យ៉ាងហោចណាស់មានជនជាតិភាគតិច «មូស្លីមរ៉ូហ៊ីងយ៉ា» ចំនួន៦នាក់ ក្នុងនោះមានទាំងកុមារផង បានស្លាប់បាត់បង់ជីវិត និងមនុស្សជាច្រើននាក់ផ្សេងទៀតរងរបួស បន្ទាប់ពីមានភ្លៀងមូសុងដែលបានបង្កឱ្យមានការរអិលបាក់ដី និងទឹកជំនន់នៅក្នុងជំរុំជនភៀសខ្លួននៅភាគខាងត្បូងប្រទេសនេះ។
ទីភ្នាក់ងារសារព័ត៌មាន Reuters បានដកស្រង់សម្ដីមន្ត្រីរដ្ឋាភិបាលបង់ក្លាដែសទទួលបន្ទុកជនភៀសខ្លួន លោក Mohammad Shamsud Douza មកចុះផ្សាយថា មនុស្ស៥នាក់បានស្លាប់បាត់បង់ជីវិតដោយសារការរអិលបាក់ដី ខណៈដែលកុមារម្នាក់បានបាត់ខ្លួនដោយសារទឹកជំនន់ បន្ទាប់ពីមានភ្លៀងធ្លាក់ខ្លាំង។
ជនភៀសខ្លួនរ៉ូហ៊ីងយ៉ា (Rohingya) ជិត១លាននាក់ កំពុងរស់នៅក្នុងជំរុំដែលមានមនុស្សច្រើនកុះករនៅក្នុងតំបន់ Cox’Bazar ដែលជាកន្លែងតាំងទីលំនៅរបស់ជនភៀសខ្លួនធំជាងគេនៅលើពិភពលោក បន្ទាប់ពីពួកគេបានរត់គេចពីការបង្ក្រាបរបស់យោធានៅក្នុងប្រទេសជិតខាងមីយ៉ាន់ម៉ាកាលពីឆ្នាំ២០១៧ ។
លោក Kasim ជាជនភៀសខ្លួនមួយរូបនៅក្នុងតំបន់រងគ្រោះខ្លាំងបំផុតមួយ បាននិយាយថា៖ «ខ្ញុំបានឃើញពីស្ថានភាពដ៏គួរឱ្យភ័យខ្លាចជាច្រើននៅក្នុងជំរុំ ខណៈដែលជម្រកត្រូវបានជន់លិច ហើយស្រ្តីជាច្រើនបាននាំកូនៗរបស់ពួកគេរត់គេចជាមួយនឹងសំឡេងស្រែកយំ»។
ជាមួយគ្នានេះផងដែរ លោក Onno van Manen នាយកនៃអង្គការ Save the Children ប្រចាំនៅប្រទេសបង់ក្លាដែស បានថ្លែងថា កុមារ២នាក់បានស្លាប់បាត់បង់ជីវិតកាលពីថ្ងៃអង្គារ បន្ទាប់ពីមានការរអិលបាក់ភ្នំមួយលើទីជម្រករបស់ពួកគេ។
លោកបន្តថា៖ «ក្រៅពីការស្លាប់ទាំងនេះ ភ្លៀងធ្លាក់ខ្លាំងក៏បានធ្វើឱ្យខូចខាតដល់ជម្រកបណ្តោះអាសន្នរាប់រយកន្លែង ដែលបានបង្ខំឱ្យក្រុមគ្រួសារនានាស្វែងរកទីជម្រកផ្សេងទៀតនៅក្នុងវិហារសាសនានិងសាលារៀន» ។
ការិយាល័យអាកាសធាតុប្រទេសបង់ក្លាដែស ឱ្យដឹងថា ភ្លៀងធ្លាក់ខ្លាំងអាចនឹងបន្តអូសបន្លាយសម្រាប់រយៈពេលប៉ុន្មានថ្ងៃខាងមុខទៀត។
លោក Onno van Manen បន្ថែមថា៖ «បញ្ហាភ្លៀងធ្លាក់ខ្លាំងនិងទឹកជំនន់ក្នុងតំបន់ Cox’Bazar បច្ចុប្បន្ន បង្ហាញឱ្យឃើញសារជាថ្មីម្តងទៀតពីការរងគ្រោះរបស់ជនភៀសខ្លួនរ៉ូហ៊ីងយ៉ា ជាពិសេសកុមារដែលរងផលប៉ះពាល់ពីការប្រែប្រួលអាកាសធាតុ»។
លោកបន្ថែមថា៖ «ជំរុំទាំងនេះមិនមែនជាទីកន្លែងសមស្របសម្រាប់កុមាររស់នៅនិងអភិវឌ្ឍន៍ខ្លួននោះទេ។ ទាក់ទិននឹងករណីនេះ សហគមន៍អន្តរជាតិត្រូវតែដាក់ចេញនូវដំណោះស្រាយនយោបាយរយៈពេលវែងណាមួយជាបន្ទាន់ ដើម្បីដោះស្រាយបញ្ហានេះ»៕
