សមត្ថកិច្ចក្រុងភ្នំពេញបានកសាងសំណុំរឿងមនុស្ស១៤នាក់ទៀតបញ្ជូនទៅតុលាការកាលពីថ្ងៃទី៥ ខែសីហា ខណៈភោជនីយដ្ឋានមួយកន្លែងត្រូវបិទជាបណ្តោះអាសន្ន។
យោងតាមសេចក្តីជូនដំណឹងស្តីពីលទ្ធផលនៃការអនុវត្តវិធានការច្បាប់ចំពោះបុគ្គលដែលល្មើសនឹងវិធានការសុខាភិបាល និងវិធានការរដ្ឋបាល សម្រាប់ថ្ងៃទី៥ ខែសីហា បានឱ្យដឹងថា អាជ្ញាធររាជធានីភ្នំពេញបានចុះអនុវត្តវិធានការច្បាប់ចំនួន៤១៩ករណី បានឃាត់ខ្លួនមនុស្សចំនួន៨២៨នាក់ ដើម្បីអប់រំនិងពិន័យជាប្រាក់ ខណៈមនុស្ស១៤នាក់ត្រូវបានបញ្ជូនទៅតុលាការ។ ក្រៅពីនេះ អាជ្ញាធរក៏បានឃាត់យានយន្តបានចំនួន៣៣០គ្រឿង និងពិន័យជាប្រាក់៤៤ ០០០ ០០០រៀល។
ដោយឡែក នៅយប់មិញនេះ សមត្ថកិច្ចបានឃាត់មនុស្ស១៣នាក់បន្ថែមទៀត ខណៈថៅកែភោជនីយដ្ឋានលួចបង្កប់បើកខារ៉ាអូខេយីហោ ផ្ទះផាតធី (Party House) ស្ថិតនៅខណ្ឌទួលគោក និងភ្ញៀវម្នាក់បញ្ជូនទៅកាន់តុលាការ និងបានបិទភោជនីយដ្ឋានខាងលើនេះជាបណ្តោះអាសន្ន។ គិតត្រឹមថ្ងៃទី៥ ខែសីហានេះ មនុស្សសរុប៣២នាក់ហើយដែលត្រូវបានសមត្ថកិច្ចកសាងសំណុំរឿងបញ្ជូនទៅតុលាការ ក្រោយពីល្មើសបម្រាមរបស់រដ្ឋបាលរាជធានីភ្នំពេញ។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោកវរសេនីយ៍ឯក សាន សុខសីហា មានប្រសាសន៍ថា ក្នុងចំណោមអ្នកល្មើសបម្រាមគោចរទាំង១៣នាក់ខាងលើនេះ កំពុងស្ថិតនៅក្នុងការសាកសួរនៅតាមបណ្តាអធិការខណ្ឌនានា មុននឹងសម្រេចថា តើត្រូវកសាងសំណុំរឿងបញ្ជូនទៅតុលាការឬត្រូវដោះលែងវិញដោយគ្រាន់តែធ្វើការអប់រំនិងពិន័យជាប្រាក់។
គួរជម្រាបជូនថា ចាប់តាំងពីយប់ថ្ងៃទី៣ ខែសីហាមក អាជ្ញាធររាជធានីភ្នំពេញ បានចាប់ផ្តើមអនុវត្តវិធានការក្តៅចំពោះអ្នកល្មើសបម្រាមគោចរចាប់ពីម៉ោង៩យប់ដល់ម៉ោង៣ទៀបភ្លឺ ខណៈអាជ្ញាធរកំពុងព្រួយបារម្ភពីការឆ្លងជំងឺកូវីដ-១៩បំប្លែងថ្មី (Delta) នៅក្នុងសហគមន៍។ បម្រាមគោចរនេះបានអនុវត្តចាប់ពីថ្ងៃទី២៩ ខែកក្កដា រហូតដល់ថ្ងៃទី១២ ខែសីហា ខាងមុខ៕
