អាជ្ញាធរខេត្តកំពង់ស្ពឺ ហាមប្រជាពលរដ្ឋមិនឱ្យទិញដីឡូត៍ពីក្រុមហ៊ុនអភិវឌ្ឍន៍ដំណាំឧស្សាហកម្មដែលកំពុងធ្វើសកម្មភាពលក់ទិញលក់ដីឡូត៍ ស្ថិតនៅភូមិទី៦ ឃុំត្រែងត្រយឹង ស្រុកភ្នំស្រួច ដោយថា ក្រុមហ៊ុននោះបានទិញលក់ដីខុសនីតិវិធី។
ក្នុងសេចក្តីជូនដំណឹងមួយចុះថ្ងៃទី២០ ខែកក្កដា ឆ្នាំ២០២១ ដែល វីអូឌី ទើបទទួលបាននៅថ្ងៃនេះ រដ្ឋបាលឃុំត្រែងត្រយឹង បានឱ្យដឹងថា រយៈពេលប៉ុន្មានខែចុងក្រោយនេះ មានករណីទិញលក់ដីដែលបានធ្វើឡើងដោយតំណាងក្រុមហ៊ុនអភិវឌ្ឍន៍ដំណាំឧស្សាហកម្ម អ៊ុក ឃុន ក្រោមរូបភាពនៃការពុះបំបែកក្បាលដីជាឡូត៍ៗលក់ជូនប្រជាពលរដ្ឋ ហើយកាត់ប្លង់ត្រឹមក្រុមហ៊ុន។
រដ្ឋបាលឃុំត្រែងត្រយឹង បន្តថា ទីតាំងដែលក្រុមហ៊ុនកំពុងធ្វើសកម្មភាពទិញលក់ដីឡូត៍នោះ មិនមែនជាទីតាំងដែលក្រុមហ៊ុនទទួលបានសិទ្ធិវិនិយោគទេ និងជាទីតាំងដីដែលកំពុងមានជម្លោះ។ រដ្ឋបាលឃុំបានបន្តទៀត ដំណើរការនៃការកាត់ប្លង់ដីរបស់ក្រុមហ៊ុននេះ ក៏ធ្វើឡើងខុសពីនីតិវិធីច្បាប់ ដោយពុំមានការដឹងឮពីអាជ្ញាធរមូលដ្ឋាននិងមន្ត្រីជំនាញភូមិបាលស្រុកឡើយ។
អាជ្ញាធរឃុំបញ្ជក់ថា ដីដែលក្រុមហ៊ុនអភិវឌ្ឍន៍ដំណាំឧស្សាហកម្ម អ៊ុក ឃុន ទទួលបានសិទ្ធិវិនិយោគជាប្រភេទដីសម្បទានសេដ្ឋកិច្ចមានតែ៥២ហិកតាប៉ុណ្ណោះ ដែលមានទីតាំងស្ថិតក្នុងភូមិទី១ និងភូមិពាមទុង ក្នុងឃុំត្រែងត្រយឹង។
សេចក្តីជូនដំណឹងបញ្ជាក់ថា៖ «ដើម្បីធានាបានភាពស្របច្បាប់ និងចៀសវាងចាញ់បោកជនខិលខូច សូមបងប្អូនប្រជាពលរដ្ឋទាំងអស់មិនត្រូវធ្វើការទិញដីនៅទីតាំងខាងលើដែលរៀបចំដោយតំណាងក្រុមហ៊ុនអភិវឌ្ឍន៍ដំណាំឧស្សាហកម្ម អ៊ុក ឃុន ឡើយ»។
អភិបាលខេត្តកំពង់ស្ពឺ លោក វ៉ី សំណាង បញ្ជាក់បន្ថែមលើសេចក្តីជូនដំណឹងនៅថ្ងៃសុក្រនេះថា ក្រុមហ៊ុនអភិវឌ្ឍន៍ដំណាំឧស្សាហកម្ម អ៊ុក ឃុន ដែលកំពុងធ្វើសកម្មភាពពុះដីឡូត៍លក់ឱ្យប្រជាពលរដ្ឋនេះ ជារឿងមិនត្រឹមត្រូវនិងខុសច្បាប់។ លោកថា ទីតាំងដីដែលក្រុមហ៊ុនកំពុងផ្សព្វផ្សាយលក់នោះ ជាដីឯកជនមានម្ចាស់រួចទៅហើយ។
ប៉ុន្តែពេលដែល វីអូឌី សួរថា រដ្ឋបាលខេត្តនឹងមានវិធានការឬចំណាត់ការយ៉ាងណាទៅលើក្រុមហ៊ុនទេ លោក វ៉ី សំណាង បានបដិសេធឆ្លើយតប។
លោកថា៖ «ឥលូវសំខាន់ឱ្យប្រជាពលរដ្ឋចូលរួមជាមួយអាជ្ញាធរសិន ដោយកុំទៅទិញដីដែលគេពុះឡូត៍លក់ខុសច្បាប់ ព្រោះអាហ្នឹងវាជារឿងខុសច្បាប់ បើអ្នកហ្នឹងមិនមកសុំយើងពុះឡូត៍អីណា! អ៊ីចឹងជួយផ្សព្វផ្សាយកុំឱ្យប្រជាជនគាត់ទៅទិញ»។
វីអូឌី មិនអាចរកការឆ្លើយតបពីតំណាងក្រុមហ៊ុនអភិវឌ្ឍន៍ដំណាំឧស្សាហកម្ម អ៊ុក ឃុន បានទេ ចំពោះការចោទប្រកាន់នេះ។
មន្ត្រីសម្របសម្រួលសមាគមអាដហុកប្រចាំខេត្តកំពង់ស្ពឺ លោក រ័ត្ន ថាវី មានប្រសាសន៍ថា ប្រសិនបើក្រុមហ៊ុនពិតជាបានពុះដីឡូត៍លក់ដោយខុសច្បាប់មែន គឺអាជ្ញាធរពាក់ព័ន្ធត្រូវបង្ហាញឬផ្សព្វផ្សាយឯកសារថា ដីនោះស្របច្បាប់ឬមិនស្របច្បាប់ និងមានជាប់ពាក់ព័ន្ធជាមួយអ្នកណាខ្លះ ដើម្បីឱ្យប្រជាពលរដ្ឋបានដឹង ហើយត្រូវចាត់វិធានការច្បាប់ឱ្យបានតឹងរ៉ឹង ដើម្បីកុំឱ្យខាតបង់ផលប្រយោជន៍ប្រជាពលរដ្ឋនៅថ្ងៃក្រោយ។
លោកបន្ថែមថា៖ «ខេត្តត្រូវតែបង្ហាញពីភាពជាក់លាក់មួយឱ្យប្រជាពលរដ្ឋបានដឹងច្បាស់ ហើយបើសិនគាត់អត់មានអ្វីមួយដែលបង្ហាញទៅដល់ប្រជាពលរដ្ឋឱ្យបានច្បាស់លាស់ទេ ប្រជាពលរដ្ឋម៉េចដឹងថាដីហ្នឹងនៅកន្លែងណាឱ្យពិតប្រាកដ អ៊ីចឹងត្រូវមានប្លង់ទីតាំងបង្ហាញ! ហើយមួយទៀត ប្រសិនបើក្រុមហ៊ុនលក់ដីហ្នឹងទៅឱ្យប្រជាពលរដ្ឋមែន ហើយប្រជាពលរដ្ឋណាហ៊ានទិញដីហ្នឹង គេទុកជាមោឃៈដដែលហ្នឹង»។
កាលពីថ្ងៃទី១៦ ខែមីនា ឆ្នាំ២០២១ រដ្ឋបាលខេត្តកំពង់ស្ពឺ បានចេញដីកាដកហូតដីព្រៃឈើចំនួន២៦៦,៣១ហិកតា ស្ថិតនៅ៩ទីតាំងផ្សេងៗគ្នា ក្នុងភូមិសាស្ត្រឃុំតាសាល និងឃុំត្រពាំងជោ ស្រុកឱរ៉ាល់ មកធ្វើជាសម្បត្តិរដ្ឋវិញ ក្រោយពីមានជនខិលខូចមួយចំនួនបានទៅទន្ទ្រានយកធ្វើជាកម្មសិទ្ធិដោយខុសច្បាប់៕
