សង្គមស៊ីវិលបារម្ភពីគ្រោះថ្នាក់សុខភាពចំពោះពលករខ្មែរ បន្ទាប់ពីរដ្ឋាភិបាលថៃប្រកាសផ្អាកយុទ្ធនាការធ្វើតេស្តសំណាករកករណីវិជ្ជមានកូវីដ-១៩លើពលករបរទេសនៅតាមតំបន់និងសហគមន៍ពួកគេរស់នៅកាលពីសប្តាហ៍មុន ខណៈករណីឆ្លងក្នុងប្រទេសនេះកើនឡើងខ្លាំង។
អាជ្ញាធរសុខាភិបាលថៃបានរកឃើញអ្នកឆ្លងជំងឺកូវីដ-១៩កើនដល់ជាង១ម៉ឺនករណីក្នុងរយៈពេល៦ថ្ងៃចុងក្រោយ គិតត្រឹមថ្ងៃទី២២ ខែកក្កដា ឆ្នាំ២០២១នេះ បន្ទាប់ពីកើនដល់ជាង៥ពាន់ករណីក្នុងមួយថ្ងៃចាប់ពីដើមខែ ដោយភាគច្រើនកើតលើពលករអន្តោប្រវេសន៍រស់នៅនិងធ្វើការតាមជាយក្រុងបាងកក និងតាមបណ្តាខេត្តជុំវិញ។
រដ្ឋាភិបាលទីក្រុងបាងកក បានប្រកាសបិទខ្ទប់តំបន់ទាំងអស់រយៈពេលមួយខែ ដើម្បីកាត់ផ្តាច់ការចម្លងទៅសហគមន៍ខាងក្រៅ ដែលវិធានការនេះធ្វើឱ្យពលករខ្មែរមួយចំនួន ពិសេសអ្នកធ្វើការផ្នែកសាងសង់ និងអ្នកដែលមិនមានឯកសារការងារគ្រប់គ្រាន់ ប្រឈមនឹងបញ្ហាឆ្លងជំងឺកូវីដ-១៩ បាត់បង់ការងារ និងការខ្វះស្បៀង។
មន្រ្តីគម្រោងនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) ប្រចាំប្រទេសថៃ លោក លឹង សុផុន ប្រាប់ វីអូឌី នៅថ្ងៃទី២២ ខែកក្កដានេះថា រដ្ឋាភិបាលថៃបានបញ្ឈប់វិធានការរុករកអ្នកជំងឺកូវីដ-១៩នៅតាមតំបន់រស់នៅរបស់ពលករអន្តោប្រវេសន៍ដែលសង្ស័យមានការរីករាលដាលជំងឺ កាលពីសប្តាហ៍មុន។ លោកថា សេចក្តីសម្រេចនេះ គឺក្រោយការរុករកឃើញមានពលករឆ្លងច្រើន ហើយស្របពេលករណីឆ្លងថ្មីផ្ទុះឡើងនៅទូទាំងប្រទេស ធ្វើឱ្យមន្ទីរពេទ្យនៅតាមទីក្រុងនិងបណ្តាខេត្តផ្សេងៗពេញទៅដោយអ្នកជំងឺ។
មន្រ្តីសង្គមស៊ីវិលរូបនេះបន្ថែមថា បញ្ហានេះធ្វើឱ្យពលករមួយចំនួន ជាពិសេសអ្នកដែលថៅកែរបស់ពួកគេមិនយកចិត្តទុកដាក់ និងអ្នកដែលធ្វើការនៅក្រុមហ៊ុនតូចៗ ដូចជានៅតាមការដ្ឋានសំណង់រស់នៅប្រមូលផ្តុំគ្នា ងាយប្រឈមគ្រោះថ្នាក់សុខភាព បើពួកគេឆ្លងជំងឺកូវីដ-១៩ដោយមិនដឹងខ្លួន ហើយមិនអាចទៅរកពេទ្យព្យាបាលបាន។
លោក លឹង សុផុន និយាយថា៖ «បងប្អូនខ្មែរយើងខ្លះ គាត់អត់មានថៅកែទទួលខុសត្រូវ ហើយមិនមានឯកសារគ្រប់គ្រាន់ដើម្បីនឹងទៅមន្ទីរពេទ្យ។ ហើយណាមួយទៀត ឧបសគ្គ បញ្ហារបស់ពួកគាត់ គឺការប្រើភាសាអ៊ីចឹងឯង! ហើយមិនដឹងថា នៅពេលគាត់ឈឺ គាត់អត់ហ៊ានទៅពេទ្យ។ វាហាក់បីដូចជាទុកគាត់ចោល មិនបានព្យាបាល អ៊ីចឹងរឹងរឹតតែធ្វើឱ្យពួកគាត់ប្រឈមនិងភ័យខ្លាចកាន់តែខ្លាំង»។
វីអូឌី មិនអាចទាក់ទងសុំការឆ្លើយតបជុំវិញបញ្ហានេះពីស្ថានទូតប្រទេសថៃប្រចាំនៅកម្ពុជាបានទេនៅថ្ងៃនេះ។
យ៉ាងណា ស្ថាតទូតបានប្រាប់ វីអូឌី តាមសារអ៊ីម៉ែលកាលពីថ្ងៃពុធម្សិលមិញថា ជុំវិញបញ្ហាពលករចំណាកស្រុកកម្ពុជាក្នុងប្រទេសថៃនេះ រដ្ឋាភិបាលកម្ពុជានិងថៃកំពុងរួមគ្នាដោះស្រាយបញ្ហាលំបាករបស់ពលរដ្ឋប្រទេសទាំងពីរដែលកើតឡើងដោយសារការរាតត្បាតនៃវីរុសបំប្លែងខ្លួនថ្មីប្រភេទ”ដែលតា”។
ប្រភពដដែលបន្ថែមថា វីរុសនេះកំពុងធ្វើឱ្យប្រព័ន្ធសុខាភិបាលក្នុងប្រទេសរងសម្ពាធយ៉ាងធ្ងន់ធ្ងរ ហើយអាជ្ញាធរកំពុងបន្តតាមដានតំបន់ហានិភ័យផ្សេងៗ និងចាត់វិធានការធ្វើតេស្តរកករណីវិជ្ជមាន ក៏ដូចជាការចាក់វ៉ាក់សាំងជូនដល់អ្នកស្រុក និងរៀបចំគ្រែបន្ថែមនៅតាមមន្ទីរពេទ្យ។
ស្ថានទូតបន្ថែមថា៖ «ដរាបណាការទទួលបានការថែទាំសុខភាពមានការព្រួយបារម្ភ កម្មករចំណាកស្រុកទាំងអស់អាចទទួលបានការធ្វើតេស្តរកជំងឺកូវីដ-១៩ និងការព្យាបាល ដែលជាផ្នែកមួយនៃកិច្ចខិតខំប្រឹងប្រែងរបស់យើង ដើម្បីប្រយុទ្ធប្រឆាំងនឹងជំងឺរាតត្បាតនេះក្នុងមធ្យោបាយរួមគ្នាតែមួយ»។
អ្នកនាំពាក្យក្រសួងការបរទេសកម្ពុជា លោក កុយ គួង លើកឡើងថា ថៃបានដាក់ចេញនូវយន្តការឱ្យអ្នកជំងឺកូវីដ-១៩ស្រាល ចុះឈ្មោះតាមប្រព័ន្ធ Scan QR Code ដើម្បីព្យាបាលនៅផ្ទះ ក្រោមការផ្តល់ប្រឹក្សា តាមដាន និងព្យាបាលពីក្រុមគ្រូពេទ្យពីចម្ងាយតាមវីដេអូខល ហើយបើមានអាការធ្ងន់ធ្ងរ អាចនឹងស្នើសុំសិទ្ធិទៅព្យាបាលនៅមន្ទីរពេទ្យ។
លោកបន្ថែមថា ស្ថានទូតកម្ពុជាកំពុងធ្វើការយ៉ាងជិតស្និទ្ធជាមួយភាគីថៃ និងបានអន្តរាគមន៍ច្រើន ជាពិសេសពាក់ព័ន្ធនឹងវិធានការព្យាបាលតាមផ្ទះ ដូចជា ទូរសព្ទផ្ទាល់ទៅមជ្ឈមណ្ឌលគ្រប់គ្រងជំងឺកូវីដ-១៩នៅថៃ ជាដើម។
លោក កុយ គួង បន្ថែមថា៖ «ជាគោលការណ៍ យើងឃើញកន្លងមកនេះ ថៃបានផ្ដល់សេវាគាំពារ ពិនិត្យ ព្យាបាល និងចាក់វ៉ាក់សាំង ជូនទាំងជនជាតិថៃ និងពលករបរទេសយ៉ាងសកម្ម។ ក៏ប៉ុន្តែការខ្វះខាតតិចតួច វាអាចចៀសមិនរួចទេ ដោយសារថាភាពប្រឈមកំពុងកើតឡើងជាទូទៅ។ ខ្ញុំយល់ថា យើងគួរតែជឿជាក់និងផ្តល់ឱកាសឱ្យម្ចាស់ផ្ទះ ហើយយើងមិនគួរព្រួយបារម្ភពេកទេ»។
បើតាមមន្រ្តីអ្នកនាំពាក្យដដែល ពលករខ្មែរប្រមាណ១លាននាក់កំពុងស្នាក់នៅនិងធ្វើការនៅក្នុងប្រទេសថៃ។ តួលេខនេះ គឺទាបជាងរបាយការណ៍ពីអង្គការ«សង់ត្រាល់» ដែលថា ពលករខ្មែរចំណាកស្រុកទៅធ្វើការនៅក្នុងប្រទេសនេះទាំងស្របច្បាប់និងមិនស្របច្បាប់ គឺមានប្រមាណ១លាន៦សែននាក់៕
