសកូវីដ-១៩នៅក្នុងពន្ធនាគារ។ នេះបើតាមការឱ្យដឹងពីគណបក្សរបស់លោក។
ទីភ្នាក់ងារសារព័ត៌មាន Reuters បានស្រង់សេចក្តីថ្លែងការណ៍របស់«គណបក្សសម្ព័ន្ធជាតិដើម្បីលទ្ធិប្រជាធិបតេយ្យ» (NLD) មកចុះផ្សាយថា លោក Nyan Win អាយុ៧៨ឆ្នាំ ជាទីប្រឹក្សាជាន់ខ្ពស់មួយរូបរបស់មេដឹកនាំដែលត្រូវបានបណ្ដេញចេញពីតំណែង លោកស្រី អ៊ុងសាន ស៊ូជី ដែលត្រូវបានក្រុមយោធាឃុំខ្លួននៅក្នុងពន្ធនាគារ Insein ក្នុងទីក្រុងយ៉ាំងហ្គោន កាលពីអំឡុងខែកុម្ភៈ។ ប្រភពដដែលបន្តថា លោកត្រូវបានបញ្ជូនទៅកាន់មន្ទីរពេទ្យកាលពីសប្តាហ៍មុន ក្រោយពីបានឆ្លងជំងឺកូវីដ-១៩។
ស្របពេលដែលចូលរួមរំលែកទុក្ខដល់គ្រួសាររបស់បុរសម្នាក់ដែលធ្លាប់ជាមេធាវីរបស់លោកស្រី អ៊ុងសាន ស៊ូជី នោះ សេចក្តីថ្លែងការណ៍ដដែល បន្តថា៖ «យើងសន្យាថា នឹងបន្តធ្វើកិច្ចការទាំងឡាយណាដែលមិនទាន់សម្រេចបាន ដើម្បីបញ្ចប់របបផ្តាច់ការនៅក្នុងប្រទេស និងដើម្បីបង្កើតសហភាពសហព័ន្ធប្រជាធិបតេយ្យ [Federal Democratic Union]»។
គួរបញ្ជាក់ថា កិច្ចខិតខំប្រឹងប្រែងក្នុងការទប់ទល់ការកើនឡើងនៃរលកចម្លងក្នុងប្រទេសមីយ៉ាន់ម៉ាត្រូវបានធ្លាក់ចូលក្នុងភាពវឹកវរ គិតចាប់តាំងពីក្រុមយោធាបានដណ្តើមយកអំណាចមកគ្រប់គ្រងនិងបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី។
យោងតាមក្រសួងសុខាភិបាលមីយ៉ាន់ម៉ាដែលគ្រប់គ្រងដោយរបបយោធា បានឱ្យដឹងថា ក្នុងចំណោមប្រជាជនចំនួន៥៤ លាននាក់ មានប្រមាណតែ១,៦លាននាក់ប៉ុណ្ណោះដែលបានចាក់វ៉ាក់សាំងការពារជំងឺកូវីដ-១៩។ នេះបើតាមការរាយការណ៍របស់សារព័ត៌មានក្នុងស្រុក។
ទូរទស្សន៍រដ្ឋមីយ៉ាន់ម៉ា MRTV ដែលបានដកស្រង់តួលេខរបស់ក្រសួងសុខាភិបាល បានឱ្យដឹងដែរថា ប្រទេសមីយ៉ាន់ម៉ា មានអ្នកស្លាប់ដោយសារវីរុសកូវីដ-១៩ ចំនួន២៨១នាក់ និងឆ្លងថ្មីចំនួន៥ ១៨៩ករណីកាលពីថ្ងៃចន្ទ៕
