ស្ត្រីជាដើមបណ្តឹងម្នាក់នៅខេត្តបាត់ដំបង បន្តជំរុញឱ្យក្រសួងមហាផ្ទៃពន្លឿនចាត់វិធានការមន្ត្រីនគរបាលដែលខ្លួនចោទថា បានធ្វើទារុណកម្មប្អូនប្រុសរបស់គាត់រហូតស្លាប់ ដោយថា ពេលនេះគាត់មានការព្រួយបារម្ភពីសុវត្ថិភាពផ្ទាល់ខ្លួន ខណៈអ្នកទាំងនោះនៅមានសេរីភាពនៅឡើយ។
កាលពីថ្ងៃទី៣ ខែមេសា ឆ្នាំ២០២១ មន្ត្រីនគរបាលស្រុកសង្កែ ខេត្តបាត់ដំបង បានចាប់ខ្លួនលោក ពេជ្រ ធារ៉េត ក្រោយពីមានតម្រុយថា គាត់ជាអ្នករៀបចំគម្រោងសម្លាប់ប្រពន្ធដោយឆក់ខ្សែភ្លើង។ ប៉ុន្តែជនសង្ស័យរូបនោះបានស្លាប់នៅថ្ងៃដដែល ក្រោយពីបញ្ជូនចេញពីអធិការដ្ឋាននគរបាលស្រុកសង្កែ យកទៅសង្គ្រោះនៅមន្ទីរពេទ្យ។
ករណីនេះ ក្រុមគ្រួសារសពបានប្តឹងចោទមន្ត្រីនគរបាលពាក់ព័ន្ធថាបានធ្វើទារុណកម្មជនសង្ស័យរហូតស្លាប់ ដោយសម្អាងទៅលើស្នាមជាំនៅលើដងខ្លួននិងមានឈាមហូរតាមត្រចៀកនិងមាត់ ពេលយកសពទៅដល់ផ្ទះ។ ក្រោយមក បងស្រីបង្កើតរបស់លោក ពេជ្រ ធារ៉េត គឺអ្នកស្រី ពេជ្រ លីណា បានដាក់ពាក្យប្តឹងទៅក្រសួងមហាផ្ទៃ ដើម្បីស្វែងរកយុត្តិធម៌ ដែលគិតត្រឹមខែសីហានេះ មានរយៈពេលជាង៣ខែមកហើយ។
អ្នកស្រី ពេជ្រ លីណា នៅថ្ងៃព្រហស្បតិ៍នេះ បាននិយាយថា អ្នកស្រីមានក្តីបារម្ភពីសុវត្ថិភាពផ្ទាល់ខ្លួន ក្រោយពីបានដាក់ពាក្យបណ្តឹងទៅក្រសួងមហាផ្ទៃ ហើយមន្ត្រីជំនាញរបស់ក្រសួងបានចុះស៊ើបអង្កេត ដោយរកឃើញថា ពួកគាត់មានជាប់ពាក់ព័ន្ធដូចពាក្យបណ្តឹងរបស់គាត់មែន។ ប៉ុន្តែអ្នកស្រីថា ក្រោយការរកឃើញនោះ ក្រសួងនៅមិនទាន់មានវិធានការទៅលើមន្ត្រីប៉ូលិសទាំងនោះនៅឡើយ ដែលធ្វើឱ្យអ្នកស្រីកាន់តែមានក្តីបារម្ភថែមទៀត។
អ្នកស្រីថា៖ «សម្រាប់ខ្ញុំផ្ទាល់ ខ្ញុំនិយាយតាមត្រង់ ខ្ញុំរាងខ្លាចដែរ ដោយសារមន្ត្រីដែលកាន់ច្បាប់ ប៉ុន្តែយកជនសង្ស័យដូចជាប្អូនខ្ញុំនេះ យកគាត់ទៅសួរចម្លើយរហូតមានស្នាកស្នាមប៉ុណ្ណឹង គឺជាការធ្វើទារុណកម្មវាយប្អូនខ្ញុំសាហាវណាស់ ដែលធ្វើឱ្យខ្ញុំព្រួយបារម្ភពីសុវត្ថិភាពខ្ញុំដូចគ្នា តែខ្ញុំនៅតែព្យាយាមអត់បោះបង់ទេ»។
បញ្ហានេះ អ្នកស្រី ពេជ្រ លីណា បានអំពាវនាវដល់មន្ត្រីនៅនាយកដ្ឋានព្រហ្មទណ្ឌកម្រិតធ្ងន់នៃក្រសួងមហាផ្ទៃ ជួយពន្លឿននីតិវិធី ដើម្បីចាត់វិធានការមន្ត្រីដែលពាក់ព័ន្ធឱ្យបានឆាប់ ដើម្បីផ្តល់យុត្តិធម៌ឱ្យក្រុមគ្រួសារគាត់និងប្អូនគាត់ដែលបានស្លាប់។
អ្នកស្រីថា៖ «រឿងប្អូនខ្ញុំនេះជាង១០០ថ្ងៃហើយ អ៊ីចឹងខ្ញុំបារម្ភ! តែជំងឺកូវីដ វាពិបាកមែន! តែកាលពីចាប់ប្អូនខ្ញុំ ក៏អំឡុងកូវីដដែរ។ អ៊ីចឹងខ្ញុំស្នើលោកពូនៅខាងព្រហ្មទណ្ឌដែលគាត់ថានឹងចុះទៅហ្នឹង ខ្ញុំស្នើឱ្យគាត់មេត្តាអាណិតជួយពន្លឿនរកយុត្តិធម៌ឱ្យប្អូនខ្ញុំ ព្រោះវាជាង១០០ថ្ងៃហើយ»។
នាយរងការិយាល័យនាយកដ្ឋានព្រហ្មទណ្ឌកម្រិតធ្ងន់ក្រសួងមហាផ្ទៃ លោក ជុំ ហឿន មានប្រសាសន៍ថា លោកមិនទាន់ទទួលបានបញ្ជាពីថ្នាក់លើ ដើម្បីស៊ើបអង្កេតបន្ថែមករណីនេះនៅឡើយទេ។
លោកថា៖ «យើងសួរទៅថ្នាក់ដឹកនាំដែរ ទៅប្រធានការិយាល័យដែរ តែប្រធានការិយាល័យគាត់ថារង់ចាំបទបញ្ជាពីនាយករង។ អ៊ីចឹងប្រហែលជារឿងកូវីដហ្នឹងហើយបានជាស្ងាត់នោះ តាមពិតខាងបាត់ដំបងហ្នឹង ពួកខ្ញុំដាច់ខាតត្រូវតែចុះហើយ»។
អ្នកសម្របសម្រួលសមាគមការពារសិទ្ធិមនុស្សអាដហុកប្រចាំខេត្តបាត់ដំបង លោក យ៉ិន ម៉េងលី មានប្រសាសន៍ថា មកដល់ពេលនេះ លោកមិនទាន់ទទួលបានព័ត៌មានពីតម្រុយនៃការគំរាមកំហែងណាមួយទៅលើដើមបណ្តឹង ឈ្មោះ ពេជ្រ លីណា នៅឡើយទេ។ ប៉ុន្តែលោកផ្តល់ជាយោបល់ថា បើមានបញ្ហានេះកើតឡើងមែន ស្រ្តីរូបនោះត្រូវដាក់បណ្តឹងមួយទៀតទៅស្ថាប័នពាក់ព័ន្ធពីបទគំរាមកំហែង។
មួយវិញទៀត លោកថា ស្ថាប័នជាតិគួរបង្ហាញឆន្ទៈពិតប្រាកដដែលអាចឱ្យគ្រួសារជនរងគ្រោះជឿបានពីចំណាត់ការច្បាប់ទៅលើមន្ត្រីពាក់ព័ន្ធ ខណៈគណៈកម្មាធិការជាតិប្រឆាំងទារុណកម្មរបស់រដ្ឋាភិបាល បានស៊ើបអង្កេតរកឃើញការពិតមួយផ្នែកទៅហើយនោះ។
លោកថា៖ «មុខសញ្ញាអ្នកពាក់ព័ន្ធ យើងមានអស់ហើយ! ហើយរបាយការណ៍របស់គណៈកម្មាធិការជាតិប្រឆាំងទារុណកម្ម ក៏បានបង្ហាញមនុស្សពាក់ព័ន្ធដែរ អ៊ីចឹងវាគ្មានហេតុផលអីត្រូវទុករាប់ខែថែមទៀតទេ»។
កាលពីថ្ងៃទី១៦ ខែមិថុនា ឆ្នាំ២០២១ គណៈកម្មាធិការជាតិប្រឆាំងទារុណកម្មរបស់រដ្ឋាភិបាល ស្នើអគ្គស្នងការដ្ឋាននគរបាលជាតិ បើកការស៊ើបអង្កេតបន្ថែម ដើម្បីរកការពិតនិងនាំខ្លួនមន្ត្រីពាក់ព័ន្ធមកទទួលទោស ក្រោយពីមានពាក្យបណ្តឹងពីក្រុមគ្រួសារសព។
បើតាមការវាយតម្លៃជំហានដំបូង ក្រោយការចុះស៊ើបអង្កេតដល់កន្លែងកើតហេតុនិងសាកសួរគ្រប់ភាគីពាក់ព័ន្ធ គណៈកម្មាធិការនេះបានសន្និដ្ឋានថា ការស្លាប់របស់ជនសង្ស័យ ពេជ្រ ធារ៉េត អំឡុងឃុំខ្លួននៅអធិការដ្ឋាននគរបាលស្រុកសង្កែ ខេត្តបាត់ដំបង អាចជាប់ពាក់ព័ន្ធនឹងការធ្វើទារុណកម្ម។
គណៈកម្មាធិការនេះបញ្ជាក់ដូច្នេះថា៖ «ករណីនេះអាចមានការធ្វើទារុណកម្មស្រាលឬធ្ងន់ទៅលើជនសង្ស័យ អំឡុងពេលឃុំខ្លួនបណ្តោះអាសន្ននៅអធិការដ្ឋាននគរបាលស្រុកសង្កែ ខណៈពេលដែលជនសង្ស័យកំពុងមានអាការឡេះឡះរំខានដល់មន្ត្រីនគរបាលនៅទីនោះ»។
តែយ៉ាងណា ក្រោយការកឃើញនេះ មន្ត្រីជំនាញក្រសួងមហាផ្ទៃមិនបានបញ្ជូនសំណុំរឿងនេះទៅតុលាការ ដើម្បីដោះស្រាយតាមនីតិវិធីច្បាប់នៅឡើយនោះទេ ដោយរុញឱ្យអគ្គស្នងការដ្ឋាននគរបាលជាតិធ្វើការស៊ើបអង្កេតបន្ត៕
សេចក្ដីកែតម្រូវ៖ វីអូឌី សូមធ្វើការកែតម្រូវឈ្មោះ «ពេជ្រ លីដា» ទៅជា «ពេជ្រ លីណា»
