ប្រធានពន្ធនាគារខេត្តកណ្តាលឱ្យដឹងថា សមត្ថកិច្ចបានឃាត់ខ្លួនអ្នកជាប់ឃុំចំនួន៤នាក់មកវិញ ខណៈពួកគេព្យាយាមរត់គេចចេញពីពន្ធនាគារ នៅអំឡុងពេលមន្ត្រីប្រចាំការនៅទីនោះបើកទ្វារឱ្យចេញហាត់ប្រាណ ។
ប្រធានពន្ធនាគារខេត្តកណ្តាល លោក ចាត ស៊ីនាង ប្រាប់វីអូឌីនៅថ្ងៃអាទិត្យទី៨ ខែសីហានេះថា នៅពេលមន្ត្រីប្រចាំការនៅទីនោះបើកទ្វារឱ្យចេញហាត់ប្រាណ មានជនជាប់ឃុំចំនួន៤នាក់ បានលួចរត់ចេញពីពន្ធនាគារខេត្ត កណ្តាល កាលពីម្សិលមិញ ប៉ុន្តែត្រូវបានសមត្ថកិច្ចចាប់ខ្លួនទាំងអស់មកវិញភ្លាមៗតែម្តង ។
លោកមានប្រសាសន៍ថា៖ «យើងចាក់សោទ្វាររបងឱ្យវាចេញក្រៅហាត់ប្រាណយកកំដៅថ្ងៃ នៅពេលហ្នឹងវារត់បុកទ្វារបម្រុងរត់ចេញទៅក្រៅ ប៉ុន្តែកម្លាំងយើងអន្តរាគមន៍ចាប់បានមកវិញភ្លាមៗ»។
ប្រធានពន្ធនាគារខេត្តកណ្តាល លោក ចាត ស៊ីនាង បញ្ជាក់ថា អ្នកជាប់ឃុំទាំង៤នាក់នោះ បានប្រព្រឹត្តបទល្មើសគ្រឿងញៀនចំនួន៣នាក់ និង១នាក់ទៀតប្រព្រឹត្តបទល្មើសហិង្សា ។
គួររំឮកថា កាលពីថ្ងៃ៩ ខែមករា ឆ្នាំ២០២១ ទណ្ឌិតចំនួន ៥នាក់ ដែលត្រូវបានឃុំខ្លួននៅពន្ធនាគារខេត្តកណ្តាល បានលួចរត់ចេញពីគុក ប៉ុន្តែម្នាក់ក្នុងចំណោម៥នាក់ត្រូវបានសមត្ថកិច្ចចាប់ខ្លួនបានភ្លាមៗផងដែរ៕
